கலசபாக்கம்: கர்நாடக மாநிலம், பெங்களூரு அடுத்த பெல்லாரி தேவி நகரை சேர்ந்தவர் விஸ்வநாதன் மகன் மனோஜ்குமார்(21). பொறியியல் கல்லூரியில் 2ம் ஆண்டு படித்து வந்தார். இவர் நண்பர்கள் 3 பேருடன் நேற்று முன்தினம் திருவண்ணாமலை மாவட்டம், கலசப்பாக்கம் அருகே பர்வதமலை கோயிலுக்கு சென்றார். மலை மீது ஏறி சுவாமி தரிசனம் செய்து விட்டு மாலை 5.30 மணியளவில் கீழே இறங்கினர். இரவு 7 மணியளவில் மலை அடிவாரத்தில் உள்ள பச்சையம்மன் கோயில் அருகே வந்தபோது மனோஜ்குமார், திடீரென மூச்சுத்திணறல் ஏற்பட்டு மயங்கி விழுந்தார். நண்பர்கள் அவரை மீட்டு கலசப்பாக்கம் அரசு மருத்துவமனைக்கு கொண்டு சென்றனர். அங்கு பரிசோதித்த டாக்டர்கள், அவர் ஏற்கனவே இறந்து விட்டதாக தெரிவித்தனர்.
