மிளகாய்பொடி பட்டப்பெயரை நீக்குங்க.. ரவுடி ‘மிளகாய்பொடி’ வெங்கடேசன் ஐகோர்ட்டில் மனு

சென்னை: தமது பெயரில் உள்ள மிளகாய்ப்பொடி என்ற பட்டப்பெயரை நீக்குமாறு புழல் சிறை நிர்வாகத்திற்கு உத்தரவிடக்கோரி ரவுடி மிளகாய்ப்பொடி வெங்கடேசன் சார்பில் சென்னை உயர் நீதிமன்றத்தில் மனுத்தாக்கல் செய்யப்படுள்ளது. சென்னை பாடியநல்லூரை சேர்ந்தவர் மிளகாய்ப்பொடி வெங்கடேஷ் என்ற கே.வெங்கடேஷ் மீது தமிழ்நாடு மற்றும் ஆந்திராவில் பல்வேறு வழக்குகள் நிலுவையில் உள்ளன. குண்டர் சட்டத்தின் கீழ் கைது செய்யப்பட்ட வெங்கடேஷ் தற்போது புழல் சிறையில் அடைக்கப்பட்டுள்ளார்.

இந்நிலையில், அவர் சென்னை உயர் நீதிமன்றத்தில் தாக்கல் செய்த மனுவில், தமது தாயார் பதினைந்து ஆண்டுகள் மிளகாய்ப்பொடி வியாபாரம் செய்து வந்ததால் சிறையில் தன்னை மிளகாய்ப்பொடி என்ற பட்டபெயருடன் சிறை அதிகாரிகள் அழைக்கிறார்கள். இதனால் தாம் மன ரீதியாக துன்புறுத்தலுக்கு ஆளாகி உள்ளேன். மிளகாய்ப்பொடியை தூவி கொலை செய்வீர்களா? என்று பலர் கிண்டலாக கேட்கிறார்கள். எனவே, ஆவணங்களில் உள்ள மிளகாய்ப்பொடி என்ற அடைமொழியை நீக்கக்கோரி புழல் சிறை நிர்வாகம், டிஜிபி உள்ளிட்டோருக்கு மனு உத்தரவிட வேண்டும் என்று கோரியிருந்தார். இந்த மனு நீதிபதிகள் எம்.எஸ்.ரமேஷ், வி.லட்சுமி நாராயணன் ஆகியோர் அடங்கிய அமர்வில் விசாரணைக்கு வந்தது. மனுவை விசாரித்த நீதிபதிகள் இந்த வழக்கை தனி நீதிபதி தான் விசாரிக்க முடியும் எனக்கூறினர். இதனையடுத்து, இந்த வழக்கு நீதிபதி பி.வேல்முருகன் முன்பு விசாரணைக்கு வரவுள்ளது.