அடடா... இதை மிஸ் செய்துட்டோமே!

நன்றி குங்குமம் டாக்டர்

FOMO சமூக ஊடகங்கள் உருவாக்கும் உணர்வு!

மனநல மருத்துவர் வி. மிருதுல்லா அபிராமி

விடுமுறை காலம் என்பது மகிழ்ச்சி, கொண்டாட்டம் மற்றும் குடும்பத்தில் உள்ள அனைவரும் ஒன்று சேரும் காலமாகும். இன்றைய காலக்கட்டத்தில் சமூக ஊடகங்கள் என்பது நமது வாழ்க்கையின் ஒன்றாக மாறிவிட்ட சூழலில், நாம் மற்றவர்களின் வாழ்க்கையுடன் ஒப்பிடுகையில், இது தனிமை, பதற்றம் மற்றும் மன அழுத்தம் போன்ற பல்வேறு உணர்வுகளை ஏற்படுத்துகிறது. இந்த நேரத்தில் நாம் சந்திக்கும் மிகவும் பொதுவான உளவியல் பிரச்னையானது உற்சாகமான இந்தக் காலக்கட்டத்தை ‘நாம் தவற விட்டுவிடுவோமோ’ என்ற பயம்தான்.

சமூக ஊடகங்கள் ஏற்படுத்தும் பதற்றம்

இன்றைய டிஜிட்டல் உலகில், நாம் மற்றவர்களுடன் எவ்வாறு இணைகிறோம், பல்வேறு விஷயங்களை பகிர்ந்துகொள்கிறோம், தொடர்பு கொள்கிறோம் என்பதில் சமூக ஊடகங்கள் முக்கிய பங்கு வகிக்கின்றன. இருப்பினும், இது குழந்தைகள் மற்றும் இளம் பருவத்தினருக்கு, மன ரீதியாக பல்வேறு பாதிப்புகளை ஏற்படுத்தக்கூடும். இது FOMO என்று அழைக்கப்படுகிறது. அதாவது Fear of Miss out (Fomo). மற்றவர்களைப் போல நாம் மகிழ்ச்சியாக இருக்க முடியவில்லையே, அதை நாம் தவறவிடுவோமோ என்ற பயம்.

நீங்கள் எப்போதாவது இன்ஸ்டாகிராம், டிக்டாக் அல்லது ஸ்நாப்சாட்டை ஸ்க்ரோல் செய்து, மற்றவர்கள் உங்களைவிட அதிகமாக வேடிக்கை பார்ப்பதாகவோ அல்லது அதிகமாக சாதிப்பதாகவோ உணர்ந்திருந்தால், இது உங்களுக்கான உணர்வு மட்டும் இல்லை. நீங்கள் தனியாக இல்லை என்பதை உணருங்கள். சமூக ஊடக அனுபவத்தில் ஒன்றைத் தவறவிடுவோம் என்ற பயம் ஒரு பெரிய பகுதியாக இருக்கிறது. மேலும் அது எவ்வாறு செயல்படுகிறது, அதனை எவ்வாறு கையாள்வது என்பதைப் புரிந்து கொள்வது முக்கியம்.

இந்த பயம் என்பது நம்மைவிட மற்றவர்கள் மிகவும் உற்சாகமான, நிறைவான அல்லது அர்த்தமுள்ள ஒன்றை அனுபவிக்கிறார்கள் என்பதை நாம் உணரும்போது எழும் பதற்றம் அல்லது பாதுகாப்பின்மையைக் குறிக்கிறது. தற்போது சமூக ஊடகங்கள் விடுமுறை கால சுற்றுலா, ஆடம்பரமான பயணங்கள் மற்றும் பல்வேறு குடும்ப நிகழ்வுகள் உள்ளிட்ட பதிவுகளால் நிரம்பி வழிகின்றன. இது நம்மிடம் இயலாமை உணர்வை ஏற்படுத்தக்கூடும், மேலும் ‘சிறந்த’ விடுமுறை அனுபவத்தை நாம் இழந்துவிட்டதாக உணர வைக்கும்.

சமூக ஊடகங்களில் FOMO எவ்வாறு நிகழ்கிறது?

