திருமங்கலம் அருகே டூவீலர்கள் மோதலில் கூலித்தொழிலாளி பலி

திருமங்கலம், ஜூலை 15: திருமங்கலம் அருகே டூவீலர்கள் நேருக்கு நேர் மோதிக்கொண்ட விபத்தில் கூலித்தொழிலாளி உயிரிழந்தார். மற்றொருவர் படுகாயமடைந்து சிகிச்சை பெற்று வருகிறார்.மதுரை ஜெய்ஹிந்துபுரம் பசும்பொன்நகரை சேர்ந்தவர் நமகோடி. இவரது மகன் விஜயகுமார்(31). கூலித்தொழிலாளியான இவருக்கு இன்னும் திருமணமாகவில்லை. நேற்று முன்தினம் மாலை திருமங்கலம் அருகேயுள்ள காங்கேயநத்தம் கிராமத்தில் வசிக்கும் தனது தங்கையை பார்க்க, இவர் மதுரையிலிருந்து டூவீலரில் புறப்பட்டுச்சென்றார். திருமங்கலம் - உசிலம்பட்டி ரோட்டில் பன்னிகுண்டு கிராமத்தின் அருகே சென்ற போது எதிரே வந்த டூவீலர் இவரது வாகனம் மீது மோதியது.

இந்த விபத்தில் விஜயகுமார் மற்றும் எதிரே டூவீலரில் வந்த விருதுநகர் மாவட்டம் அருப்புக்கோட்டை அருகேயுள்ள மல்லம்பட்டியை சேர்ந்த செந்தில்(36) ஆகியோர் தூக்கிவீசப்பட்டு படுகாயமடைந்தனர். அக்கம்பக்கத்தினர் இருவரையும் மீட்டு திருமங்கலம் அரசு மருத்துவமனைக்கு 108 ஆம்புலன்ஸ் மூலமாக அனுப்பினர். ஆனால் செல்லும் வழியிலேயே விஜயகுமார் பரிதாபமாக உயிரிழந்தார். படுகாயமடைந்த செந்தில் மதுரை அரசு மருத்துவமனையில் சிகிச்சை பெற்று வருகிறார். காயமடைந்த செந்தில் காண்டை விலக்கு பகுதியில் உள்ள உரசாக்கு தயாரிக்கும் நிறுவனத்தில் பணிபுரிந்து வருகிறார். சம்பவம் குறித்து சிந்துபட்டி போலீசார் வழக்குபதிவு செய்து விசாரணை நடத்தி வருகின்றனர்.