கணவனுடன் சண்டை போட்டு வீட்டை விட்டு வெளியேறியவர் ரயில் பெட்டியில் இளம்பெண் கூட்டு பாலியல் பலாத்காரம்: தண்டவாளத்தில் வீசப்பட்டவர் மீது ரயில் ஏறியதில் கால் துண்டானது

பானிபட்: அரியானாவில் ரயில் பெட்டியில் இளம்பெண் கூட்டு பாலியல் பலாத்காரம் செய்யப்பட்ட சம்பவம் அதிர்ச்சியை ஏற்படுத்தி உள்ளது. அரியானா மாநிலம், பானிபட்டை சேர்ந்தவர் தம்பதியிடையே தகராறு ஏற்பட்டதாக தெரிகிறது. இதனை தொடர்ந்து கணவர் மேல் கோபமடைந்த அந்த இளம்பெண் வீட்டைவிட்டு வெளியேறி உள்ளார். இந்நிலையில் ஜூன் 24ம் தேதி முதல் தனது மனைவியை காணவில்லை என கணவர் பானிபட் போலீசில் புகார் கொடுத்துள்ளார்.

இதற்கிடையில் சோனிபட் மருத்துவமனையில் கால் துண்டிக்கப்பட்ட நிலையில் அந்த 35 வயது இளம் பெண் சேர்க்கப்பட்ட தகவல் போலீசுக்கு கிடைத்தது. விசாரணை நடத்திய போலீசாரிடம் அந்த பெண் கூறுகையில், ‘‘நான் பானிபட் ரயில் நிலையத்தில் தனியாக உட்கார்ந்து இருந்தபோது எனது கணவர் அனுப்பியதாக கூறி என்னை ஒருவர் அழைத்துச்சென்றார். அவர் நிற்கும் ரயிலின் காலி ரயில்பெட்டியில் வைத்து என்னை பாலியல் வன்கொடுமை செய்தார்.

பின்னர் மேலும் இரண்டு நபர்கள் அங்கு வந்தனர். அவர்களும் என்னை பாலியல் வன்கொடுமை செய்தனர். பின்னர் அவர்கள் என்னை சோனிபட்டிற்கு அழைத்துச்சென்றனர். அங்கு அவர்கள் என்னை தண்டவாளத்தில் வீசினர். ரயில் என் மீது மோதியதில் எனது ஒரு காலை இழந்தேன்’’ என்றார். அவர் மருத்துவமனையில் அனுமதிக்கப்பட்டு சிகிச்சை பெற்று வருகின்றார். கூட்டு பாலியல் பலாத்காரம் தொடர்பாக பானிபட் போலீசார் பூஜ்ய எப்ஐஆர் பதிவு செய்துள்ளனர். பானிபட் ரயில் காவல்துறைக்கு வழக்கை மாற்ற நடவடிக்கை மேற்கொண்டுள்ளனர்.