சோழவந்தான் ரயில் நிலையத்தில் மயிலை எக்ஸ்பிரஸ் ரயிலுக்கு நிறுத்தம் வழங்க வேண்டும்

சோழவந்தான், டிச. 1: சோழவந்தான் ரயில் நிலையத்தில், மீண்டும் மயிலாடுதுறை எக்ஸ்பிரஸ் ரயில் நின்று செல்ல நடவடிக்கை எடுக்க வேண்டும் என்று, ரயில்வே துறைக்கு பயணிகள் கோரிக்கை விடுத்துள்ளனர். மதுரை மாவட்டத்தில் உள்ள முக்கிய ரயில் நிலையங்களில் சோழவந்தானும் ஒன்று. இப்பகுதியில் உள்ள ஐம்பதுக்கும் மேற்பட்ட கிராமங்களைச் சேர்ந்த பொதுமக்கள், இங்கிருந்து பல்வேறு ஊர்களுக்கு ரயில்களில் சென்று வருகின்றனர். இங்குள்ள ரயில் நிலையத்தில் வைகை, குருவாயூர், நெல்லை, மைசூரு ஆகிய நான்கு எக்ஸ்பிரஸ் ரயில்களும், எக்ஸ்பிரஸ் கட்டணத்தில் இயக்கப்படும் 4 பயணிகள் ரயில்களும், சாதாரண கட்டணத்தில் இயக்கப்படும் ஒரு பாசஞ்சர் பயணிகள் ரயிலும் நின்று செல்கின்றன.

கொரோனா காலத்திற்கு முன், நெல்லையிலிருந்து ஈரோடு மற்றும் மயிலாடுதுறை இணைப்பு ரயில்கள் இயக்கப்பட்டன. இது நெல்லையிலிருந்து ஒரே ரயிலாக வந்து, திண்டுக்கல்லில் இருந்து மயிலாடுதுறைக்கு ஒரு ரயிலாகவும், ஈரோட்டிற்கு ஒரு ரயிலாகவும் பிரிந்து செல்லும். மறுமார்கத்தில் இதே போல் இரு ரயில்களாக வந்து திண்டுக்கல்லில் இணைந்து நெல்லை சென்றடையும். அப்போது இந்த ரயில்கள் சோழவந்தானில் நின்று சென்ற நிலையில், கொரோனா காலத்தில் நிறுத்தப்பட்டது. இந்த ரயில்கள், தற்போது இரண்டு ரயில்களாக செங்கோட்டையிலிருந்து ஈரோட்டுக்கு தனி ரயிலாகவும், மயிலாடுதுறைக்கு தனி ரயிலாகவும் இயக்கப்படுகிறது. இதில் ஈரோடு செல்லும் ரயில் மட்டும் சோழவந்தானில் நின்று செல்கிறது. ஆனால் மயிலாடுதுறை ரயில் நிற்பதில்லை.

இதனால் இப்பகுதியிலிருந்து தஞ்சாவூர், கும்பகோணம், மயிலாடுதுறை பகுதிகளுக்கு சென்று வர வழியின்றி, பொதுமக்கள் பரிதவித்து வருகின்றனர். எனவே ரத்து செய்யப்பட்ட மயிலாடுதுறை ரயிலை மீண்டும் சோழவந்தானில் நின்று செல்வதற்கான நடவடிக்கை எடுக்க வேண்டும் என்று பயணிகள் கோரிக்கை விடுத்துள்ளனர். இது குறித்து சமூக ஆர்வலர் சோழவந்தான் கண்ணன் கூறியதாவது: செங்கோட்டை முதல் மயிலாடுதுறை வரை (வண்டி எண்கள்-16847, 16848) இரு மார்க்கத்தில் இயக்கப்படும், இந்த ரயில்கள் தற்போது சோழவந்தான் ரயில் நிலையத்தில் நிற்பதில்லை.