கடந்த 11 ஆண்டுகளாக தமிழ்நாட்டை வஞ்சித்து வரும் ஒன்றிய பாஜ அரசின் வஞ்சகத்தை நாடாளுமன்றத்தில் எடுத்துரைப்போம்

* தமிழ்நாட்டுக்கான கல்வி -நிதி உள்ளிட்ட உரிமைகளை நிலைநாட்டுவோம், முதல்வர் மு.க.ஸ்டாலின் தலைமையில் நடந்த திமுக எம்பிக்கள் கூட்டத்தில் தீர்மானம்

சென்னை: கடந்த 11 ஆண்டுகளாக தமிழ்நாட்டை வஞ்சித்து வரும் ஒன்றிய பாஜ அரசின் வஞ்சகத்தை நாடாளுமன்றத்தில் எடுத்துரைப்போம். தமிழ்நாட்டுக்கான கல்வி- நிதி உள்ளிட்ட உரிமைகளை நிலைநாட்டுவோம் என்று முதல்வர் மு.க.ஸ்டாலின் தலைமையில் நடந்த திமுக எம்பிக்கள் கூட்டத்தில் தீர்மானம் நிறைவேற்றப்பட்டது. நாடாளுமன்ற மழைக்கால கூட்டத்தொடர் வரும் ஜூலை 21ம் தேதி தொடங்குகிறது.

இந்நிலையில், நாடாளுமன்ற கூட்ட தொடர் குறித்து விவாதிக்கும் வகையில் திமுக மக்களவை, மாநிலங்களவை எம்பிக்கள் கூட்டம் திமுக தலைவர் முதல்வர் மு.க.ஸ்டாலின் தலைமையில் சென்னை அண்ணா அறிவாலயம், ‘முரசொலி மாறன் வளாகத்தில்’ உள்ள கூட்ட அரங்கில் நேற்று நடந்தது. கூட்டத்தில் திமுக பொதுச்செயலாளர் துரைமுருகன், பொருளாளர் டி.ஆர்.பாலு, கனிமொழி உள்ளிட்ட அனைத்து மக்களவை-மாநிலங்களவை உறுப்பினர்கள் கலந்து கொண்டனர்.

இதில், நாடாளுமன்ற கூட்டத் தொடரில் திமுகவின் நிலைப்பாடு எப்படி இருக்க வேண்டும், எந்தெந்த பிரச்னைகள் எழுப்ப வேண்டும் என்பது தொடர்பாக எம்பிக்களுக்கு முதல்வர் மு.க.ஸ்டாலின் அறிவுரை வழங்கினார். கூட்டத்தில் நிறைவேற்றப்பட்ட தீர்மானங்கள்: முதல்வர் மு.க.ஸ்டாலின் கடந்த 24.5.2025 அன்று டெல்லியில் நடந்த நிதி ஆயோக் கூட்டத்தில் வலியுறுத்திய “காவிரி, வைகை, தாமிரபரணி ஆறுகளைச் சுத்தம் செய்து மீட்கும் புதிய திட்டம்”,

“ஒன்றிய அரசின் திட்டங்களுக்கு, அனைவருக்கும் தொடர்பு மொழியாக இருக்கும் ஆங்கிலப் பெயர்களை சூட்டுதல்”, “மும்மொழிக் கொள்கையை திணித்து, பின்னர் மகாராஷ்டிரா மக்களின் எதிர்ப்புக்கு பணிந்து பின்வாங்கினாஸ்ரீநிலம் என்பதால் எஸ்எஸ்ஏ நிதியை அளித்து, தமிழ்நாட்டுக்கு எஸ்எஸ்ஏ நிதியை மாற்றாந்தாய் மனப்பான்மையுடன் மறுப்பது”, “ஒன்றிய வரி வருவாயில் மாநிலங்களுக்கு 50 விழுக்காடு வரிப் பகிர்வு”,

