வேளச்சேரி அருகே அடுக்குமாடி வணிக வளாகத்தில் தீ விபத்து: ரூ.பல கோடி பெறுமான பர்னிச்சர்கள் எரிந்து நாசம்

வேளச்சேரி: வேளச்சேரி அருகே பள்ளிக்கரணையில் 5 அடுக்குமாடி வணிக வளாகத்தில் உள்ள பர்னிச்சர் கடையில் இன்று அதிகாலை திடீரென தீ விபத்து ஏற்பட்டது. இதில் கடைக்குள் இருந்த பலகோடி மதிப்பிலான பர்னிச்சர் பொருட்கள் எரிந்து நாசமாகிவிட்டன. இவ்விபத்து குறித்து போலீசார் வழக்குப்பதிவு செய்து விசாரிக்கின்றனர். இதனால் அங்கு பரபரப்பு நிலவியது.

சென்னை வேளச்சேரி அருகே பள்ளிக்கரணை, ராதா நகர் முதல் பிரதான சாலை பகுதியை சேர்ந்தவர் கோகுலகிருஷ்ணன் (42). இவர், பள்ளிகரணையில் 5 அடுக்குமாடிகளுடன் கூடிய ஒரு தனியார் வணிக வளாகத்தில் பிரமாண்ட பர்னிச்சர் கடை நடத்தி வருகிறார். இந்நிலையில், இன்று அதிகாலை 2 மணியளவில் கோகுலகிருஷ்ணனுக்கு சொந்தமான பர்னிச்சர் கடை திடீரென தீப்பிடித்து கொழுந்துவிட்டு எரியத் துவங்கியது.

பின்னர் படிப்படியாக 5வது மாடியில் இருந்த குடோனுக்கும் தீ பரவியது. இதனால் அப்பகுதி முழுவதும் கரும்புகை மண்டலமாக மாறி, அப்பகுதி மக்கள் கடும் மூச்சுத் திணறலால் பெரிதும் அவதிப்பட்டனர். இதுகுறித்து தகவலறிந்ததும் துரைப்பாக்கம், தாம்பரம், வேளச்சேரி, கிண்டி, மேடவாக்கம், வேளச்சேரி, தேனாம்பேட்டை, சைதாப்பேட்டை, எழும்பூர் ஆகிய 9 பகுதிகளில் இருந்து தீயணைப்பு வாகனங்களுடன் சம்பவ இடத்துக்கு 50க்கும் மேற்பட்ட வீரர்கள் விரைந்து வந்தனர்.

பின்னர் 5 அடுக்குமாடி வளாகத்தில் பரவியிருந்த தீயை சுமார் 3 மணி நேரத்துக்கு மேல் போராடி அணைத்தனர். இதில், கோகுலகிருஷ்ணனின் கடையில் இருந்த பலகோடி மதிப்பிலான பர்னிச்சர் பொருட்கள் முற்றிலும் எரிந்து நாசமாகிவிட்டன. இப்புகாரின்பேரில் பள்ளிக்கரணை போலீசார் வழக்குப்பதிவு செய்து, அப்பகுதி சிசிடிவி காமிரா பதிவுகளை ஆய்வு செய்து, பர்னிச்சர் கடையில் மின்கசிவு காரணமாக தீப்பிடித்ததா அல்லது வேறு ஏதேனும் காரணமா என பல்வேறு கோணங்களில் விசாரித்து வருகின்றனர். இதனால் அப்பகுதியில் பரபரப்பு நிலவியது.