தமிழ்நாட்டுக்கு இதுவரை ரூ.10 லட்சம் கோடியில் தொழில்கள் ஈர்ப்பு ஆக்ஸ்போர்டு பல்கலையில் பெரியார் படம் திறப்பு

* ஜெர்மனி - இங்கிலாந்து ஆகிய நாடுகளுக்கு இன்று பயணம்

* திமுக எம்பி இல்ல திருமண விழாவில் முதல்வர் மு.க.ஸ்டாலின் பேச்சு

சென்னை: திமுக ஆட்சி பொறுப்பேற்ற பிறகு தமிழ்நாட்டிற்கு இதுவரை சுமார் ரூ.10 லட்சம் கோடியில் தொழில்களை ஈர்த்திருக்கிறோம். இன்றைய தினம் ஜெர்மனி, இங்கிலாந்து ஆகிய நாடுகளுக்கு ஒருவார கால பயணம் செய்ய உள்ளதாக முதல்வர் மு.க.ஸ்டாலின் கூறினார். மேலும், ஆக்ஸ்போர்டு பல்கலைக்கழகத்தில் பெரியார் உருவப்படம் திறக்கப்பட இருக்கிறது என்றும் அவர் தெரிவித்தார்.

திமுக சட்டத்துறை செயலாளரும், நாடாளுமன்ற உறுப்பினருமான என்.ஆர்.இளங்கோ-அருணா தம்பதியின் மகள் ராகவி இளங்கோவுக்கும், கனகசபாபதி-சசிகலா தம்பதியரின் மகன் சச்சிந்தர் திருமணம் சென்னையில் நேற்று நடந்தது. திருமணத்தை முதல்வர் மு.க.ஸ்டாலின் தலைமையேற்று நடத்தி வைத்தார்.

அப்போது அவர் பேசியதாவது: திமுகவின் மீது பற்று கொண்டு என்.ஆர்.இளங்கோ தொடர்ந்து கட்சிக்காக பணியாற்றி கொண்டிருக்கக் கூடியவர். அவருடைய கொள்கைப் பிடிப்புமிக்க வாழ்வையும்-வழக்கறிஞர் தொழிலில் சிறப்பாக பணியாற்றுவதையும் பார்த்துதான், கலைஞர் 1996, 2006ல் திமுக ஆட்சி அமைந்தபோது, அவருக்கு அரசு வழக்கறிஞராக பணியாற்றும் வாய்ப்பை வழங்கினார். அவருடைய வழக்கறிஞர் பணியை பாராட்டி நான் மட்டுமல்ல, இங்கிருக்கக் கூடிய நாம் மட்டுமல்ல, பல்வேறு நீதிபதிகளும் அவரை மனம்திறந்து பாராட்டி இருக்கிறார்கள். மூத்த வழக்கறிஞர்களும் அவருடைய திறமையை வியந்து பாராட்டி இருக்கிறார்கள். நீதியை நிலைநாட்டும் அவருடைய திறமையை, திமுக இன்னும் பயன்படுத்திக் கொள்ள வேண்டும் என்று நினைத்துதான் அவருக்கு நாடாளுமன்ற மாநிலங்களவை உறுப்பினராக அனுப்பி வைத்தோம். அவரும் தமிழ்நாட்டின் உரிமைக்காக அந்த அவைக்கு சென்று ஓங்கி குரல் கொடுத்துக் கொண்டு இருக்கிறார்.

இதைவிட, முக்கியமான ஒரு பணியை அவருக்கு நாம் கொடுத்திருக்கிறோம். அதைத்தான் உதயநிதியும் சொன்னார். மற்றவர்களும் பேசும்போது குறிப்பிட்டு சொன்னார்கள். என்.ஆர்.இளங்கோ தான் இன்சார்ஜ். என்ன இன்சார்ஜ் என்றால் அதுதான், வார் ரூம் பணி. தேர்தல் நேரத்தில் வழக்கறிஞர்கள் அணியை தயாராக வைத்திருப்பார். அதோடு, வாக்குச்சாவடி முகவர்களை முறையாக அழைத்து பயிற்சியும் வழங்கி கொண்டிருக்கிறார். தேர்தல் களத்தில் முன்கள வீரர்களாக செயலாற்ற கடமையாற்றிக் கொண்டிருக்கிறார்.

