வாணியம்பாடி மற்றும் சுற்றுவட்டாரங்களில் கனமழை: தேங்கியிருந்த மழை நீரை மாநகராட்சி ஊழியர்கள் அகற்றினர்

வேலூர்: விழுப்புரம், வாணியம்பாடி, கும்பகோணம் சுற்றுவட்டார பகுதிகளில் பெய்த கனமழை காரணமாக குளிர்ச்சியான சூழல் நிலவும் நிலையில், ஒரு சில இடங்களில் பாதிப்பும் ஏற்படுத்திருக்கிறது. வாணியம்பாடி மற்றும் சுற்றுவட்டாரங்களில் பலத்த இடி மின்னலுடன் கனமழை பெய்தது. கனமழையால் பெரியபேட்டை பாலாற்றின் கிளை ஆற்றில் வெள்ளப்பெருக்கு ஏற்பட்டு. கோட்டையில் இருந்து பெரியபேட்டை இணைக்கும் தரைப்பாலம் துண்டிக்கப்பட்டது. வாணியம்பாடி அரசு மருத்துவமனை வளாகத்தில் தண்ணீர் தேங்கியுள்ளதால் அங்க வந்த நோய்யாளிகளும் சிரமத்திற்கு உள்ளாகினர்.

விழுப்புரம் மாற்றும் சுற்றுவட்டார பகுதிகளில் நேற்று இரவு இரண்டு மணிநேரத்திற்கு கனமழை கொட்டி தீர்த்தது. விழுப்புரத்தில் புதிய பேருந்து நிலையத்தில் குளம் போல் தண்ணீர் தேங்கியதால் மக்கள் சிரமத்திற்கு உள்ளாகினர். சிலமணி நேரங்களில் நகராட்சி ஊழியர்கள் பேருந்தில் தேங்கிய மழை நீரை அகற்றிய பின்னரே பயணிகள் நிம்மதி அடைந்தனர். கும்பகோணம் மற்றும் சுற்றுவட்டாரங்களில் விடிய விடிய பரவலாக மழை பெய்தது. கும்பகோணம் அருகே கொரநாட்டு கருப்பூரில் பெய்த கனமழையால் 15 வீடுகளுக்குள் மழைநீர் புகுந்து அங்குள்ளவர்கள் சிரமத்திற்கு உள்ளாகினர்.

கொரநாட்டு கருப்பூரில் பெய்த கனமழை காரணமாக 500 ஏக்கரில் நடவு செய்த சம்பா நெற்பயிர்கள் நீரில் மூழ்கியுள்ளதால் விவசாயிகள் கவலை அடைந்துள்ளனர். மேட்டூர் அருகே மாதநாயக்கன்பட்டியில் பெய்த கனமழையால் அரசு பள்ளியின் சுற்றுச்சுவர் இடிந்து விழுந்ததது. இரவு நேரத்தில் பள்ளியின் சுற்றுச்சுவர் இடிந்து விழுந்ததால் அசம்பாவிதம் தவிர்க்கப்பட்டது. பழைய சுவரை அகற்றி புதிய சுற்றுச்சுவர் கட்டி தர வேண்டும் என பெற்றோர் கோரிக்கை விடுத்துள்ளனர். சென்னை புறநகர் பெய்த கனமழை காரணமாக காட்டுப்பாக்கம் பிரதான சாலையில் தண்ணீர் தேங்கி பள்ளி செல்லும் சிறார்கள் பாதிப்புக்கு உள்ளாகினர். கட்டுப்பாக்கம் ஊராட்சி நிறுவகம் தேங்கிய மழை நீர் துரிதமாக அகற்றவேண்டும் என்று பொதுமக்கள் கோரிக்கை விடுத்துள்ளனர்.