ஸ்கோலியோசிஸ்…

நன்றி குங்குமம் டாக்டர்

நெளி முதுகு விழிப்புணர்வு!

முதுகெலும்பு அறுவைசிகிச்சை நிபுணர் வி. முரளிதரன்

நெளி முதுகு எனப்படும் ஸ்கோலியோசிஸ் [scoliosis] என்பது முதுகெலும்பு பாதிக்கப்பட்ட ஒரு நிலை. இது பொதுவாக இளமைப் பருவத்தில் விரைவான வளர்ச்சியின் போது ஏற்படும் அசாதாரண பக்கவாட்டு வளைவால் ஏற்படுகிறது. பக்கவாட்டு வளைவு முதுகெலும்பு, பின்புறத்திலிருந்து பார்க்கும்போது ஒரு நேர்கோடுபோல் அல்லாமல், எஸ் (”S”) அல்லது சி (”C”) வடிவத்தைப் போல காட்சியளிக்கும்.

இதற்கு மரபணு, சுற்றுச்சூழல் அம்சங்கள் உட்பட பல்வேறு காரணிகள் இருக்கலாம். குழந்தைகளிடமும் இளம் பருவத்தினரிடையேயும் நெளி முதுகு (ஸ்கோலியோசிஸ்) அதிக அளவில் ஏற்படுவது ஒப்பீட்டளவில் முன்பைவிட இப்போது 3.1%. அதிகமாக இருப்பதாக ஆய்வுகள் குறிப்பிடுகின்றன. பெண்கள், அதிக எடை கொண்ட குழந்தைகள் ஆகியோருக்கு நெளி முதுகு (ஸ்கோலியோசிஸ்) உருவாக்கும் வாய்ப்புகள் அதிகம் உள்ளது.

இளமைப் பருவத்தில் வேகமான வளர்ச்சி, முதுகெலும்பு வளையும் நிலையை மோசமாக்குகிறது. நெளி முதுகின் (ஸ்கோலியோசிஸ்) ஆரம்ப கட்டங்களின்போது, வலி அல்லது பிற வெளிப்படையான அறிகுறிகள் இல்லாமல் இருக்கலாம். இதனால் பல குடும்பங்களில் குழந்தைகளிடையே ஏற்படும் சிறிய வேறுபாடுகளை கவனிக்காமல் நாம் தவற விட வழிவகுக்கிறது. முதுகெலும்பு வளைவு என்பது, சீரற்ற தோள்கள், இடுப்பு நிலையில் வேறுபாடுகள் அல்லது முன்னோக்கி வளைக்கும் போது விலா எலும்பின் முக்கியத்துவம் போன்ற நுட்பமான சமச்சீரற்ற தன்மைகளை ஏற்படுத்தலாம். இதற்கு, சிகிச்சையளிக்கப்படாமல் இருந்தால் இது காலப்போக்கில் மோசமடையும்.

கடுமையான நெளி முதுகு (ஸ்கோலியோசிஸ்) நுரையீரல் செயல்பாட்டை பாதித்து நாள்பட்ட அசௌகரியத்தை ஏற்படுத்தலாம். அத்துடன் இது அதிகரிக்கும்போது சிக்கலான அறுவை சிகிச்சை தேவைப்படும் சூழல் உருவாகலாம். இவை அனைத்தும் அதிக ஆபத்துகளையும் செலவுகளையும் ஏற்படுத்துகின்றன. ஆரம்பகாலத்திலேயே

இப்பிரச்னைகளுக்கு அறுவை சிகிச்சை அல்லாமல், தகுந்த சிகிச்சை அளித்தால் சிக்கல்களைத் தவிர்க்கலாம்.