இன்றைக்கு நாடு என்ன மாதிரியான பிரச்னைகளை எதிர்கொண்டிருக்கிறது என்பதை நாம் அனைவரும் நன்கு அறிவோம். குறிப்பாக சொல்ல வேண்டும் என்றால், பீகாரில் மேற்கொள்ளப்பட்டு வரும் சிறப்பு வாக்காளர் திருத்தம்-என்ன மாதிரியான பிரச்னைகளை ஏற்படுத்தி இருக்கிறது என்பதை நான் அதிகம் இங்கு விளக்கி சொல்லவேண்டிய அவசியம் இல்லை. அதற்காகதான், ராகுல் காந்தி ஒரு நடைபயணத்தை மேற்கொண்டிருக்கிறார். மக்களிடையே விழிப்புணர்வு ஏற்படுத்த வேண்டிய சூழல் இன்றைக்கு ஏற்பட்டிருக்கிறது. இரண்டு நாட்களுக்கு முன்பு, நானும் பீகார் சென்று, வாக்காளர் உரிமைப் பயணம் என்று ராகுல் காந்தி நடத்தி வரும் அந்த விழிப்புணர்வு பயணத்தில் பங்கேற்றேன் என்பது உங்களுக்கெல்லாம் நன்றாக தெரியும்.

இந்த நிலை தமிழ்நாட்டில் ஏற்படக் கூடாது என்பதற்காக, இப்போதே நாம் விழிப்புணர்வைப் பெற்று நாம் அதற்காக தயாராக வேண்டும் என்பதற்காகதான் அதை தடுத்து நிறுத்துவதற்கான அத்தனை முயற்சிகளிலும் ஈடுபட்டிருப்பவர்தான் என்.ஆர்.இளங்கோ. நம்முடைய உரிமை சார்ந்த பிரச்னைகள் தொடர்பான கருத்தரங்குகளை நடத்தி, அதில் நீதியரசர்களை பங்கேற்க வைத்து பல ஆன்றோர்கள், சான்றோர்களையெல்லாம் அதில் பங்கேற்க வைத்து அதையும் நடத்திக் கொண்டு இருக்கிறார். நாட்டின் அரசியலமைப்புச் சட்டத்தை பாதுகாப்பதில் என்.ஆர்.இளங்கோ எவ்வளவு உறுதியுடன் இருக்கிறார் என்று, நான் சொல்ல வேண்டும் என்றால், இங்கு மணமக்களுக்கு மாலைகளை மாற்றுவதற்கும், மாங்கல்யத்தை எடுத்துக்கொடுக்கக்கூடிய தாம்பலத்தட்டில் அவர் என்ன வைத்திருந்தார் என்றால், கலைஞர் எழுதிய திருக்குறள் உரை, அரசியலமைப்புச் சட்டம் அதை வைத்துதான் அந்த மாங்கல்யத்தையும், மாலையையும் வைத்து தட்டை காண்பித்தார்.

அதைதான் எடுத்துவந்து கொடுத்தேன். இப்படிப்பட்ட என்.ஆர்.இளங்கோ இல்ல திருமணத்தில்-அதுவும் சுயமரியாதை உணர்வோடு நடைபெறும் திருமணத்தில், நானும் உங்களோடு சேர்ந்து கலந்துகொண்டு மணமக்களை வாழ்த்துவதில் பெருமைப்படுகிறேன். நாளையதினம் (இன்றைய தினம்) நான் ஜெர்மனி-இங்கிலாந்து ஆகிய நாடுகளுக்கு ஒரு வார கால பயணம் மேற்கொள்ள இருக்கிறேன். திராவிட மாடல் ஆட்சி பொறுப்பேற்ற பிறகு, தமிழ்நாட்டிற்கு இதுவரை சுமார் 10 லட்சம் கோடி ரூபாய் மதிப்பிலான தொழில்களை ஈர்த்திருக்கிறோம்.

