திருச்செந்தூரில் இயல்பு நிலை திரும்பியது

திருச்செந்தூர், டிச.1:கடந்த 3 தினங்களாக இடைவிடாது பெய்த மழை நேற்று சற்று ஓய்வுபெற்றதால் திருச்செந்தூரில் இயல்பு நிலைக்கு திரும்பியது. டிட்வா புயல் எதிரொலியாக தென்மேற்கு வங்க கடலோரம் கடந்த சில தினங்களாக ஆங்காங்கே கனமழையும், இடைவிடாது மழையும் பெய்தது. திருச்செந்தூர் சுற்றுவட்டார பகுதியில் பெய்த மழையால் பொதுமக்களின் இயல்பு வாழ்க்கை பாதிப்படைந்தது.

இந்நிலையில் நேற்று முன்தினம் மாலைக்கு பிறகு மழை சற்று ஓய்ந்தது. நேற்று காலை முதல் மழை இன்றி வெயில் தென்பட தெரிந்ததால் பொதுமக்களில் இயல்பு வாழ்க்கை சீரானது. இதையடுத்து திருச்செந்தூர் சுப்பிரமணிய சுவாமி கோயிலுக்கு நேற்று அதிகாலை முதலிலே திரளான பக்தர்கள் வந்து சுவாமி தரிசனம் செய்து வருகின்றனர்.

இதுபோல் வைகுண்டம் அணையின் தென்காலின் கடைசி குளமான திருச்செந்தூர் ஆவுடையார்குளம் தொடர் மழை மற்றும் நீர்வரத்தினால் முழுவதும் நிரம்பிக் கொள்ளளவை எட்டி உபரி நீர் கடலுக்குச் சென்று வருகிறது.