1.சிறந்தவற்றை மட்டுமே காட்டும் சமூக ஊடகங்கள்: சமூக ஊடகங்கள் மக்களின் வாழ்க்கையின் சிறந்த பகுதிகளை மட்டுமே காட்டும் படங்கள் மற்றும் பதிவுகளால் நிரம்பியுள்ளன. அவர்களின் விடுமுறைகள், கொண்டாட்டங்கள் மற்றும் மகிழ்ச்சியான தருணங்கள் ஆகியவற்றைக் காண்கிறோம். ஆனால், நீங்கள் பார்க்காதது திரைக்குப் பின்னால் உள்ள போராட்டங்கள், சவால்கள் அல்லது சலிப்பூட்டும் அன்றாட பிரச்னைகளும் இருக்கும். இந்த ‘ஹைலைட் ரீல்கள்’ மற்ற அனைவரும் உங்களை விட மிகவும் உற்சாகமான அல்லது சரியான வாழ்க்கையை வாழ்வது போல் தோன்றச் செய்யலாம்.இதுவே உங்களுக்கு பய உணர்வைத் தூண்டச் செய்யும்.

2.உங்களை மற்றவர்களுடன் ஒப்பிடுதல்: உங்கள் நண்பர்கள் அல்லது ஆன்லைனில் பிரபலமானவர்களுடன் உங்களை ஒப்பிட்டுப் பார்த்து அந்த வலையில் விழுவது என்பது எளிதான காரியம். மற்றவர்கள் சாதனை படைக்கும்போது, ​​வேடிக்கை பார்க்கும்போது அல்லது ஒரு குறிப்பிட்ட வழியில் செல்லும்போது, ​​உங்கள் வாழ்க்கை ஏன் அந்த மாதிரியாக இல்லை என்று யோசிப்பது இயல்பானது. இந்த ஒப்பீடு உங்களிடம் இயலாமையை ஏற்படுத்தி, ‘சரியான’ அனுபவங்களை நீங்கள் இழக்கிறீர்கள் என்ற உணர்வை உங்களுக்கு ஏற்படுத்தும்.

3.தொடர்ந்து செயல்பட அழுத்தம்: சமூக ஊடகங்கள், நீங்கள் தொடர்ந்து பிசியாகவோ அல்லது சுறுசுறுப்பாகவோ இருக்க வேண்டும் என்ற உணர்வை ஏற்படுத்தும். நண்பர்களின் நிகழ்வுகள், விருந்துகள் அல்லது பயணங்கள் பற்றி இதில் பதிவேற்றப்பட்டு இருப்பதை பார்ப்பது என்பது, நீங்கள் உண்மையில் செய்ய விரும்பாவிட்டாலும் கூட, அதைச் செய்ய உங்களைத் தூண்டும். அது முடியாத நிலையில் அது சோர்வாகவும் மன அழுத்தமாகவும் மாறலாம்.

4.உடனடி மனநிறைவு: உலகில் என்ன நடக்கிறது என்பதை உடனுக்குடன் தெரிந்துகொள்ள சமூக ஊடகங்கள் நமக்கு உதவுகின்றன. நாம் உடனுக்கு உடன் பல்வேறு விஷயங்களை பார்க்கலாம். அதாவது ‘தொடர்ந்து செயல்பட’ வேண்டும் என்ற அழுத்தம் இன்னும் தீவிரமாக உணரப்படலாம். மற்றவர்கள் உற்சாகமான வாழ்க்கையை வாழ்வதைப் பார்த்துப் பழகிய நீங்கள், உங்கள் வாழ்க்கை குறைவான உற்சாகமாக உணர்ந்தால், அது பொறுமையின்மை அல்லது விரக்திக்கு வழிவகுக்கும்.

பய உணர்வு உங்களை எவ்வாறு பாதிக்கிறது?

சில நேரங்களில் தனிமையில் இருப்பது இயல்பானது என்றாலும், இந்த பய உணர்வு உணர்ச்சிரீதியான விளைவுகளை ஏற்படுத்தும். அதனால் ஏற்படும் பாதிப்புகள் வருமாறு:

*பதற்றம் அதிகரிப்பு: நீங்கள் போதுமான அளவு செய்யவில்லை அல்லது உங்கள் நண்பர்களை விட பின்தங்கியிருப்பதாக உணரலாம்.

*தாழ்வு மனப்பான்மை: உங்களை மற்றவர்களுடன் ஒப்பிட்டுப் பார்க்கையில், நீங்கள் எதையும் செய்யவில்லை என்றோ அல்லது உங்கள் வாழ்க்கை அவ்வளவு சுவாரஸ்யமாக இல்லை என்றோ உணர வைக்கும்.

*தனிமை: நம்மை மேலும் தனிமைப்படுத்தப்பட்டதாக உணர வைக்கும்.

*மன அழுத்தம் மற்றும் சோர்வு: நீங்கள் இன்னும் அதிகமாகச் செய்ய வேண்டும் என்று நீங்கள் நினைக்கலாம் - அதிக நிகழ்வுகளுக்குச் செல்ல வேண்டும், அதிக படங்களை பதிவிட வேண்டும் அல்லது அதிக பயணம் செல்ல வேண்டும் - இவை உங்களுக்கு மன அழுத்தம் மற்றும் சோர்வை ஏற்படுத்தும்.

