பாலியல் புகாரில் கைதால் ஆத்திரம் தலையை துண்டித்து அண்ணி படுகொலை: கொழுந்தன் வெறிச்செயல்

சிதம்பரம்: கடலூர் மாவட்டம் சிதம்பரம் அருகே காட்டுக்கூடலூர் குளத்தங்கரை தெருவை சேர்ந்தவர் கோபாலகிருஷ்ணன் மனைவி தமிழரசி (35). இவர்களுக்கு ஹரிகிருஷ்ணன் (13), ஹரிசக்தி (10) என்ற 2 மகன்கள் உள்ளனர். கணவன், மனைவி இடையே கருத்து வேறுபாடு ஏற்பட்டு, கடந்த 10 ஆண்டுகளாக பிரிந்து வாழ்ந்து வந்ததாக கூறப்படுகிறது. இந்நிலையில் கோபாலகிருஷ்ணன் சென்னைக்கு சென்று, அங்கு வேறு ஒரு பெண்ணை திருமணம் செய்து கொண்டு சென்னையில் வசித்து வருவதாக கூறப்படுகிறது.தமிழரசி குழந்தைகளுடன் கணவர் தம்பிகளான பாலகிருஷ்ணன், முருகானந்தம் ஆகியோருடன் காட்டுக்கூடலூரில் உள்ள வீட்டில் வசித்து வந்துள்ளார்.

இந்நிலையில் பாலகிருஷ்ணன், முருகானந்தம் ஆகியோர் பாலியல் துன்புறுத்தல் செய்வதாக கடந்த சில நாட்களுக்கு முன் சிதம்பரம் தாலுகா காவல் நிலையத்தில் தமிழரசி புகார் அளித்தார். புகாரின் பேரில் 2 பேர் மீதும் பெண்கள் வன் கொடுமை சட்டத்தின் கீழ் வழக்கு பதிந்து, முருகானந்தத்தை போலீசார் கைது செய்து சிறையில் அடைத்தனர். தலைமறைவாக இருந்த பாலகிருஷ்ணன் முன் ஜாமீன் பெற்று ஒரு வாரத்துக்கு முன் வெளியில் வந்துள்ளார்.

இதையடுத்து கைது செய்யப்பட்ட முருகானந்தமும் விடுதலையாகி வந்துள்ளார். இருவரும் காவல் நிலையத்திற்கு செல்ல காரணமாக இருந்த அண்ணி மீது கோபத்தில் இருந்து வந்துள்ளனர். இந்நிலையில் பாலகிருஷ்ணன் நேற்று மாலை போதையில் வீட்டிற்கு சென்று தமிழரசியிடம் வாக்குவாதம் செய்துள்ளார். தகராறு முற்றவே ஆத்திரத்தில் பாலகிருஷ்ணன் அரிவாளை எடுத்து தமிழரசி கழுத்தை அறுத்து தலையை துண்டித்து விட்டு அங்கிருந்து தப்பினார். முருகானந்தம் மட்டும் வீட்டிலேயே இருந்துள்ளார். இது குறித்து தாலுகா போலீசார் வழக்கு பதிந்து முருகானந்தத்தை கைது செய்தனர்.