முன்னால் சென்ற பைக் மீது அரசு டாக்டர் ஓட்டி வந்த கார் மோதி தம்பதி பலி

சென்னை, ஆக. 29: பூந்தமல்லி அடுத்த திருவேற்காடு, பள்ளிக்குப்பம், ராஜிவ் நகரைச் சேர்ந்தவர் அறிவரசன் (41). தனியார் கால்சென்டர் ஊழியர். இவரது மனைவி சரண்யா (36), திருவள்ளூரில் உள்ள ஒரு தனியார் நிறுவனத்தில் வேலைபார்த்து வந்தார். தம்பதிக்கு இரட்டை மகன்கள் உள்ளனர். இந்நிலையில், சரண்யாவை பைக்கில் ஏற்றிக்கொண்டு, நேற்று காலை ஆவடி-பூந்தமல்லி நெடுஞ்சாலையில் அறிவரசன் சென்றுள்ளார். ஆவடி, வசந்தம் நகர் அருகே சென்றபோது, பைக் மீது பின்னால் வந்த கார் ஒன்று வேகமாக மோதியது. இதில் அறிவரசன், சரண்யா இருவரும் பைக்கிலிருந்து தூக்கி வீசப்பட்டதில், சம்பவ இடத்திலேயே ரத்த வெள்ளத்தில் துடிதுடித்து உயிரிழந்தனர். ஆவடி போக்குவரத்து புலனாய்வு பிரிவு போலீசார் விரைந்து வந்து பலியான தம்பதியின் சடலங்களை மீட்டு, போரூரில் உள்ள தனியார் மருத்துவமனைக்கு பிரேத பரிசோதனைக்காக அனுப்பி வைத்தனர். இந்த விபத்தில், காரை ஓட்டிவந்த அரசு மருத்துவர் பாரி மார்க்ஸ் என்பவரும் படுகாயம் அடைந்தார். அவரை போலீசார் மீட்டு, ஆவடி அரசு மருத்துவமனைக்கு அனுப்பி வைத்து, போலீசார் விசாரணை நடத்தி வருகின்றனர்.