திருப்பதி கலெக்டர் அலுவலகத்தில் ஆய்வு முதல்வர் சந்திரபாபு நாயுடு பழங்குடியினர் வளர்ச்சிக்கு அயராது பாடுபடுகிறார்

திருப்பதி : திருப்பதி கலெக்டர் அலுவலகத்தில் ஆந்திர மாநில பழங்குடியினர் ஆணைய தலைவர் சங்கர் தலைமையில், நேற்று பழங்குடியினர் நலன் மற்றும் மேம்பாட்டிற்காக எடுக்கப்பட்ட நடவடிக்கைகள் குறித்து மாவட்ட அதிகாரிகளுடன் ஆய்வுக்கூட்டம் நடைபெற்றது.கூட்டத்தில் பழங்குடியினர் ஆணையத்தின் தலைவர் சங்கர் பேசியதாவது:

திருப்பதி மாவட்டத்தில் உள்ள பழங்குடியினர் பெரும்பாலும் சமவெளிகளில் வசிப்பதால், அவர்கள் பொருளாதார ரீதியாகவும், சமூக ரீதியாகவும் பின்தங்கி உள்ளனர். தங்கள் பிரச்னைகளை நேரடியாக வெளிப்படுத்த முடியாத சூழ்நிலையில் உள்ளனர். எனவே அதிகாரிகள் அவர்கள் மீது சிறப்பு கவனம் செலுத்தி அவர்களின் பிரச்னைகளைக் கண்டறிந்து தீர்க்க வேண்டும்.

பழங்குடியினரின் வளர்ச்சிக்காக அரசாங்கம் அறிமுகப்படுத்தும் நலத்திட்டங்கள் குறித்து அவர்களுக்கு குறைவாகவே தெரியும் என்பதை அதிகாரிகள் உணர்ந்து, கல்வி மற்றும் சுகாதாரம் தொடர்பான ஒவ்வொரு திட்டத்தையும் தெரியப்படுத்தி, அதன் மூலம் அவர்கள் பயனடைய உதவ வேண்டும். மாவட்டத்தில் உள்ள பழங்குடியினர் தொடர்பான நிலுவையில் உள்ள வழக்குகளை விரைவில் தீர்க்க காவல் துறைக்கு உத்தரவிடப்பட்டுள்ளது.

பிரதமர் நரேந்திர மோடியும், மாநில முதல்வர் சந்திரபாபு நாயுடுவும் பழங்குடியினரின் வளர்ச்சிக்காக அயராது பாடுபடுகின்றனர். அவர்களின் அடிச்சுவடுகளைப் பின்பற்றி பழங்குடியினரை வளர்ச்சிப் பாதையில் வழிநடத்த நடவடிக்கை எடுக்க வேண்டும்.

வனப்பொருட்களை சேகரிக்க பழங்குடியினருக்கு அடையாள அட்டைகளை வழங்குமாறு வனத்துறை அதிகாரிகளுக்கு அறிவுறுத்தப்பட்டுள்ளது. மாவட்டத்தில் உள்ள பழங்குடியினர் நல விடுதிகளில் 15 நாட்களுக்கு ஒரு முறை மருத்துவர் வருகை தந்து, ஏதேனும் உடல்நலப் பிரச்னைகள் உள்ளதா என்பதைக் கண்டறிய வேண்டும். தேவைப்பட்டால் மருத்துவ வசதிகளை வழங்கவும் அதிகாரிகள் நடவடிக்கை எடுக்க வேண்டும்.

ஒவ்வொரு அரசு அலுவலகத்திலும் எஸ்டி தொடர்பான பட்டியல் கண்டிப்பாக செயல்படுத்தப்படுவதை உறுதி செய்ய நடவடிக்கை எடுக்க வேண்டும். எஸ்டி மாணவர்கள் படிக்கும் பள்ளிகளை அடையாளம் கண்டு அவர்களின் உடல்நலத்தில் கவனம் செலுத்த வேண்டும்.பழங்குடியினரிடையே தொற்று நோய்கள் பரவாமல் தடுக்க உரிய முன்னெச்சரிக்கைகள் எடுக்கப்பட வேண்டும். இவ்வாறு அவர் பேசினார்.

தொடர்ந்து, மாவட்ட வருவாய் அதிகாரி நரசிம்முலு பேசுகையில், ‘மாநிலத்தில் புதிய அரசு அமைந்த பிறகு, பழங்குடியினர் நலன் மற்றும் மேம்பாடு குறித்த எஸ்சி எஸ்டி கண்காணிப்புக் குழு கூட்டம் இரு முறை நடைபெற்றது.

மாவட்ட அளவில் பழங்குடியினர் பகுதிகள் தொடர்பான பிரச்னைகளைத் தீர்க்கவும், இக்கூட்டத்தில் விவாதிக்கப்பட்ட பிரச்னைகளை ஆட்சியரின் கவனத்திற்குக் கொண்டு செல்லவும் ஆணையத் தலைவர் நடவடிக்கை எடுக்க வேண்டும்.

மாநில அளவிலான கொள்கையின் ஒரு பகுதியாக மாவட்டத்தில் உள்ள முக்கியமான பிரச்னைகளில் ஒன்று பழங்குடியினர் பகுதிகளில் பள்ளி குடியிருப்பு தொடர்பானது. தலைவர் இதில் கவனம் செலுத்தி மாநில அளவில் விவாதித்து பிரச்னை தீர்க்கப்படுவதை உறுதி செய்ய வேண்டும்’ என பேசினார்.