கால்நடை மருத்துவப்படிப்பில் 7.5% இட ஒதுக்கீட்டில் இடங்களை தேர்வு செய்த மாணவர்களுக்கான சேர்க்கை ஆணை: அமைச்சர் வழங்கினார்

சென்னை: கால்நடை மருத்துவப்படிப்பில் 7.5 சதவீத இட ஒதுக்கீட்டில் இடங்களை தேர்வு செய்த மாணவர்களுக்கான சேர்க்கை ஆணையை அமைச்சர் அனிதா ராதாகிருஷ்ணன் வழங்கினார். தமிழ்நாடு கால்நடை மருத்துவ அறிவியல் பல்கலைக்கழகத்தின்கீழ் சென்னை, நாமக்கல், திருநெல்வேலி, ஒரத்தநாடு, சேலம் தலைவாசல், உடுமலைப்பேட்டை, தேனி வீரபாண்டி ஆகிய 7 இடங்களில் கால்நடை மருத்துவ கல்லூரிகள் உள்ளன.

இந்த கல்லூரிகளில் ஐந்தரை ஆண்டுகள் கொண்ட கால்நடை மருத்துவ அறிவியல் மற்றும் பராமரிப்பு (பிவிஎஸ்சி - ஏஹெச்) படிப்புக்கு 660 இடங்கள் உள்ளன. இதில், சென்னை, நாமக்கல், திருநெல்வேலி, ஒரத்தநாடு ஆகிய 4 கல்லூரிகளில் உள்ள 420 இடங்களில் மட்டும் அகில இந்திய ஒதுக்கீட்டுக்கு 15 சதவீத இடங்கள் வழங்கப்படுகின்றன. இதுபோக, தமிழகத்துக்கு 597 இடங்கள் உள்ளன.

இந்த படிப்புகளுக்கு பிளஸ் 2 மதிப்பெண் அடிப்படையில் மாணவர் சேர்க்கை நடைபெறுகிறது. அரசுப் பள்ளி மாணவர்களுக்கு 7.5 சதவீத உள்ஒதுக்கீட்டின் கீழ் பிவிஎஸ்சி படிப்பில் 45 இடங்கள், பிடெக் படிப்பில் உணவு தொழில்நுட்பம் - 3, பால்வள தொழில்நுட்பம் - 2, கோழியின தொழில்நுட்பம் - 3 இடங்கள் என மொத்தம் 53 இடங்கள் ஒதுக்கப்படுகின்றன. இந்நிலையில் கடந்த 22ம் தேதி சிறப்புப் பிரிவு மாணவர்களுக்கான கலந்தாய்வு நடைபெற்றது.

இதில், 42 இடங்கள் நிரப்பப்பட்டன. இதனைத்தொடர்ந்து நேற்று அரசுப் பள்ளி மாணவர்களுக்கான 7.5% இட ஒதுக்கீட்டுக்கான நேரடி கலந்தாய்வு சென்னை மாதவரம் பால் பண்ணையில் அமைந்துள்ள தமிழ்நாடு கால்நடை மருத்துவ‌ அறிவியல் பல்கலைக்கழக வளாகத்தில் நடைபெற்றது. இந்த நேரடிக் கலந்தாய்வில் 218 பேர் கலந்துகொண்ட நிலையில் 52 இடங்கள் நிரப்பப்பட்டன. இந்நிகழ்ச்சியில் சுதர்சனம் எம்எல்ஏ, கால்நடை துறை செயலர் சுப்பையன், பல்கலைக் கழக பதிவாளர் நரேந்திரன், தேர்வு கட்டுப்பாடு அலுவலர் கார்த்திகேயன் ஆகியோர் கலந்துகொண்டனர்.