“15வது நிதிக்குழுவின் பரிந்துரைப்படி தர வேண்டிய 41 விழுக்காடு வரி வருவாய் பங்கிற்குப் பதிலாக 33.16 விழுக்காடு பங்கு மட்டுமே அளித்து மாநிலங்களுக்கு இழைக்கப்படும் நிதி அநீதி”, “ஒன்றிய அரசும் - மாநில அரசும் இணைந்து நிறைவேற்றும் திட்டங்களுக்கு மாநில அரசின் பங்கு தொடர்ந்து உயர்ந்து வருவதால் ஏற்பட்டு வரும் நிதி நெருக்கடி” ஆகியவற்றை நாடாளுமன்றத்தில் அழுத்தமாக எடுத்துரைப்பதுடன்,

தமிழர்களின் தனித்துவமிக்க பண்பாட்டை அறிவியல்பூர்வமாக நிரூபித்த இரும்பின் தொன்மை குறித்து ஒன்றிய அரசு மவுனம் காப்பது, கீழடி ஆய்வறிக்கையை ஏற்க மறுப்பது, தமிழ்நாட்டிற்குரிய ரயில் திட்டங்களுக்கு நிதியளிக்காமல் வஞ்சிப்பது, உழைக்கும் கிராமப்புற மக்களுக்கான மகாத்மா காந்தி தேசிய ஊரக வேலை உறுதித்திட்ட நிதியை முறையாக வழங்காமல் தாமதிப்பது, மாநிலத்தின் நிதி தன்னாட்சிக்கு ஆபத்து விளைவிக்கும் வகையில் தமிழ்நாட்டிற்கான நிதியுரிமையைப் பறிப்பது என தமிழ்நாடு தொடர்ச்சியாக வஞ்சிக்கப்படுவதை கண்டித்து,

நமக்கான உரிமைக்குரலை ஓங்கி ஒலிப்பதுடன், ஜம்மு-காஷ்மீருக்கு மாநில தகுதி கொடுக்காமல் தட்டிக்கழிப்பது, வாக்காளர் சீர்திருத்தம் என்ற பெயரில் பீகார் வாக்காளர் பட்டியல் திருத்தத்தில் கோடிக்கணக்கானவர்களின் வாக்குரிமையைப் பறித்து ஜனநாயகத்தின் ஆணிவேரில் வெந்நீரை ஊற்றும் நோக்கில் தன்னாட்சிப் பெற்ற தேர்தல் ஆணையத்தைப் பயன்படுத்துவது, தமிழ்நாடு மீனவர்கள் இலங்கை அரசால் தொடர்ந்து கைது செய்யப்படுவது,

கச்சத்தீவு மீட்பு, கல்வியை மாநிலப் பட்டியலுக்குக் கொண்டு வருவது, திருக்குறளை தேசிய நூலாக அறிவிப்பது, தமிழ் உள்ளிட்ட அந்தந்த மாநிலங்களின் தாய்மொழிகளைப் புறக்கணித்து இந்தியையும் சமஸ்கிருதத்தையும் திணிப்பது, ஏழை-எளிய மக்களைப் பாதிக்கும் ரயில் கட்டண உயர்வு உள்ளிட்ட பிரச்னைகளையும் திமுகவின் சார்பில் நாடாளுமன்றத்தில் எழுப்பிடவும்,

தமிழ்நாட்டின் நிதியுரிமை-மொழியுரிமை-கல்வியுரிமை ஆகியவற்றுடன் இந்தியாவின் கூட்டாட்சி உரிமை உள்ளிட்ட அனைத்திற்காகவும் வருகின்ற மழைக்காலக் கூட்ட தொடரில் திமுக எம்பிக்கள் உரக்க குரல் எழுப்பி, கடந்த 11 ஆண்டுகளாக தமிழ்நாட்டை வஞ்சித்து, தமிழர்களுக்கு எதிரான பண்பாட்டு ஊடுருவலை நிகழ்த்தும் ஒன்றிய பாஜ அரசுக்கு எதிரான தமிழ்நாட்டு மக்களின் உணர்வுகளை திமுக தலைவர்- முதல்வர் மு.க.ஸ்டாலனின் வழிகாட்டுதலின்படி, நாடாளுமன்ற இரு அவைகளிலும் திமுக உறுப்பினர்கள் உறுதியாகவும் ஒருங்கிணைந்தும் வெளிப்படுத்துவார்கள். இவ்வாறு தீர்மானத்தில் கூறப்பட்டுள்ளது.