மனிதர்களுக்கான சத்துக்களுக்கு மண்வளம் காப்பது அவசியம்: வேளாண் துறையினர் தகவல்

மதுரை, டிச. 1: மனித உயிர்களுக்கு தேவையான சத்துக்கள் சரிவிகித அளவில் கிடைக்க, மண் வளத்தை பாதுகாக்க வேண்டியது அவசியமாக இருக்கிறது.

இதன்படி மண் வளத்தை பாதுகாக்கும் வழிமுறைகள் குறித்து, வேளாண் அதிகாரிகள் கூறியதாவது: தமிழ்நாட்டில் செம்மண், கரிசல் மண், வண்டல் மண், களர் மண், உவர் மற்றும் அமிலத்தன்மை கொண்ட மண் என பல்வேறு வகைகளாக மண் வெவ்வேறு பகுதிகளில் பரவிக் காணப்படுகின்றது. இதன்படி செம்மண் 62 சதவீதமும், வண்டல் மண் 16.24 சதவீதமும், கரிசல் மண் 11.67 சதவீதமும், கடலோர உவர் மண் 7.57 சதவீதமும் உள்ளது. ஒவ்வொரு மண்ணிற்கும் பண்புகள் வேறுபட்டு இருக்கும் என்பதால், மண்வளத்தைக் கண்டறிந்து மேலாண்மை செய்வது மிகவும் அவசியம். மண்வளம் என்பது மண்ணின் வேதியியல், இயற்பியல் மற்றும் உயிரியல் பண்புகள் பயிர் செய்வதற்கு ஏற்றவாறும், தன்மை மாறாமல் பாதுகாத்துக் கொள்ளும் தன்மையுமாகும்.

குறிப்பாக, மண்வளத்தைக் கணக்கிட மண்ணின் கார, அமில நிலை, மின் கடத்துத் திறன் (உப்பின் அளவு), நேர்மின் அயனி பரிமாற்றுத் திறன், தழைச்சத்து, மணிச்சத்து, சாம்பல் சத்து, இரண்டாம் நிலை ஊட்டச்சத்து மற்றும் நுண்ணூட்டச்சத்து போன்ற வேதியியல் காரணிகளை மண் பகுப்பாய்வு செய்ய வேண்டும். மேற்கூறிய பண்புகளைக் கொண்டிருந்தால் அது வளமான மண் ஆகும். மண்ணின் வளத்தைச் சார்ந்தே, மனித வளம் இருக்கும். நமது உடலுக்குத் தேவையான ஊட்டச்சத்துகளுக்கு தானியங்களை நம்பி இருப்பதால், அதற்கு ஆதரவாக இருக்கும் மண் வளத்தைப் பாதுகாப்பது நமது கடமை என்பதை மறுக்க முடியாது.

ஏனெனில், தங்களுக்குத் தேவையான ஊட்டச்சத்துக்களை, தானியங்கள் மண்ணிலிருந்து எடுத்துக்கொள்கின்றன. ஆகவே, மண் வளமாக இருந்தால் நமக்குத் தேவையான அனைத்துச் சத்துக்களும் சம அளவில் உணவு தானியங்கள் வழியாக கிடைக்கும். முக்கியமாக நுண்ணூட்டச்சத்துக் குறைபாடுகள் குழந்தைகள் மற்றும் பெண்களுக்கு அதிக அளவில் தோன்றுவதாக உலகச் சுகாதார அமைப்பின் கணகெடுப்பு மூலம் தெரியவந்துள்ளது. இரும்பு மற்றும் துத்தநாகச் சத்துக் குறைபாடு அதிகரித்து வருவதாகவும் தெரிகிறது.

குறிப்பாகக் குழந்தைகளுக்கு 12.5 மி.கி / நாள், 2 மி.கி / மற்றும் பெண்களுக்கு 60 மி.கி / நாள், 12 மி.கி என்ற கணக்கில் நாள்தோறும் இரும்பு. துத்தநாக சத்துக்கள் தேவை என்பது அறிவியல் சார்ந்த பரிந்துரையாக உள்ளது. தற்போது, நமக்கு ஏற்படும் நுண்ணூட்டச்சத்துக் குறைபாடுகளைப் பெரும்பாலும் செயற்கை மருந்துகள் மூலம் சரிசெய்து கொள்கிறோம். இந்த நிலையை மாற்ற, மண்வளத்தைச் சீராகப் பராமரித்து தேவையான ஊட்டச்சத்துக்கள் அனைத்தையும் மண்ணிலிருந்து பயிர்களின் வாயிலாக உணவின் மூலம் எளிமையாகக் கிடைக்கச் செய்ய வேண்டியது அவசியம். இவ்வாறு கூறினர்.