பூண்டி ஏரியில் இருந்து வெளியேறும் உபரிநீர் 1000 கன அடியாக குறைப்பு: அதிகாரி தகவல்

திருவள்ளூர், அக்.31: திருவள்ளூர் மாவட்டத்தில மழை குறைந்ததால், பூண்டி ஏரியில் இருந்து வெளியேறும் உபரிநீர் 2000 கன அடியில் இருந்து மீண்டும் 1000 கன அடியாக குறைக்கப்பட்டுள்ளது என அதிகாரி ஒருவர் தெரிவித்தார்.

சென்னை மக்களின் குடிநீர் ஆதாரமாக இருக்கும் நீர்த்தேக்கங்களில், பருவமழை தொடங்கி, தொடர்ந்து கடந்த சில நாட்களாக பெய்த மழை காரணமாக நீர் இருப்பு உயர்ந்து வருவதாக நீர்வளத்துறை அதிகாரிகள் தெரிவித்துள்ளனர்.

அதன்படி, கடந்த சில நாட்களாக தொடர்ந்து திருவள்ளூர் மாவட்டத்தில் பரவலாக விட்டு, விட்டு கனமழை மற்றும் மிதமான மழை பெய்து வருகிறது.

இந்த, மழையின் காரணமாக சென்னை மக்களின் குடிநீர் ஆதாரமாக இருக்கும் நீர் தேக்கங்கள் நிரம்பி வருவதால், நேற்று முன்தினம் மாலை 6 மணி நிலவரப்படி பூண்டி சத்தியமூர்த்தி சாகர் நீர்த்தேக்கத்தின் 35 அடி மொத்த உயரத்தில் 33.07அடி உயரத்திற்கும், மொத்த கொள்ளளவான 3231 மில்லியன் கன அடியில் தற்போது தண்ணீர் இருப்பு 2541 மில்லியன் கன அடியாக உள்ளது. ஏரிக்கு வினாடிக்கு 1960 கன அடி மழைநீர் வந்து கொண்டுள்ளது. இந்நிலையில், சென்னை மாநகர மக்களின் குடிநீருக்காக இணைப்புக் கால்வாய் மூலமாக 600 கன அடியும், பேபி கால்வாய் வழியாக 47 கன அடியும் அனுப்பி வைக்கப்படுகிறது. இதனைத்தொடர்ந்து, நீர்த்தேக்கத்தில் இருந்து வினாடிக்கு 2000 கன அடி வீதம் உபரிநீர் வெளியேற்றப்பட்டு, 1000 ஆக குறைத்து வெளியேற்றப்பட்டு வருகிறது.

அந்த வகையில், செம்பரம்பாக்கம் ஏரியின் 24 அடி மொத்த உயரத்தில் 21.38 அடி உயரத்திற்கும், மொத்த கொள்ளளவான 3645 மில்லியன் கன அடியில் தற்போது தண்ணீர் இருப்பு 2955 மில்லியன் கன அடியாக உள்ளது. ஏரிக்கு நீர்வரத்து வினாடிக்கு 220 கன அடியாகவும், சென்னை மாநகர மக்களின் குடிநீருக்காக வினாடிக்கு 165 கன அடி தண்ணீர் அனுப்பி வைக்கப்படுகிறது. மேலும், ஏரியிலிருந்து வினாடிக்கு 100 கன அடி வீதம் உபரிநீர் வெளியேற்றப்பட்டு வருகிறது. புழல் ஏரியின் 21.20 அடி மொத்த உயரத்தில் 18.73 அடி உயரத்திற்கும், மொத்த கொள்ளளவான 3300 மில்லியன் கன அடியில் தற்போது தண்ணீர் இருப்பு 2757 மில்லியன் கன அடியாக உள்ளது.

ஏரிக்கு நீர்வரத்து வினாடிக்கு 250 கன அடியாக உள்ளது. இந்நிலையில், சென்னை மாநகர மக்களின் குடிநீருக்காக வினாடிக்கு 184 கன அடி விதம் தண்ணீர் அனுப்பி வைக்கப்படுகிறது. சோழவரம் ஏரியின் 18.86 அடி மொத்த உயரத்தில் 17.08 அடி உயரத்திற்கும், மொத்த கொள்ளளவான 1081 மில்லியன் கன அடியில் தற்போது தண்ணீர் இருப்பு 811 மில்லியன் கன அடியாக உள்ளது. ஏரிக்கு நீர்வரத்து வினாடிக்கு 302 கன அடியாக உள்ளது. கண்ணன்கோட்டை ஏரியின் 36.61 அடி மொத்த உயரத்தில் 34.90 அடி உயரத்திற்கும், மொத்த கொள்ளளவான 500 மில்லியன் கன அடியில் தற்போது தண்ணீர் இருப்பு 443 மில்லியன் கன அடியாக உள்ளது. ஏரிக்கு நீர்வரத்து வினாடிக்கு 90 கன அடியாகவும், சென்னை மாநகர மக்களின் குடிநீருக்காக வினாடிக்கு 2 கன அடி வீதம் தண்ணீர் அனுப்பி வைக்கப்படுகிறது. இவ்வாறு கொசஸ்தலை ஆறு வடிநிலக்கோட்ட செயற்பொறியாளர் ராதாகிருஷ்ணன் தெரிவித்தார்.