டிட்வா புயல் எதிரொலி மாமல்லபுரத்தில் காற்றுடன் கனமழை

மாமல்லபுரம், டிச.1: வங்கக்கடலில் உருவான “டிட்வா” புயல் வலுவிழந்தது எனவும், மேலும் வலுவிழந்து காற்றழுத்த தாழ்வு மண்டலமாக மாறும் எனவும் தெரிவிக்கப்பட்டுள்ளது. இதனால், செங்கல்பட்டு உள்ளிட்ட பல்வேறு மாவட்டங்களில் காற்றுடன் கூடிய கனமழை பெய்து வருகிறது. இதில், செங்கல்பட்டு மாவட்டம் முழுவதும் கடந்த 2 நாட்களாக விட்டுவிட்டு கனமழை பெய்து வருகிறது. மாமல்லபுரத்தில் நேற்று முன்தினம் இரவு முதல் நேற்று மாலை வரை காற்றுடன் கூடிய கனமழை பெய்தது. இதனால், கல்பாக்கம் சாலை, கோவளம் சாலை ஆகிய இடங்களில் மழைநீர் ஆங்காங்கே தேங்கி நின்றது.

இதையடுத்து, நகராட்சி ஊழியர்கள் விரைந்து வந்து பொக்லைன் இயந்திரம் மூலம் கால்வாய் அமைத்தும், மோட்டார் மூலமும் மழைநீரை வெளியேற்றினர். மேலும், “டிட்வா” புயல் காரணமாக மாமல்லபுரம் புராதன சின்னங்கள் பகுதியில் விரல்விட்டு எண்ணும் அளவில் சுற்றுலாப் பயணிகள் காணப்பட்டனர். மாமல்லபுரம் முதல் புதிய கல்பாக்கம் பகுதி வரை கடல் சீற்றமாக காணப்படுகிறது. இதனால், மீனவர்கள் 3 நாட்களாக கடலுக்கு மீன்பிடிக்க செல்லாமல், படகு மற்றும் வலைகளை பாதுகாப்பான இடத்தில் வைத்துள்ளனர்.

பொதுமக்கள் தேவையில்லாமல் வெளியில் வருவதை தவிர்க்க வேண்டும் என மாமல்லபுரம் நகராட்சி அறிவுறுத்தியுள்ளது. மேலும், புயலை எதிர்கொள்ள அனைத்து உபகரணங்களுடன் தயார் நிலையில் இருப்பதாக மாமல்லபுரம் தீயணைப்பு அலுவலர் இன்பராஜ் தெரிவித்துள்ளார்.