*யதார்த்தத்திலிருந்து விலகுதல் - சில நேரங்களில், மற்றவர்கள் ஆன்லைனில் என்ன செய்கிறார்கள் என்பதில் அதிக கவனம் செலுத்துவது என்பது உங்களை யதார்த்த வாழ்வில் இருந்து உங்களை விலக்கி வைக்கும்.

*சீர்குலைந்த கவனம் மற்றும் படைப்பாற்றல்: நீங்கள் எதை இழக்கிறீர்கள் என்பதைப் பற்றி தொடர்ந்து யோசித்துக்கொண்டிருந்தால், தற்போதைய தருணத்தில் கவனம் செலுத்துவது கடினமாக இருக்கலாம். இந்த கவனச்சிதறல் பள்ளியிலோ, வேலையிலோ அல்லது உங்கள் தனிப்பட்ட வாழ்க்கையிலோ பணிகளை முடிப்பதை மிகவும் கடினமாக்கும். ஏனெனில் உங்கள் மனம் மற்றவர்கள் என்ன செய்கிறார்கள் என்பதில் மட்டுமே செல்லும்.

*சமூக ஊடகங்களின் அதிகப்படியான பயன்பாடு: மக்கள் சமூக ஊடகங்களில் அதிக நேரத்தைச் செலவிடும் நிலைக்குத் தள்ளப்படலாம். இந்த அதிகப்படியான பயன்பாடு மேற்கண்ட விளைவுகளை மோசமாக்கி, தொழில்நுட்பத்துடன் ஆரோக்கியமற்ற உறவுக்கு வழிவகுக்கும். மன அழுத்தம் மற்றும் பதற்றத்தை மேலும் அதிகரிக்கும்.

சமூக ஊடகங்களில் உங்கள் பய உணர்வை எவ்வாறு நிர்வகிப்பது?

1.சமூக ஊடகங்களை தொடர்ந்து பார்க்காதீர்கள்: ஆன்லைனில் நீங்கள் அதிகம் இருப்பதாக உணர்ந்தால், சற்று இடைவெளி எடுத்துக் கொள்ளுங்கள். அருகில் உள்ளவர்களிடம் சிறிது நேரம் செலவிட்டு உங்களுக்கு புத்துணர்ச்சி ஏற்படுத்திக் கொள்ளுங்கள்.

2.உங்களை நீங்களே போற்றுங்கள்: உங்களிடம் இல்லாததை விட, உங்களிடம் உள்ளவற்றில் கவனம் செலுத்துவது உங்கள் மனநிலையை மாற்ற உதவும். உங்கள் வாழ்க்கையில் உள்ள நல்ல விஷயங்களை நன்றியுடன் நினைத்துப் பாருங்கள் - அது உங்கள் உறவுகள், உங்கள் உடல்நலம் அல்லது உங்கள் தனிப்பட்ட சாதனைகள் என எதுவாக இருந்தாலும் சரி.

3.உங்கள் சொந்த அனுபவங்கள் குறித்து மகிழ்ந்திடுங்கள்: மற்றவர்கள் என்ன செய்கிறார்கள் என்பதில் கவனம் செலுத்துவதற்குப் பதிலாக, உங்கள் சொந்த அனுபவங்களை நினைத்துப் பார்த்து மகிழ்ச்சியாக இருங்கள். உங்களுக்கு மகிழ்ச்சியைத் தரும் செயல்பாடுகளைத் திட்டமிடுங்கள். அது அன்புக்குரியவர்களுடன் நேரத்தைச் செலவிடுவது, பொழுதுபோக்குகள் அல்லது ஓய்வெடுப்பது என எதுவாக இருந்தாலும் சரி. உங்கள் வாழ்க்கை நிறைவாக இருக்க, வேறு யாருடைய வாழ்க்கையையும் ஒப்பிட வேண்டிய அவசியமில்லை.

4.நினைவில் கொள்ளுங்கள், சமூக ஊடகங்கள் உண்மையான வாழ்க்கை அல்ல.: பொதுவாக ஒவ்வொருவரும் தங்கள் வாழ்க்கையில் நடந்த சிறந்த தருணங்களை மட்டுமே ஆன்லைனில் பதிவிடுகிறார்கள் என்பதை நினைவில் கொள்ளுங்கள். சமூக ஊடகங்களில் நீங்கள் பார்ப்பது பெரும்பாலும் ஒருவரின் வாழ்க்கையின் சுருக்கமான பதிப்பாகும், முழுப் படம் அல்ல. அனைவருக்கும் பிரச்னைகள் உள்ளன. மற்றவர்கள் என்ன செய்கிறார்கள் என்பதைப் பற்றி கவலைப்படாமல் உங்கள் உறவினர்கள் மற்றும் நண்பர்களுடன் மகிழ்ச்சியாக நேரத்தை செலவிடுங்கள்.