செலவுகளையும் குறைக்கலாம்.நெளி முதுகு எனப்படும் ஸ்கோலியோசிஸ் பாதிப்பை ஆரம்பகாலத்திலேயே கண்டறிவது குறித்தும், அதற்கு அறுவை சிகிச்சை அல்லாத மேலாண்மை குறித்தும், விழிப்புணர்வைப் பள்ளி வயது குழந்தைகளிடையேயும் அவர்களது பெற்றோரிடையேயும் ஏற்படுத்துவது முக்கியம். இது பாதிப்பு அதிகமாவதற்கு முன்பு பெற்றோர்கள் முன்கூட்டியே சிகிச்சைகளைச் செய்யவும், அறுவை சிகிச்சை முறைகளை தடுக்கவும் உதவுவதுடன், வாழ்க்கைத் தரத்தைப் பாதுகாக்கிறது.

மாணவர்கள், ஆசிரியர்கள், பெற்றோர் ஆகியோர் ஆரம்பகால அறிகுறிகளை அடையாளம் காணவும், விழிப்புணர்வைப் பரப்புவதற்கும் மருத்துவர்களுடன் ஒத்துழைத்து செயல்படுவதிலும், பள்ளியில் பரிசோதனை முகாம்களை நடத்துவதிலும் பள்ளி நிர்வாகங்கள் முக்கிய பங்கு வகிக்கலாம். இது குறித்து மாணவர்களுக்கு விழிப்புணர்வை ஏற்படுத்துவது பாதிப்பைக் குறைக்க உதவுகிறது. இப்படிச் செய்வதால், தோற்றத்தில் ஏற்படும் வேறுபாடுகளைக் கவனிக்கும் குழந்தைகள் அவற்றை மறைப்பதற்குப் பதிலாக சிக்கல்களைப் பற்றி விவாதித்து, சிகிச்சை பெற்று குணம் அடைய முடியும்.

பெற்றோர்-ஆசிரியர் சந்திப்புகள் நடத்தப்படும் போது இந்த பாதிப்பின் அறிகுறிகள் பற்றிய எளிய தகவல்களைப் பகிர்ந்து கொள்ளலாம். அதன் மூலம் எச்சரிக்கை தகவல்களை வழங்குவதற்கும், குழப்பத்தைக் குறைக்கவும், பரிசோதனைகள் குறித்து விளக்கவும் வாய்ப்பை அதிகரிக்க முடியும். ஆரோக்கியமான நிலை குறித்தும், சீரற்ற தோள்பட்டை நிலை

குறித்தும் சித்தரிக்கும் காட்சிகளைக் காட்டி, நம் தோற்றத்தில் ஏற்படும் சீரற்ற தன்மை குறித்து விளக்கினால் அது மாணவர்களிடையே விழிப்புணர்வை ஏற்படுத்த உதவும்.

பரிசோதனைக்கான சிறந்த காலம் 10 முதல் 14 வயது ஆகும். இது வளர்ச்சி துரிதப்படுத்தப்படும் வயது ஆகும். இந்த வயதுகளில்தான் நெளி முதுகு (ஸ்கோலியோசிஸ்) பிரச்னை ஏற்பட வாய்ப்புகள் மிக அதிகம். இளம் பருவத்திற்கு முந்தைய, இளம் பருவ வளர்ச்சியின் வேகத்துடன் தொடர்புடைய காலம் இதுவாகும். முன்னோக்கிய வளைவு பரிசோதனை போன்ற எளிய நுட்பங்களை பள்ளி செவிலியர்கள் அல்லது உடற்கல்வி ஆசிரியர்களுக்குக் கற்பிக்கலாம். இதன் மூலம் அவர்கள் மாணவர்களுக்கு ஏற்படும் பாதிப்பைக் கண்டறிந்து, உடனடியாக மருத்துவர்களின் ஆலோசனைகளுக்கு அறிவுறுத்த முடியும்.

