ரூ.1.10 கோடியில் பயனாளிகளுக்கு நலத்திட்ட உதவிகள் வளர்ச்சி திட்ட பணிகளை விரைந்து முடிக்க வேண்டும்

*அதிகாரிகளுக்கு சட்டமன்ற பேரவை குழு தலைவர் அறிவுறுத்தல்

தஞ்சாவூர் : தமிழ்நாடு சட்டமன்றப் பேரவை பொது நிறுவனங்கள் குழுவினர் தஞ்சாவூர் மாவட்டத்தில் மேற்கொள்ளப்பட்டு வரும் வளர்ச்சித் திட்டப் பணிகள் தொடர்பாக துறை அலுவலர்களுடன் ஆய்வு மேற்கொண்டனர். தமிழ்நாடு சட்டமன்றத்தில், சட்டமன்ற உறுப்பினர்களை கொண்ட பல்வேறு குழுக்கள் உள்ளன.

அதில் தமிழ்நாடு சட்டமன்றப் பேரவை பொது நிறுவனங்கள் குழு தலைவர் நந்தகுமார் தலைமையில், சட்டமன்ற உறுப்பினர்களைக் கொண்ட குழுவினர், தஞ்சாவூர் மாவட்ட ஆட்சியர் அலுவலகத்தில் கலெக்டர் பிரியங்கா பங்கஜம் முன்னிலையில் மாவட்டம் தொடர்பான தணிக்கை பத்திகள் குறித்து துறை அலுவவர்களுடன் நேற்று ஆய்வு மேற்கொண்டனர்.

தமிழ்நாடு சட்டமன்றப் பேரவை பொதுநிறுவனங்கள் குழு உறுப்பினர்கள் மற்றும் சட்டமன்ற உறுப்பினர்கள் அன்பழகன், துரை.சந்திரசேகரன், ஜவாஹிருல்லா, கிரி, சிந்தனை செல்வன், நாகைமாலி, பிரகாஷ் முதன்மை செயலாளர் முனைவர் சீனிவாசன் மற்றும் குழு அலுவலர் செந்தில்குமார் ஆகியோர் முன்னிலை வகித்தனர்.

அப்போது, தமிழ்நாடு முதலமைச்சர், பொதுமக்களின் நலனுக்காக எண்ணற்ற திட்டங்களை அறிவித்து செயல்படுத்தி வருகிறார் அந்த திட்டங்களின் பயன்கள் ஏழை, எளிய மக்களிடம் கொண்டு சென்று சேர்ப்பது அதிகாரிகளின் செயல்பாடு முக்கியமானது.

இது ஏழை, எளிய மக்களுக்கு சேவை செய்ய அதிகாரிகளுக்கு கிடைத்த வாய்ப்பு. அதைப்பயன்படுத்தி அரசின் திட்டங்கள் ஏழை, எளிய மக்களுக்கு கிடைக்க செய்வதில் உரிய நடவடிக்கை மேற்கொள்ள அதிகாரிகளுக்கு அறிவுறுத்தப்பட்டது.

தஞ்சாவூர் மாவட்டத்தில் செயல்படுத்தப்படும் வளர்ச்சித் திட்டப் பணிகள் குறித்தும், பணிகளை விரைந்து முடித்திட மேற்கொள்ள வேண்டிய நடவடிக்கைகள் குறித்தும் சம்பந்தப்பட்ட துறை அலுவலர்களிடம் கேட்டறியப்பட்டது.

பணிகளை விரைந்து முடிக்க துறை அலுவலர்களுக்கு அறிவுறுத்தப்பட்டுள்ளது என தமிழ்நாடு சட்டமன்றப் பேரவை பொதுநிறுவனங்கள் குழு தலைவர் தெரிவித்தார்.

மாற்றுத்திறனாளிகள் நலத்துறை சார்பில் 6 பயனாளிகளுக்கு ரூ.7 லட்சம் மதிப்பிலும், மாவட்ட இயக்க மேலாண்மை அலகு மகளிர் சுய உதவிக் குழுக்கள் வங்கி நேரடிக் கடன் 10 பயனாளிகளுக்கு ரூ.93 லட்சம் மதிப்பிலும், வேளாண்மைத் துறை சார்பில் முதலமைச்சரின் மண்ணுயிர் காத்து மன்னுயிர் காப்போம் திட்டத்தின் கீழ் 6 பயனாளிகளுக்கு ரூ.2,590 மதிப்பிலும், ஆதி திராவிடர் மற்றும் பழங்குடியினர் நலத்துறை சார்பில் தையல் இயந்திரம் 2 பயனாளிகளுக்கு ரூ.13,380 மதிப்பிலும்,

தொழில் வணிகத்துறை சார்பில் புதிய தொழில் மற்றும் தொழில்முனைவோர் மேம்பாட்டுத் திட்டத்தின் கீழ் 2 பயனாளிகளுக்கு ரூ.10 லட்சம் மதிப்பிலும், பிற்படுத்தப்பட்டோர் மற்றும் சிறுபான்மையினர் நலத்துறை சார்பில் தேய்ப்பு பெட்டிகள் 3 பயனாளிகளுக்கு ரூ. 12,000 மதிப்பிலும், நுகர்வோர் பாதுகாப்புத்து துறை சார்பில் புதிய குடும்ப அட்டை 5 பயனாளிகளுக்கும் என மொத்தம் ரூ.1.10 கோடி மதிப்பில் 29 பயனாளிகளுக்கு நலத்திட்ட உதவிகளை தமிழ்நாடு சட்டமன்ற பேரவை பொது நிறுவனங்கள் குழு தலைவர் நந்தகுமார் வழங்கினார்.

இக்கூட்டத்தில் தஞ்சை மாவட்ட கலெக்டர் பிரியங்கா பங்கஜம், சட்டமன்ற உறுப்பினர்கள் டி.கே.ஜி.நீலமேகம், அசோக்குமார், மாநகராட்சி மேயர்கள் சண்.ராமநாதன், சரவணண், மாநகராட்சி துணை மேயர்கள் அஞ்சுகம் பூபதி, தமிழழகன், மாவட்ட காவல் கண்காணிப்பாளர் ராஜாராம், மாவட்ட வருவாய் அலுவலர் தியாகராஜன் மற்றும் பலர் கலந்து கொண்டனர்.