நாங்கள் யாருக்கும் அடிமை இல்லை: எல்.முருகனுக்கு செல்லூர் ராஜூ பதிலடி

மதுரை: அதிமுக தனது கொள்கையில் இருந்து தவறாது. நாங்கள் யாருக்கும் அடிமை இல்லை என அதிமுக மாஜி அமைச்சர் செல்லூர் ராஜூ, ஒன்றிய அமைச்சர் எல்.முருகனுக்கு பதிலடி கொடுத்துள்ளார். பாஜவுடன் அதிமுக கூட்டணி ைவத்தது கட்சியின் நிர்வாகிகள் மட்டுமின்றி அடிமட்டத் தொண்டர்கள் வரை அதிருப்தியை ஏற்படுத்தியுள்ளது. திராவிட சித்தாந்தத்தில் தோன்றிய அதிமுக, பாஜவுடன் கூட்டணி அமைத்து காவிமயமாகி வருவதாக நடுநிலையாளர்கள் மத்தியில் விமர்சனத்தை ஏற்படுத்தி வருகிறது.

இந்நிலையில், சென்னையில் ஒன்றிய அமைச்சர் எல்.முருகன் நிருபர்களிடம் பேசும்போது, ‘‘அதிமுகவை ஆர்எஸ்எஸ் வழிநடத்தினால் என்ன தவறு? இதுகுறித்து அதிமுக பொதுச்செயலாளர் எடப்பாடி பழனிசாமி விளக்கம் அளிக்க வேண்டும்’’ என்று கூறியிருந்தார். இந்நிலையில் அதிமுக மாஜி அமைச்சர் செல்லூர் ராஜூ மதுரையில் நேற்று நிருபர்களை சந்தித்தார்.

அவரிடம், ‘‘ஆர்எஸ்எஸ் வலிமை பெற அதிமுக துணைபோவது கவலை அளிப்பதாக தொல்.திருமாவளவன் கூறியிருந்தாரே’’ என கேட்க, செல்லூர் ராஜூவோ, ‘‘அதிமுக தனது கொள்கையில் இருந்து என்றும் வழுவாது. தவறாது. அது எல்லோருக்கும் தெரியும். எங்களுக்கென்று ஒரு கொள்கை இருக்கிறது.

அதன் அடிப்படையில் தான் எம்ஜிஆர், ஜெயலலிதா, எடப்பாடி பழனிசாமி ஆகியோர் வழியில் நாங்களும் இருக்கிறோம். நாங்கள் யாருக்கும் எஜமானர் இல்லை. யாருக்கும் அடிமையும் இல்லை. எங்களுக்கும் எஜமானர் யாருமில்லை’’ என்றார். அதிமுகவை ஆர்எஸ்எஸ் வழிநடத்தினால் என்ன தவறு என்று கேள்வி எழுப்பிய ஒன்றிய அமைச்சர் எல்.முருகனுக்கும் இதன்மூலம் அவர் பதிலடி கொடுத்துள்ளார்.