தரவரிசை பட்டியல் வெளியீடு: பொறியியல் துணை கலந்தாய்வு தொடங்கியது

சென்னை: பொறியியல் மாணவர் சேர்க்கைக்கான தரவரிசை பட்டியல் வெளியிடப்பட்டு இணையவழி துணை கலந்தாய்வு நேற்று தொடங்கியது. நடப்பு கல்வி ஆண்டில் பொறியியல் படிப்பில் அரசு ஒதுக்கீட்டு இடங்களை நிரப்புவதற்காகன 3 சுற்று கலந்தாய்வு முடிவடைந்து விட்டது. இதன்மூலம் 1 லட்சத்து 25 ஆயிரத்து 31 இடங்கள் நிரம்பின. இன்னும் 70,403 இடங்கள் காலியாகவுள்ளன. இந்த இடங்கள், பிளஸ் 2 துணைத் தேர்வெழுதி தேர்ச்சி பெற்ற மாணவர்கள் மற்றும் புதிதாக விண்ணப்பிக்கும் மாணவர்களைக் கொண்டு நிரப்பப்படும் என்றும் இதற்காக துணை கலந்தாய்வு நடத்தப்படும் என அறிவிக்கப்பட்டது. இதைத் தொடர்ந்து, துணை கலந்தாய்வுக்கான ஆன்லைன் விண்ணப்ப பதிவு ஆகஸ்ட் 28ம் தேதி தொடங்கி கடந்த 4ம் தேதி முடிவடைந்தது. இவ்வாறு விண்ணப்பித்தோரின் விண்ணப்பங்கள் பரிசீலனை செய்யப்பட்டு கல்விப் பிரிவில் 11,511 பேரும் தொழிற்கல்வி பிரிவில் 258 பேரும், 7.5 சதவீத உள்ஒதுக்கீட்டில் கல்வி பிரிவில் 3,736 பேரும், தொழிற்கல்வி பிரிவில் 47 பேரும் தகுதிபெற்றனர்.

இந்நிலையில், அவர்களின் தரவரிசை பட்டியல் நேற்று வெளியிடப்பட்டு இணையவழி கலந்தாய்வும் தொடங்கியது. மாணவர்கள் கல்லூரியை தேர்வு செய்ய உரிய கால அவகாசம் அளிக்கப்பட்டு தற்காலிக ஒதுக்கீட்டை உறுதிசெய்தவர்களுக்கு கல்லூரி ஒதுக்கீட்டு ஆணை வழங்கப்படும். துணை கலந்தாய்வு 8ம் தேதி (ஞாயிற்றுக்கிழமை) முடிவடைகிறது. இதைத் தொடர்ந்து எஸ்சி-அருந்ததியர் பிரிவில் காலியாக உள்ள இடங்களை எஸ்சி மாணவர்களைக் கொண்டு நிரப்புவதற்கான கலந்தாய்வு செப்டம்பர் 10 மற்றும் 11ம் தேதி நடத்தப்படும் என தமிழ்நாடு பொறியியல் மாணவர் சேர்க்கை செயலாளர் புருஷோத்தமன் தெரிவித்துள்ளார்.