போலீஸ் முன்னிலையில் தவெக - பாமகவினர் மோதல்: உளுந்தூர்பேட்டையில் பரபரப்பு

உளுந்தூர்பேட்டை: உளுந்தூர்பேட்டையில் போலீசார் முன்னிலையில் தவெக-பாமக நிர்வாகிகள் மோதலில் ஈடுபட்டதால் பரபரப்பு ஏற்பட்டது. கள்ளக்குறிச்சி மாவட்டம் உளுந்தூர்பேட்டை நகராட்சி அன்னை சத்யா தெருவில் வசிப்பவர் விஜய்செல்வா (33), தவெக நகர நிர்வாகி. இதே பகுதியில் வசித்து வரும் சூர்யா என்பவர் பாமக நகர நிர்வாகியாக உள்ளார். இருவருக்கும் இடையே இதே பகுதியில் உள்ள அரசு புறம்போக்கு இடத்தை அனுபவிப்பது தொடர்பாக அடிக்கடி தகராறு ஏற்பட்டு முன்விரோதம் இருந்து வந்தது.

இந்நிலையில் நேற்றுமுன்தினம் மீண்டும் தகராறு ஏற்பட்டது. தகவலறிந்து உளுந்தூர்பேட்டை போலீசார் தகராறை விலக்கிவிட முயன்றனர். அப்போது இரு தரப்பை சேர்ந்தவர்களும் போலீசார் முன்னிலையில் தடி, கல் உள்ளிட்ட ஆயுதங்களை கொண்டு ஒருவரை ஒருவர் சரமாரியாக தாக்கிக் கொண்டனர். இதனால் இந்த பகுதியில் பெரும் பரபரப்பு ஏற்பட்டது. இருதரப்பை சேர்ந்தவர்களும் காயம் அடைந்து உளுந்தூர்பேட்டை அரசு மருத்துவமனையில் சேர்க்கப்பட்டுள்ளனர்.

இதுகுறித்து பாமக நிர்வாகி சூர்யா கொடுத்த புகாரின் பேரில் தவெக நிர்வாகி விஜய்செல்வா, இவரது தாய் ஞானாம்பாள் மற்றும் உறவினர்கள் பரத், ஜெயராஜ், மணிகண்டன், விக்கி ஆகிய 6 பேர் மீது வழக்குப்பதிவு செய்துள்ளனர். விஜய்செல்வாவின் தாய் ஞானாம்பாள் கொடுத்த புகாரின் பேரில் பாமக நிர்வாகி பாலாஜி, சூர்யா, ரவி, அபிநயா, மஞ்சுளா ஆகிய 5 பேர் மீதும் வழக்கு பதிவு செய்துள்ளனர்.