இதற்கான என்னுடைய வெளிநாட்டு பயணங்களின்போது, முதலீட்டாளர்களும் தொழில் நிறுவனங்களும் தமிழ்நாட்டில் முதலீடு செய்ய மனப்பூர்வமாக ஆர்வம் காட்டுவதை பார்த்துக்கொண்டிருக்கிறேன். இப்போது இந்த பயணத்தில் என்ன திட்டமிட்டிருக்கிறோம் என்றால், அதைப்பற்றி நாளைய தினம் நான் விமானத்தில் ஏறி புறப்படுவதற்கு முன்பு நிச்சயமாக பத்திரிகையாளர்களை சந்தித்து அந்த விவரங்களை எல்லாம் சொல்லப்போகிறேன். நம்முடைய தமிழ்ச்சமூகம் சுயமரியாதையுடன் தலைநிமிர்ந்து நடைபோடுவதற்கு காரணம், தந்தை பெரியார்!

அதனால்தான், தந்தை பெரியாரைப் பற்றி எழுதிய பாவேந்தர் பாரதிதாசன் சொன்னார், தொண்டு செய்து பழுத்த பழம் தூய தாடி மார்பில் விழும் மண்டைச் சுரப்பை உலகு தொழும் மனக்குகையில் சிறுத்தை எழும்! என்று எழுதினார். தந்தை பெரியாரின் சிந்தனையை உலகு தொழும் காட்சியை நாம் இந்த பயணத்தில் பார்க்கப்போகிறோம். உலகின் மிகப்பெரிய அறிஞர்களை தந்த, புகழ்மிக்க அறிவுசார் நிறுவனமாகப் போற்றப்படும் ஆக்ஸ்போர்டு பல்கலைக்கழகத்தில், அறிவாசான் தந்தை பெரியாரின் உருவப்படம் திறக்கப்பட இருக்கிறது. அதை என்னுடைய திருக்கரங்களால் திறந்து வைக்க இருக்கிறேன் என்று எண்ணி பார்க்கும்போது இப்போதே மகிழ்ச்சிக் கடலில் மிதந்துக்கொண்டு இருக்கிறேன்.

தந்தை பெரியார் தமிழ்நாட்டில் பிறந்து, தமிழில் பேசி-எழுதியிருந்தாலும், அவருடைய சிந்தனைகள் இந்த உலகத்திற்கானது; அனைவருக்கும் பொதுவானது! அவர் வலியுறுத்திய, சுயமரியாதை - பகுத்தறிவு - பெண் விடுதலை-ஏற்றத்தாழ்வு மறுப்பு-தன்னம்பிக்கை - அனைவரும் சமம் ஆகிய கருத்துகளுக்கு எல்லைகள் கிடையாது. இவை உலக மக்கள் அனைவரும் பொதுவான வகையில் ஏற்றுக்கொண்டு இருக்கிறார்கள். அப்படிப்பட்ட அறிவுமேதை உலகளவில் அடையாளம் காணப்பட்டு, அங்கீகரிக்கப்படுவது தமிழ்நாட்டிற்கு பெருமை. இவ்வாறு அவர் பேசினார்.

* தமிழ்ச்சமூகம் சுயமரியாதையுடன் தலைநிமிர்ந்து நடைபோடுவதற்கு காரணம், தந்தை பெரியார்.

* பெரியாரின் சிந்தனையை உலகு தொழும் காட்சியை நாம் இந்த பயணத்தில் பார்க்கப்போகிறோம்.

* பெரியார் தமிழ்நாட்டில் பிறந்து, தமிழில் பேசி-எழுதியிருந்தாலும், அவருடைய சிந்தனைகள் இந்த உலகத்திற்கானது; அனைவருக்கும் பொதுவானது.

* பெரியார் வலியுறுத்திய, சுயமரியாதை - பகுத்தறிவு - பெண் விடுதலை-ஏற்றத்தாழ்வு மறுப்பு-தன்னம்பிக்கை - அனைவரும் சமம் ஆகிய கருத்துகளுக்கு எல்லைகள் கிடையாது.