விருத்தாசலம் அருகே ரயில்வே கேட்டில் மோதி தண்டவாளத்தில் பள்ளி வேன் கவிழ்ந்து 9 மாணவர்கள் படுகாயம்: ரயில் வராததால் பெரும் அசம்பாவிதம் தவிர்ப்பு

மங்கலம்பேட்டை: விருத்தாசலம் அருகே ரயில்வே கேட்டில் மோதிய பள்ளி வேன் தண்டவாளத்தில் கவிழ்ந்து 9 மாணவர்கள் படுகாயமடைந்தனர். அப்போது ரயில் வராததால் பெரும் அசம்பாவிதம் தவிர்க்கப்பட்டது. கடலூர் மாவட்டம் மங்கலம்பேட்டை அருகே விஜயமாநகரம், புது விளாங்குளத்தை சேர்ந்தவர் சேகர். இவர் விருத்தாசலத்தில் உள்ள ஒரு தனியார் பள்ளியில் ஒப்பந்த அடிப்படையில் மாணவர்களை ஏற்றி வரும் வேன் டிரைவராக வேலை செய்து வருகிறார். பள்ளி நாட்களில் மாணவ, மாணவிகளை வேனில் ஏற்றிச் சென்று பள்ளியில் விட்டு விட்டு, மாலையில் வகுப்புகள் முடிந்ததும் வேனில் ஏற்றிச் சென்று வீடுகளில் விடுவது வழக்கம்.

இந்நிலையில் நேற்று காலை 7.30 மணியளவில் மங்கலம்பேட்டை அருகே கோ.பவழங்குடி கிராமத்தை சேர்ந்த 10க்கு மேற்பட்ட மாணவர்களை வேனில் ஏற்றிக்கொண்டு, விருத்தாசலத்தில் உள்ள தனியார் பள்ளிக்கு சென்று கொண்டிருந்தார். கோ.பூவனூர் ரயில்வே கேட் அருகே வந்தபோது திடீரென டிரைவரின் கட்டுப்பாட்டை இழந்த வேன், ரயில்வே கேட்டின் பக்கவாட்டு கம்பிகளில் மோதி தண்டவாளத்தில் கவிழ்ந்தது. இதில் வேனில் பயணம் செய்த பள்ளி மாணவர்களின் அலறினர்.

அவர்களின் சத்தம் கேட்டு அக்கம் பக்கத்தினர் ஓடி வந்து, வேனுக்குள் சிக்கி படுகாயமடைந்த மாணவர்களை மீட்டு 108 ஆம்புலன்ஸ் மூலம் விருத்தாசலம் அரசு மருத்துவமனைக்கு அனுப்பி வைத்தனர். அங்கு அஸ்வின், ஜெகதீஸ், வசந்த், அஸ்விகா, அனந்திகா உள்ளிட்ட 9 மாணவர்களுக்கு தீவிர சிகிச்சை அளிக்கப்பட்டு வருகிறது. விபத்து நடந்த நேரத்தில் ரயில் வராததால் பெரும் அசம்பாவிதம் ஏதும் நடக்கவில்லை. தகவலறிந்த மங்கலம்பேட்டை போலீசார் சம்பவ இடத்துக்கு வந்தனர்.

மேலும் இதுகுறித்து வழக்கு பதிவு செய்து தீவிர விசாரணை நடத்தி வருகின்றனர். இதனிடையே ரயில்வே திருச்சி கோட்ட மேலாளர் பாலக் ராம்நிகி விபத்து நடந்த இடத்தை நேரில் பார்வையிட்டதுடன், கேட் கீப்பரிடம் சம்பவம் குறித்து விசாரணை செய்தார். பள்ளி வேன் ரயில்வே தண்டவாளத்தில் கவிழ்ந்து 9 மாணவர்கள் படுகாயம் அடைந்த சம்பவம் அப்பகுதியில் பரபரப்பை ஏற்படுத்தியது. கடந்த ஜூலை மாதம் கடலூர் மாவட்டம் செம்மங்குப்பத்தில் தனியார் பள்ளி வேன் மீது ரயில் மோதி மூன்று மாணவர்கள் உயிரிழந்தது குறிப்பிடத்தக்கது.