அமெரிக்க டாலருக்கு நிகரான இந்திய ரூபாய் மதிப்பு வரலாறு காணாத வீழ்ச்சி

புதுடெல்லி: அமெரிக்காவில் இறக்குமதி செய்யப்படும் இந்திய பொருட்களுக்கு 50 சதவீத வரிகளை அந்நாட்டு அதிபர் டிரம்ப் விதித்துள்ளார். இதனால் அமெரிக்காவுக்கு இந்தியாவின் ஏற்றுமதி பாதிக்கப்பட்டுள்ளது. குறிப்பாக ஜவுளி, தோல், காலணிகள் மற்றும் இறால் போன்ற பொருட்களின் ஏற்றுமதி முடங்கியுள்ளது. இது இந்திய ஏற்றுமதியாளர்களுக்கு பெரும் சிக்கலை ஏற்படுத்தியுள்ளது. அதே நேரத்தில், வேலைவாய்ப்பும் பறிபோகும் அபாயம் ஏற்பட்டுள்ளது. இதையடுத்து ஏற்றுமதியை அதிகரிக்க விரைவில் நடவடிக்கை எடுக்கப்படும் என ஒன்றிய அரசு உறுதியளித்துள்ளது.

இந்நிலையில், அமெரிக்க டாலருக்கு நிகரான இந்திய ரூபாயின் மதிப்பு வரலாறு காணாத வீழ்ச்சி அடைந்துள்ளது. அதன்படி, நேற்று முன்தினம் அமெரிக்க டாலருக்கு எதிராக இந்திய ரூபாய் 87.73 ஆக தொடங்கி முடிவடைந்தது. ஆனால் நேற்று இந்திய-அமெரிக்க வர்த்தக ஒப்பந்த பதற்றம், வெளிநாட்டு முதலீட்டாளர்களின் முதலீடு வெளியேறியது உள்ளிட்ட காரணங்களால், ரூபாய் மதிப்பு ஒரேடியாக 61 காசுகள் வீழ்ச்சியடைந்தது. டாலருக்கு நிகரான ரூபாய் மதிப்பு முதல் முறையாக ரூ.88.19ஐ தொட்டது.

50 சதவீத, வரி விதிப்பு, தொடர்ந்து வெளியேறும் அந்திய நிதி ஆகியவை இந்த சரிவுக்கு காரணம் என பொருளாதார வல்லுநர்கள் தெரிவித்துள்ளனர். மேலும் தங்கம் விலை வரலாறு காணாத உச்சத்தை தொட்டுள்ள நிலையில், ரூபாய் மதிப்பு சரிவால் விலை மேலும் உயர வாய்ப்புள்ளதாகவும் தெரிவித்துஉள்ளனர்.