பரபரப்பான சூழலில் குளிர்கால கூட்டத்தொடர் நாடாளுமன்றம் இன்று கூடுகிறது: எஸ்ஐஆர் குறித்து விவாதிக்காவிட்டால் அவை முடங்கும் என எதிர்க்கட்சிகள் போர்க்கொடி

புதுடெல்லி: பரபரப்பான அரசியல் சூழலில் நாடாளுமன்ற குளிர்கால கூட்டத்தொடர் இன்று தொடங்குகிறது. இதில், வாக்காளர் பட்டியல் சிறப்பு தீவிர திருத்தம் (எஸ்ஐஆர்) குறித்து விவாதம் நடத்தாவிட்டால் அவை முடங்குவதற்கு ஒன்றிய அரசே பொறுப்பு என எதிர்க்கட்சிகள் திட்டவட்டமாக தெரிவித்துள்ளன.நாடாளுமன்ற குளிர்கால கூட்டத் தொடர் இன்று தொடங்கி வரும் 19ம் தேதி வரை 15 அமர்வுகளாக நடக்க உள்ளது. இந்த கூட்டத்தொடரில் பல்வேறு முக்கிய மசோதாக்களை நிறைவேற்றி பல முக்கிய சீர்த்திருத்தங்களை மேற்கொள்ள ஒன்றிய அரசு திட்டமிட்டுள்ளது. உயர்கல்விக்கென தனி ஆணைய மசோதா, அணுசக்தி மசோதா, தேசிய நெடுஞ்சாலைகள் திருத்த மசோதா, கார்ப்பரேட் சட்டங்கள் திருத்த மசோதா உள்ளிட்ட 14 மசோதாக்கள் தாக்கல் செய்து நிறைவேற்ற திட்டமிட்டப்பட்டுள்ளது.

எனவே குளிர்கால கூட்டத்தொடரை சுமூகமாக நடத்துவதை உறுதி செய்ய அரசு தரப்பில் அனைத்துக் கட்சி கூட்டம் நேற்று நடந்தது. பாதுகாப்பு அமைச்சர் ராஜ்நாத் சிங், பாஜ தேசிய தலைவரும் ஒன்றிய அமைச்சருமான ஜே.பி. நட்டா, நாடாளுமன்ற விவகார துறை அமைச்சர் கிரண் ரிஜிஜு, இணை அமைச்சர்கள் அர்ஜூன் ராம் மேக்வால் மற்றும் எல்.முருகன் ஆகியோர் பங்கேற்ற இக்கூட்டத்தில், 36 கட்சிகளைச் சேர்ந்த 50 எம்பிக்கள் பங்கேற்றனர். இதில், தேர்தல் ஆணையம் மேற்கொண்டுள்ள எஸ்ஐஆர் பணி குறித்து கட்டாயம் விவாதம் நடத்த வேண்டுமென அனைத்து எதிர்க்கட்சி தலைவர்களும் வலியுறுத்தினர். மேலும், டெல்லி குண்டுவெடிப்பை தொடர்ந்து தேசிய பாதுகாப்பு குறித்தும், புதிய தொழிலாளர் சட்டங்கள் குறித்தும் அவையில் விவாதிக்க எதிர்க்கட்சி எம்பிக்கள் வலியுறுத்தினர்.

இதுதவிர, சட்டப்பேரவைகளில் நிறைவேற்றப்பட்ட மசோதாக்களை ஆளுநர்கள் கிடப்பில் போடுவது, எதிர்க்கட்சிகள் ஆளும் மாநிலங்களின் நிதி தடுக்கப்படுவது போன்றவை கூட்டாட்சி தத்துவத்திற்கு எதிரானது என்றும், இதுதொடர்பாக விவாதம் நடத்த அரசு முன்வர வேண்டுமென்றும் வலியுறுத்தப்பட்டது. ஆனால் இதுதொடர்பாக அரசு தரப்பில் எந்த உத்தரவாதமும் தரப்படவில்லை.

இரண்டரை மணி நேர கூட்டத்திற்கு பின் செய்தியாளர்களுக்கு பேட்டி அளித்த நாடாளுமன்ற விவகாரத்துறை அமைச்சர் கிரண் ரிஜிஜு கூறுகையில், ‘‘எதிர்க்கட்சிகளுக்கு எந்த உறுதிமொழியும் அளிக்கவில்லை. அவர்கள் அவை செயல்பட அனுமதிக்க வேண்டும். அனைவரும் நிதானமாக சிந்தித்து செயல்பட வேண்டும். நாடாளுமன்றத்தை முடக்கக் கூடாது. எஸ்ஐஆர் குறித்து விவாதம் நடத்தப்படுமா என்பதை அலுவல் ஆலோசனைக் குழு முடிவு செய்யும். அரசியல் கட்சிகள் இடையே வேறுபாடுகள் உள்ளன. ஆனால் நாடாளுமன்ற அவையை தொந்தரவு செய்ய வேண்டாம்’’ என எதிர்க்கட்சிகளை கேட்டுக் கொண்டார்.

