கொல்லிமலை அடிவாரத்தில் தீ விபத்து ஏற்பட்ட இடத்தில் செழித்து வளர்ந்த மரக்கன்றுகள்

சேந்தமங்கலம் : கொல்லிமலை அடிவாரத்தில் தீ விபத்து ஏற்பட்ட இடத்தில் நடவு செய்யப்பட்ட மரக்கன்றுகள், மழையால் செழித்து வளர்ந்து பசுமையாக காட்சியளிக்கிறது.

நாமக்கல் மாவட்டத்தில் சிறந்த சுற்றுலா தலமாக கொல்லிமலை விளங்குகிறது.

தமிழகம் மட்டுமின்றி அண்டைய மாநிலங்களிலிருந்தும், ஏராளமான சுற்றுலா பயணிகள் வந்து செல்கின்றனர். அடிவாரம் காரவள்ளியில் இருந்து 70 கொண்டை ஊசி வளைவுகளை கடந்து கொல்லிமலைக்கு செல்ல வேண்டும். மலைச்சாலையில் எங்கு பார்த்தாலும் பசுமையாக காட்சியளிக்கும்.

காரவள்ளி வனத்துறை சோதனைச்சாவடியில் இருந்து 10 கொண்டை ஊசி வளைவுகள் வரை இரு புறங்களிலும் மூங்கில் மரங்கள் அடர்ந்துள்ளது. கடந்த ஆண்டு கோடை காலத்தில் அடிவார பகுதியில் திடீரென தீ விபத்து ஏற்பட்டது.

இதில், 10வது கொண்டை ஊசி வளைவுகள் வரை, மலைப்பாதையின் இருபுறங்களிலும் மரங்கள் எரிந்து நாசமானது. ஆயிரக்கணக்கான மரங்கள் கருகியதால், அதனை ஈடுகட்டும் வகையில், வனத்துறையினர் தீ விபத்து ஏற்பட்ட பகுதிகளில் பல்வேறு நடவடிக்கைகளை மேற்கொண்டு, புதிய மரக்கன்றுகளை நடவு செய்து பராமரித்து வந்தனர்.

ஆடு -மாடுகள் கடிக்காத வகையில் மூங்கில் கூண்டுகள் அமைக்கப்பட்டு, டேங்கர் லாரி மூலம் தண்ணீர் கொண்டு வந்து நடவு செய்யப்பட்ட மரக்கன்றுகளுக்கு பாய்ச்சி வளர்த்து வந்தனர். இந்நிலையில், கடந்த சில மாதங்களாக கொல்லிமலையில் தொடர்ந்து மழை பெய்து வருவதால், வனத்துறையினரால் நடவு செய்யப்பட்ட மரக்கன்றுகள் அடர்த்தியாக செழித்து வளர்ந்து, பசுமையாக காட்சியளிக்கிறது. கொல்லிமலைக்கு சுற்றுலா வரும் பயணிகள், பசுமையான வனப்பகுதியை ரசித்தவாறு செல்கின்றனர்.