எல்லை தாண்டி மீன்பிடித்ததாக ராமேஸ்வரம் மீனவர்கள் 4 பேர் சிறைபிடிப்பு: இலங்கை கடற்படை மீண்டும் அத்துமீறல்

ராமேஸ்வரம்: நடுக்கடலில் மீன்பிடித்தபோது, எல்லை தாண்டியதாக ராமேஸ்வரம் மீனவர்கள் 4 பேர், அவர்களது விசைப்படகை இலங்கை கடற்படை நேற்றிரவு சிறைப்பிடித்த சம்பவம் மீனவர்கள் மத்தியில் கொந்தளிப்பை ஏற்படுத்தியுள்ளது. ராமேஸ்வரம் மீன்பிடி துறைமுகத்தில் இருந்து 80 படகுகளில் மட்டுமே அனுமதி பெற்று மீனவர்கள் நேற்று கடலுக்கு சென்றனர். பெரும்பாலான மீனவர்கள் கடலுக்கு செல்லாததால் 500க்கும் மேற்பட்ட விசைப்படகுகள் கரையோரம் நிறுத்தி வைக்கப்பட்டன.

இதனால், சுமார் 4 ஆயிரத்துக்கும் மேற்பட்ட மீனவர்கள் வேலையிழந்து பல கோடி ரூபாய் மதிப்பிலான மீன் வர்த்தகம் பாதிக்கப்பட்டது. இதனிடையே, 80 படகுகளில் கடலுக்கு சென்ற மீனவர்கள் நேற்றிரவு நடுக்கடலில் மீன்பிடி பணியில் ஈடுபட்டிருந்தனர். அப்போது, அப்பகுதியில் ரோந்து வந்த இலங்கை கடற்படையினர், ராமேஸ்வரம் மீனவர்களை மீன்பிடிக்க விடாமல் விரட்டியடித்தனர். மேலும், முனியாண்டி என்பவருக்கு சொந்தமான விசைப்படகை சிறைபிடித்தனர். அதிலிருந்த மீனவர்கள் தங்கராஜ் (40), லிங்கம் (55), செல்வம் (55), இருளான்டி (45) ஆகிய 4 பேரையும் கைதுசெய்து, நடுக்கடலில் விசாரணை நடத்தினர்.

இதையடுத்து, மன்னார் கடற்படை முகாமிற்கு அழைத்து சென்றனர். பின்னர், அடுத்தகட்ட நடவடிக்கைக்காக மன்னார் மீன்வளத்துறை அதிகாரிகளிடம் ஒப்படைத்தனர். கைதான 4 மீனவர்களும் இன்று மாலை மன்னார் நீதிமன்றத்தில் ஆஜர்படுத்தப்பட உள்ளனர். இலங்கை கடற்படையினர் விரட்டியதால் மற்ற மீனவர்கள் மீன்பாடின்றி நஷ்டத்துடன் இன்று காலை கரை திரும்பினர். இச்சம்பவம் மீனவர்கள் மத்தியில் பெரும் கொந்தளிப்பை ஏற்படுத்தியுள்ளது. இலங்கை கடற்படையின் தொடர் அத்துமீறலை ஒன்றிய அரசு வேடிக்கை பார்க்காமல் தடுத்து நிறுத்த உரிய நடவடிக்கை எடுக்க வேண்டும் என மீனவர்கள் கோரிக்கை விடுத்துள்ளனர்.