பின்னர் மாலையில், மக்களவை மற்றும் மாநிலங்களவை அலுவல் ஆலோசனை கூட்டம் நடந்தது. இதிலும் எஸ்ஐஆர் தொடர்பாக விவாதம் நடத்த வேண்டுமென எதிர்க்கட்சி எம்பிக்கள் கண்டிப்புடன் வலியுறுத்தினர். இதுகுறித்து விரைவில் பதிலளிப்பதாக அரசு தரப்பில் தெரிவிக்கப்பட்டது. மக்களவையில் விவாதம் நடத்த 10 மணி நேரம் ஒதுக்கப்படுவதாகவும் அதற்கான தேதி பின்னர் முடிவு செய்யப்படும் என சபாநாயகர் ஓம்பிர்லா தெரிவித்தார்.

மாநிலங்களவை தலைவரும் துணை ஜனாதிபதியுமான சி.பி.ராதாகிருஷ்ணன் தலைமையில் நடந்த மாநிலங்களவை அலுவல் ஆலோசனை கூட்டத்திலும் எஸ்ஐஆர் விவாதம் தொடர்பாக எந்த முடிவும் எடுக்கப்படவில்லை. ஆனால், தேர்தல் சீர்த்திருத்தங்களுக்கான அவசர தேவை குறித்து இன்று (திங்கட்கிழமை) பிற்பகல் 2 மணிக்கு அவையில் விவாதம் நடத்தாவிட்டால் நாடாளுமன்றம் முடங்குவதற்கு ஒன்றிய அரசு தான் பொறுப்பேற்க வேண்டுமென எதிர்க்கட்சி எம்பிக்கள் திட்டவட்டமாக தெரிவித்தனர்.

* புகையிலை, பான் மசாலா ஜிஎஸ்டி வரிக்கு 2 மசோதா

புகையிலை, பான் மசாலா உள்ளிட்ட உடலுக்கு கேடு விளைவிக்கும் பொருட்களுக்கு ஜிஎஸ்டி 2.0ல் 40 சதவீத வரி விதிக்கப்பட்டுள்ளது. தற்போது 28 சதவீத வரி வரம்பில் இப்பொருட்கள் இடம் பெற்றுள்ளன. இத்துடன் பல்வேறு செஸ் வரிகளுடன் கூடுதல் வரி விதிக்கப்படுகிறது. இதற்கிடையே, புகையிலை பொருட்கள் மீதான அதிகமான வரியை அப்படியே தக்க வைப்பதை உறுதி செய்ய ஒன்றிய கலால் திருத்த மசோதா மற்றும் சுகாதார பாதுகாப்பு, தேசிய பாதுகாப்பு செஸ் மசோதா என 2 மசோதாக்களை நிதி அமைச்சர் நிர்மலா சீதாராமன் இன்று தாக்கல் செய்ய உள்ளார்.

* ஒன்றிய அரசே பொறுப்பு

மக்களவை காங்கிரஸ் துணைத் தலைவர் கவுரவ் கோகோய் கூறுகையில், ‘‘பிரதமர் மோடி மற்றும் உள்துறை அமைச்சர் அமித்ஷா தலைமையிலான அரசு, நாட்டின் ஜனநாயகத்தையும் நாடாளுமன்ற மரபுகளையும் முடிவுக்குக் கொண்டுவர விரும்புவது தெளிவாக தெரிகிறது’’ என்றார். மாநிலங்களவை காங்கிரஸ் துணைத்தலைவர் பிரமோத் திவாரி கூறுகையில், ‘‘எஸ்ஐஆர் குறித்து விவாதம் நடத்தப்படாவிட்டால், இந்த அரசு நாடாளுமன்றம் செயல்படுவதை விரும்பவில்லை என்று எதிர்க்கட்சிகள் கருதுகின்றன’’ என்றார்.

சமாஜ்வாடி கட்சியின் மூத்த தலைவர் ராம்கோபால் யாதவ் கூறுகையில், ‘‘எஸ்ஐஆர் குறித்து விவாதம் நடத்தப்படாவிட்டால் அவையை செயல்பட அனுமதிக்க மாட்டோம்’’ என்றார். மார்க்சிஸ்ட் எம்பி ஜான் பிரிட்டாஸ் கூறுகையில், ‘‘குளிர்கால கூட்டத்தொடரில் நாடாளுமன்றம் முடங்கினால் முழு பொறுப்பையும் அரசு ஏற்க வேண்டும்’’ என்றார்.