5.ஆரோக்கியமான எல்லைகளை வகுத்துக் கொள்ளுங்கள்: நிஜ வாழ்க்கையில் உங்களுக்கு மகிழ்ச்சியைத் தரும் செயல்களை மேற்கொள்ளுங்கள். ஸ்க்ரோலிங் செய்வதன் மூலம் நேரத்தை செலவிடுவது என்பது மிகவும் எளிது. ஆனால் அதிக நேரம் ஆன்லைனில் இருப்பது என்பது உங்களது பய உணர்வை மேலும் அதிகரிக்கச் செய்யும்.

6.உண்மையான வழிகளில் மற்றவர்களுடன் இணையுங்கள்: சமூக ஊடகங்கள் நம்மை இணைந்திருப்பதை உணர வைக்கும் அதே வேளையில், உண்மையான, நேரடி தொடர்புகள் ஈடுசெய்ய முடியாதவை. நேரிலோ அல்லது இதயப்பூர்வமான அழைப்பின் மூலமாகவோ அன்புக்குரியவர்களைத் தொடர்புகொண்டு, உண்மையான, தற்போதைய தொடர்புகளை உருவாக்குவதில் கவனம் செலுத்துங்கள்.

7.உங்கள் மீது அன்பு செலுத்துங்கள்: உங்கள் மீது நீங்கள் அன்பு செலுத்துங்கள். விடுமுறை காலத்தில் நீங்கள் செல்லும் பயணங்களே மிகச் சிறப்பானது என்பதை உணருங்கள். மேலும் அதில் நீங்கள் மகிழ்ச்சி அடையுங்கள்.

8.நீங்கள் நம்பும் ஒருவரிடம் பேசுங்கள்: பய உணர்வு உங்களுக்கு மனச்சோர்வை ஏற்படுத்தினாலோ அல்லது பதற்றப்படுத்தினாலோ, பெற்றோர், நண்பர் அல்லது ஆலோசகரிடம் கலந்து பேசுங்கள். அவர்கள் இந்த விஷயங்களை வேறொரு கண்ணோட்டத்தில் பார்க்க உங்களுக்கு உதவுவார்கள். நீங்கள் தனிமையில் அல்லது மன அழுத்தத்தில் இருக்கும்போது அவர்கள் உங்களுக்கு ஆதரவு அளிப்பார்கள்.

9.ஒவ்வொரு தருணங்களும் மகிழ்ச்சி: உங்கள் வாழ்க்கையில் நடக்கும் ஒவ்வொரு சிறு சிறு தருணங்களும் மிகவும் மகிழ்ச்சியானது என்பதை உணருங்கள். குடும்பத்துடன் அமைதியான உணவைப் பகிர்ந்து கொள்வது, குளிர்கால நடைப்பயணத்தை அனுபவிப்பது அல்லது கடந்த ஆண்டைப் பற்றி சிந்திக்க நேரத்தைச் செலவிடுவது போன்றவை. இந்த தருணங்கள் நீங்கள் ஆன்லைனில் காணக்கூடிய பிரமாண்டமான கொண்டாட்டங்களைப் போலவே மதிப்புமிக்கவை.

மன பயம் தொடர்பான விஷயங்களைப் புரிந்துகொள்வது அவசியம்!

சமூக ஊடகங்கள் மற்றவர்களுடன் இணைவதற்கும் பகிர்ந்து கொள்வதற்கும் ஒரு சிறந்த வழியாக இருக்கலாம். ஆனால் அது வாழ்க்கையின் ஒரு பகுதி மட்டுமே என்பதை நினைவில் கொள்வது அவசியம். மன பயம் என்பது உங்கள் மன ஆரோக்கியத்தைப் பாதிக்கிறது என்று நீங்கள் எப்போதாவது உணர்ந்தால், நீங்கள் அதில் இருந்து பின்வாங்குங்கள். உண்மையான மதிப்பு என்பது உங்களுக்கு நீங்கள் உண்மையாக இருப்பது, அர்த்தமுள்ள அனுபவங்களில் கவனம் செலுத்துவது மற்றும் நிஜ உலகில் நேர்மறையான உறவுகளை உருவாக்குவது ஆகியவையே மன பயமில்லாத சிறந்த மகிழ்ச்சியைத் தரும்.