இலங்கை கடற்படை அட்டூழியம்: எல்லை தாண்டி மீன் பிடித்ததாக ராமேஸ்வரம் மீனவர்கள் 5 பேர் சிறைபிடிப்பு!!

தூத்துக்குடி: கச்சத்தீவு அருகே கடலில் மீன்பிடித்துக் கொண்டிருந்த 5 மீனவர்களை விசைப்படகுடன் இலங்கை படை சிறைபிடித்தது. தங்கள் எல்லைக்கு வந்து மீன்பிடிப்பதாக கூறி, மீனவர்கள் மீது இலங்கை கடற்படையினர் தாக்குதல் நடத்துவதும், அவர்களை கைது செய்வதும், அவர்களின் விசைப்படகுகளை பறிமுதல் செய்வதும், அதேபோல இலங்கை கடற்கொள்ளையர்கள் மீனவர்கள் மீது தாக்குதல் நடத்தி, அவர்களிடம் இருக்கக்கூடிய மீன்பிடி தளவாடங்களை பொருட்களை பிடிங்கி செல்வதும் தொடர்கதையாகி வருகிறது. இந்த இலங்கை கடற்படையின் இந்த அராஜக போக்கிற்கு முற்றுப்புள்ளி வைக்குமாறு ஒன்றிய அரசிடம் மாநில அரசு தொடர்ந்து வலியுறுத்தி வருகிறது.

இந்த நிலையில், ராமேஸ்வரம் மீனவர்கள் தனுஷ்கோடிக்கும் தலைமன்னாருக்கும் இடையே இந்திய எல்லையில் விசைப்படகுகளுடன் மீன்பிடித்துக் கொண்டிருந்தனர். அப்போது அங்கு அவர்களை சுற்றி வளைத்த இலங்கை கடற்படை, எல்லை தாண்டி மீன் பிடித்ததாக கூறி இலங்கை கடற்படை 5 மீனவர்களை கைது செய்தது. மேலும், ஜஸ்டின் என்பவருக்குச் சொந்தமான விசைப்படகையும் இலங்கை கடற்படை பறிமுதல் செய்தது. கைது செய்யப்பட்ட 5 பேரும் மன்னார் கடற்படை முகாமிற்கு அழைத்துச் செல்லப்பட்டதாக தகவல் வெளியாகி உள்ளது. இலங்கை கடற்படையின் இந்த அட்டூழியங்களுக்கு முடிவு கட்ட வேண்டும் என்று மீனவர்கள் தொடர்ந்து கோரிக்கை வைத்து வருகின்றனர்.