காதல் ஜோடி விஷம் குடித்து தற்கொலை தண்டராம்பட்டு அருகே சோகம் பெற்றோர் எதிர்ப்பால் விபரீதம்

தண்டராம்பட்டு, ஆக.29: தண்டராம்பட்டு அருகே பெற்றோர் எதிர்ப்பால் காதல் ஜோடி விஷம் குடித்து தற்கொலை செய்து கொண்ட சம்பவம் பரபரப்பை ஏற்படுத்தி உள்ளது. திருவண்ணாமலை மாவட்டம், தண்டராம்பட்டு அடுத்த ராயண்டபுரம் ஊராட்சியை சேர்ந்தவர் மணி மகன் மோகன்(26). கூலி வேலை செய்து வந்தார். இவரும் அதே பகுதியை சேர்ந்த பிச்சைக்காரன் மகள் பவானி(24) என்பவரும் பல ஆண்டுகளாக காதலித்து வந்துள்ளனர். இருவரும் வெவ்வேறு சமூகத்தை சேர்ந்தவர்கள் என்பதால் இவர்களது காதலுக்கு பெற்றோர் எதிர்ப்பு தெரிவித்துள்ளனர். இதற்கிடையில், பவானியின் பெற்றோர் அவருக்கு திருமணம் செய்வதற்காக வேறு இடத்தில் மாப்பிள்ளை பார்த்துள்ளனர். அதனை ஏற்க மறுத்த பவானி கடந்த 20ம் தேதி வீட்டில் இருந்த பூச்சி மருந்தை எடுத்து குடித்து தற்கொலைக்கு முயன்றார்.

இதை பார்த்து அதிர்ச்சி அடைந்த குடும்பத்தினர் அவரை மீட்டு திருவண்ணாமலை அரசு மருத்துவக் கல்லூரி மருத்துவமனையில் சேர்த்தனர். ஆனால், அங்கு தீவிர சிகிச்சை அளித்தும் பலனின்றி நேற்று முன்தினம் பவானி உயிரிழந்தார். இதையறிந்து மனவேதனை அடைந்த மோகனும் பூச்சி மருந்தை குடித்து விட்டு வீட்டின் அருகே மயங்கி கிடந்தார். அவரை அப்பகுதி மக்கள் மீட்டு திருவண்ணாமலை அரசு மருத்துவக் கல்லூரி மருத்துவமனையில் சேர்த்தனர். அங்கு சிகிச்சை பலனின்றி நேற்று மதியம் மோகனும் பரிதாபமாக உயிரிழந்தார். இதுகுறித்து தண்டராம்பட்டு போலீசார் வழக்கு பதிந்து விசாரணை நடத்தி வருகின்றனர். காதல் ஜோடி விஷம் குடித்து தற்கொலை செய்து கொண்ட சம்பவம் அப்பகுதியில் பெரும் சோகத்தை ஏற்படுத்தி உள்ளது.