சபரிமலை கோயிலில் தனிநபர் வழங்கிய ஐயப்பன் சிலை பிரதிஷ்டைக்கு தடை: கேரள உயர்நீதிமன்றம் உத்தரவு

திருவனந்தபுரம்: சபரிமலை கோயிலில் தனி நபர் வழங்கும் ஐயப்பன் சிலையை பிரதிஷ்டை செய்வதற்கு கேரள உயர்நீதிமன்றம் தடை விதித்துள்ளது. பஞ்சலோகத்தில் உருவாக்கப்பட்ட ஐயப்பன் சிலையை சபரிமலை கோயிலில் பிரதிஷ்டை செய்ய தனி நபர் ஒருவர் வழங்கி உள்ளார். தனி நபர் வழங்கிய ஐயப்பன் சிலையை சபரிமலை கோயிலில் பிரதிஷ்டை செய்ய திருவாங்கூர் தேவசம் போர்டு சிறப்பு ஆணையர் அனுமதி அளித்துள்ளார். இதையடுத்து சிலை பிரதிஷ்டை தொடர்பான வழக்கை தானே முன்வந்து விசாரணைக்கு கேரள உயர்நீதிமன்றம் ஏற்று கொண்டது. தனியார் வழங்கிய சிலையை பிரதிஷ்டை செய்யும் அனுமதிக்கு 2 வாரம் தடை விதித்தது நீதிபதிகள் அனில் கே.நரேந்திரன், முரளி கிருஷ்ணா அமர்வு உத்தரவிட்டது.

பஞ்சலோகத்தில் ஆன ஐயப்பன் சிலையை தனி நபர் ஒருவர் துண்டு பிரசுரங்கள் வெளியிட்டு நிதி வசூல் செய்துள்ளார். நன்கொடை வழங்குவதற்கு வங்கிக் கணக்கு எண், கியூ ஆர் கோடு, செல்போன் எண்களையும் தனி நபர் அளித்திருக்கிறார். தனி நபர் நன்கொடை வசூல் குறித்து ஏற்கனவே கேரள உயர்நீதிமன்றம் விசாரணை செய்திருந்தது. குறிப்பிட்ட நபருக்கு எந்த அனுமதியும் வழங்கப்படவில்லை என தேவசம் போர்டு விளம்பரப்படுத்தவும் கேரள ஐகோர்ட் ஏற்கனவே உத்தரவிட்டு இருந்தது. தனி நபர் வழங்கிய ஐயப்பன் சிலையை பிரதிஷ்டை செய்ய அனுமதி அளித்த கோப்புகளையும் தாக்கல் செய்ய ஐகோர்ட் உத்தரவிட்டிருந்தது.

இந்நிலையில், கோப்புகளை ஆராய்ந்ததில், ஆணையரின் அறிக்கை இல்லாமலேயே சிலை பிரதிஷ்டைக்கு தேவசம் போர்டு தலைவர் அனுமதி வழங்கி இருக்கிறார். சிலைக்கு அனுமதி அளித்தது தொடர்பாக ஒருவாரத்தில் பிரமாணப் பத்திரம் தாக்கல் செய்யுமாறு தேவசம் போர்டு செயலாளருக்கு நீதிமன்றம் உத்தரவிட்டுள்ளது. சிலை தயாரிப்பதற்காக வசூலிப்புத் தொகையை வங்கிக் கணக்கில் இருந்து எடுத்துவிடாமல் தடுக்குமாறு போலீசுக்கு உத்தரவு பிறப்பிக்கப்பட்டுள்ளது. மேலும், உரிய அனுமதியின்றி நிதி வசூல் செய்தது தொடர்பாக வழக்குப்பதிவு செய்யவும் காவல்துறைக்கு உயர்நீதிமன்றம் ஆணை பிறப்பித்துள்ளது.