தீப ரெசிபிகள்

தினை மாவு மாவிளக்கு

தேவையானவை:

தினை அரிசி அல்லது தினை மாவு - 2 கப்,

தேன் - ½ கப்,

ஏலத்தூள் - 1 டீஸ்பூன்,

சுக்குத் தூள் - 1 டீஸ்பூன்.

செய்முறை:

தினையை மூன்று முறை கழுவி சுத்தம் செய்து, 2 மணி நேரம் ஊறிய பின் வடிகட்டி, சுத்தமான துணியில் பரப்பி உலர விட்டு, வாணலியில் மணம் வரும் வரை வறுத்து ஆறவிட்டு பொடி செய்து கொள்ளவும். அடிகனமான பாத்திரத்தில் நீர் ஊற்றி, வெல்லம் கரைந்த பின் வடிகட்டி, ஒரு கம்பிப் பாகு எடுத்து அதில் தேன் கலந்து மாவில் இதனை சிறிது சிறிதாக ஊற்றி நன்கு பிசையவும். சப்பாத்தி மாவு பதத்தில் பிசைந்து உருட்டி நடுவில் குழி செய்து நெய் ஊற்றி திரி போடலாம். ஆரோக்கிய, மணமான தினை மாவு மாவிளக்கு ரெடி.

இனிப்பு பிடி கொழுக்கட்டை

தேவையானவை:

பச்சரிசி மாவு - 1 கப்,

வெல்லம் அல்லது கருப்பட்டி - ½ கப்,

ஏலத்தூள் - 1 டீஸ்பூன்,

எள் - ½ டீஸ்பூன்,

தேங்காய் துண்டுகள் - ½ டீஸ்பூன்,

நெய் - ½ டீஸ்பூன்,

நீர் - 2 டீஸ்பூன்,

பாசிப்பருப்பு - 1 டீஸ்பூன்.

செய்முறை:

ஒரு வாணலியில் பாசிப்பருப்பை மணம் வரும் வரை வறுத்து, எள்ளை வறுத்து எடுக்கவும். ஒரு பாத்திரத்தில் மாவு எடுத்து அதில் வறுத்த பாசிப்பருப்பு, எள் சேர்த்து, அதனுடன் நெய்யில் வறுத்த தேங்காய் துண்டுகள், ஏலத்தூள், வெல்லத்தை கொதிக்க வைத்து வடிகட்டி மாவுடன் நன்றாக கலந்து பிசையவும். பிசைந்த மாவை சிறிது எடுத்து விரல்களால் இரண்டு முறை அழுத்தி எடுத்து, அனைத்து மாவையும் கொழுக்கட்டைகளாக செய்து, நெய் தடவிய இட்லி தட்டில் வைத்து 10 நிமிடங்கள் வேகவைத்து எடுக்கவும்.

அவல் பாயசம்

தேவையானவை:

கெட்டி அவல் - 1 கப்,

வெல்லம் - ½ கப்,

நெய் - 1 டீஸ்பூன்,

பால் - 3 கப்,

முந்திரி, திராட்சை - தலா 5,

ஏலத்தூள் - சிறிதளவு.

செய்முறை:

அவலை தண்ணீர் விட்டு கழுவி வடிகட்டவும். ஒரு கனமான பாத்திரத்தில் பால் சேர்த்து அதில் அவல் போட்டு மூடி, பத்து நிமிடங்கள் மிதமான தீயில் வேக விட்டு, வெந்ததும் வெல்லத்தை கொதிக்க விட்டு வடிகட்டி வெந்த அவலில் சேர்த்துக் கிளறி, நெய்யில் வறுத்த முந்திரி, திராட்சை, ஏலக்காய் தூள் கலந்து இறக்கவும்.