இந்த முயற்சிகள் வாழ்நாள் முழுவதும் ஆரோக்கியமான முதுகெலும்புக்கான பழக்கவழக்கங்களையும் நல்ல தோற்றத்தையும் ஊக்குவிக்க உதவும். இத்தகைய வாழ்வியல் சார்ந்த பழக்கவழக்கங்கள் இன்றைய உலகில் முக்கியமானவை. குழந்தைகள் நவீன கைப்பேசி (ஸ்மார்ட்போன்), மடிக்கணினி போன்ற பல்வேறு சாதனங்களைப் பயன்படுத்தும்போது சரியான நிலையில் அமராமல் பயன்படுத்துவது அதிகரித்து வருகிறது.

இதனால் மாணவர்கள் தங்களுடைய முதுகை சீராகப் பராமரிப்பது எப்படி என்பது குறித்து அன்றாடம் பின்பற்ற வேண்டிய எளிய விஷயங்களைக் கற்றுக் கொடுப்பது அவசியமாகிறது. இந்த விழிப்புணர்வை ஏற்படுத்தி மாணவர்களை வழிநடத்துவது, அவர்களது முதுகெலும்பில் உண்டாகும் அழுத்தத்தைக் குறைக்க உதவுகிறது. இது காரணம் கண்டறியப்படாத நெளி முதுகு (இடியோபாடிக் ஸ்கோலியோசிஸ்) பாதிப்பைத் தடுக்காது என்றாலும், இது ஒட்டுமொத்த தசைக்கூட்டு ஆரோக்கியத்திற்கு உதவுகிறது.

நெளி முதுகு குறித்த தவறான தகவல்கள், நம்மிடையே பதற்றம் ஏற்படுவதற்கோ அல்லது தேவையின்றி மருத்துவமனைக்குச் செல்வதற்கோ வழிவகுக்கும். எனவே பின்பற்ற வேண்டிய நடைமுறைகள் குறித்தும், பரிசோதனைகள் குறித்தும் தெளிவான ஆரம்பநிலை வழிகாட்டுதல் அவசியம். நெளி முதுகு பாதிப்பு இருப்பது அடையாளம் காணப்பட்டால், பாதிப்புக்குள்ளான மாணவர்கள் குறித்த தனிப்பட்ட தகவல்களும் ரகசியத்தன்மையும் மதிக்கப்பட வேண்டும். மேலும், முக்கிய தகவல்களை பெற்றோர் அல்லது பாதுகாவலர்கள், மருத்துவர்களுடன் மட்டுமே பகிர வேண்டும். இது அவர்களுக்கு பாதுகாப்பான உணர்வையும், செளகரியத்தையும் அளிக்கும்.

ஆரம்பகாலத்திலேயே நெளி முதுகு பாதிப்பு இருப்பதை கண்டறிவதன் மூலம், பிரேசிங் (வளைவை சீராக்க புற ஆதரவு அளித்தல் - bracing) போன்ற பாரம்பரிய சிகிச்சையை மேற்கொண்டு பாதிப்பு அதிகமாவதைக் குறைக்கிறது. முதுகெலும்பு ஆரோக்கியம் பற்றிய விவாதங்களை இயல்பாக்குவதன் மூலம், பெற்றோருக்கும் குழந்தைகளுக்கும் ஆலோசனை வழங்குவது, அவர்கள் எதிர்கொள்ளக்கூடிய சுயமரியாதை சவால்களை நிவர்த்தி செய்ய உதவுகிறது. மொத்தத்தில், நமது நாட்டின் எதிர்காலமாக இருக்கும் இளைஞர்கள் மற்றும் இளம் பருவத்தினரிடையே, நெளி முதுகு (ஸ்கோலியோசிஸ்) பாதிப்பை ஆரம்பத்திலேயே கண்டறிந்து, திறம்பட சிகிச்சை அளிக்கப்படுவதை உறுதிசெய்வதும், குழந்தைகள் வளரும்போது அவர்களின் ஆரோக்கியத்தைப் பாதுகாப்பதும் நமது பொறுப்பாகும்.