மாணவி ஹிஜாப் அணிய தடை விதித்த பள்ளி: கேரள அமைச்சர் கடும் எச்சரிக்கை

திருவனந்தபுரம்: கேரள மாநிலம் எர்ணாகுளம் அருகே பள்ளுருத்தியில் கிறிஸ்தவ சபைக்கு சொந்தமான ஒரு தனியார் மேல்நிலைப்பள்ளி உள்ளது. கடந்த சில தினங்களுக்கு முன் 8ம் வகுப்பு படிக்கும் ஒரு மாணவி ஹிஜாப் அணிந்து வந்தார். ஆனால் சீருடை அணிந்து வந்தால் மட்டுமே அனுமதிக்க முடியும் என்று கூறி பள்ளியில் நுழைய அந்த மாணவிக்கு தடை விதிக்கப்பட்டது. இதுகுறித்து அறிந்த கம்யூனிஸ்ட், எஸ்டிபிஐ கட்சியினர் பள்ளி முன் போராட்டம் நடத்தினர்.

இந்நிலையில் நேற்று பள்ளி நிர்வாகிகளுடன் மாணவியின் பெற்றோர், எர்ணாகுளம் எம்பி ஹைபி ஈடன் மற்றும் பிரமுகர்கள் பேச்சுவார்த்தை நடத்தினர். இதில் பள்ளியின் நிபந்தனைகளை ஏற்றுக்கொள்வதாக மாணவியின் பெற்றோர் தெரிவித்தனர். இது பற்றி விசாரணைக்கு உத்தரவிட்ட கேரள கல்வித்துறை அமைச்சர் சிவன்குட்டி தனியார் பள்ளி நிர்வாகம் மீது கடும் நடவடிக்கை எடுக்கப்படும் என்று எச்சரித்துள்ளார்.