காசி தமிழ் சங்கமத்தில் தமிழ் கற்றுக்கொள்ளுங்கள்: மன் கி பாத் உரையில் பிரதமர் மோடி அறிவுறுத்தல்

புதுடெல்லி: வாரணாசியில் நடக்கும் காசி தமிழ் சங்கமத்தில் தமிழ் கற்கும் வாய்ப்பை பெறுமாறு பிரதமர் மோடி மன் கி பாத் உரையில் வலியுறுத்தி இருக்கிறார். மன் கி பாத் எனப்படும் 128வது ‘மனதின் குரல்’ வானொலி உரையில் பிரதமர் மோடி பேசியதாவது, ‘‘வந்தே மாதரம் பாடல் இயற்றப்பட்ட 150வது ஆண்டு விழா கொண்டாடப்பட்டது. நாடாளுமன்றத்தில் அரசியலமைப்பு தின கொண்டாட்டம் நடைபெற்றது.

அயோத்தியில் உள்ள ராமர் கோயிலில் காவிக்கொடி ஏற்றப்பட்டது. நவம்பர் மாதம் பல உத்வேகங்களை நமக்குக் கொண்டு வந்திருக்கிறது. ஐதராபாத்தில் உலகின் மிகப்பெரிய எல்இஏபி இயந்திரஎம்ஆர்ஓ வசதி திறப்பு விழா நடந்தது. இந்திய கடற்படையில் ஐஎன்எஸ் மாஹே நீர்மூழ்கி எதிர்ப்பு போர்க்கப்பல் இணைக்கப்பட்டது. கடந்த வாரம் தான் ஸ்கைரூட்டின் இன்பினிட்டி வளாகம் இந்தியாவின் விண்வெளி சுற்றுச்சூழல் அமைப்புக்கு ஒரு புதிய உத்வேகத்தை அளித்துள்ளது.

இது இந்தியாவின் புதிய சிந்தனை, புதுமை மற்றும் இளைஞர் சக்தியின் பிரதிபலிப்பாகும். இஸ்ரோ ஏற்பாடு செய்த ஒரு தனித்துவமான ட்ரோன் போட்டியின் வீடியோ சமூக ஊடகங்களில் வெளியிடப்பட்டது. இந்த வீடியோவில் நமது நாட்டின் இளைஞர்கள், குறிப்பாக நமது ஜென்-இசட் , செவ்வாய் கிரகத்தை போன்ற சூழ்நிலையில் டிரோன்களை இயக்குவதற்கு முயற்சித்தனர். செவ்வாய் கிரகத்தில் ஜிபிஎஸ் இல்லாத நிலையில் கேமராக்கள் மற்றும் உள்ளமைக்கப்பட்ட மென்பொருளின் உதவியுடன் மட்டுமே இளைஞர்கள் டிரோன்களை பறக்கவிட்டனர்.

தோல்வியில் இருந்து வெளிவந்த பிறகு உருவாக்கப்பட்ட புதிய நம்பிக்கையின் வெற்றி இது. நமது இளைஞர்களின் அர்ப்பணிப்பையும், நமது விஞ்ஞானிகளின் அர்ப்பணிப்பு உணர்வையும் நான் பார்க்கும் ஒவ்வொரு முறையும் என் இதயம் உற்சாகத்தால் நிரம்பி வழிகின்றது. இளைஞர்களின் இந்த அர்ப்பணிப்பானது விக்சித் பாரத்தின் மிகப்பெரிய பலங்களில் ஒன்றாகும்.

காசி-தமிழ் சங்கமத்தின் நான்காவது மதிப்பு டிசம்பர் 2ம் தேதி வாரணாசியில் தொடங்குகின்றது. இந்த ஆண்டு காசி தமிழ் சங்கமம் மிகவும் சுவாரஸ்யமான கருப்பொருளை கொண்டுள்ளது. ‘தமிழ் கற்கலாம்’ இது உலகின் பழமையான மொழி மற்றும் உலகின் பழமையான நகரங்களில் ஒன்றின் சங்கமம். காசி தமிழ்ச் சங்கமத்தில் ஒரு பகுதியாக தமிழ் கற்றுக்கொள்ளுங்கள் என்று உங்களை நான் கேட்டுக்கொள்கிறேன்” என்று குறிப்பிட்டுள்ளார்.