தீபாவளி பண்டிகையை முன்னிட்டு தாம்பரம்-செங்கோட்டைக்கு இன்று சிறப்பு ரயில்

நெல்லை, அக். 17: தீபாவளி பண்டிகையை ஒட்டி தெற்கு ரயில்வே பல்வேறு நகரங்களுக்கு இடையே சிறப்பு ரயில்களை இயக்கி வருகிறது. கூட்ட நெரிசலை தவிர்க்க தாம்பரம் - செங்கோட்டை இடையே இருமார்க்கத்திலும் சிறப்பு ரயில் இயக்கப்பட உள்ளது. இந்த ரயிலானது (எண்.06013) தாம்பரத்தில் இருந்து இன்று 17ம்தேதி இரவு 7.30 மணிக்கு புறப்பட்டு, நாளை 18ம்தேதி காலை 7.30 மணிக்கு செங்கோட்டை சென்றடைகிறது. மறுமார்க்கத்தில் செங்கோட்டை- தாம்பரம் எக்ஸ்பிரஸ் (எண்.06014) வரும் 20ம்தேதி செங்கோட்டையில் இருந்து இரவு 8.45 மணிக்கு புறப்பட்டு, 21ம்தேதி காலை 9.45 மணிக்கு தாம்பரம் சென்றடைகிறது.

இந்த ரயில் தாம்பரத்தில் இருந்து செங்கல்பட்டு, மேல்மருவத்தூர், விழுப்புரம், விருதாச்சலம், அரியலூர், ரங்கம், திருச்சி, திண்டுக்கல், மதுரை, விருதுநகர், சிவகாசி, வில்லிபுத்தூர், ராஜபாளையம், சங்கரன்கோவில், கடையநல்லூர், தென்காசி வழியாக செங்கோட்டை சென்றடையும். இந்த ரயிலில் ஒரு ஏசி சேர்கார் பெட்டி, 14 சேர்கார் பெட்டிகள், 4 பொதுப்பெட்டிகள், 2 மாற்றுத் திறனாளிகள் பெட்டி இடம் பெற்றிருக்கும். தீபாவளிக்கு தென்மாவட்டங்களுக்கு வந்து செல்லவும், தீபாவளி முடிந்து சென்னை செல்லவும் தெற்கு ரயில்வே அறிவித்துள்ள சேர்கார் ரயிலால் பயணிகள் மகிழ்ச்சி அடைந்துள்ளனர்.