மழையால் சேதமடைந்த சாலையை தாமாக முன்வந்து சீரமைத்த மேட்டுப்பாளையம் போக்குவரத்து காவலர்: காவலரின் செயலுக்கு குவியும் பாராட்டு.

மேட்டுப்பாளையம்: கோவை,திருப்பூர்,நீலகிரி மாவட்டங்களின் மையப்பகுதியாகவும், தமிழக, கேரள, கர்நாடக மாநிலங்களின் எல்லை பகுதியாகவும், மலைகளின் அரசியாக விளங்கும் ஊட்டியின் நுழைவு வாயிலாகவும் மேட்டுப்பாளையம் இருந்து வருகிறது. இதனால் பணி நிமித்தமாகவும், சுற்றுலாவிற்காகவும், பள்ளி, கல்லூரி செல்வதற்காகவும் மேட்டுப்பாளையத்தை நாள்தோறும் பல்லாயிரக்கணக்கான வாகனங்கள் கடந்து செல்கின்றன.

இந்த நிலையில் தொடர் மழை காரணமாக மேட்டுப்பாளையம் - ஊட்டி சாலையில் பல்வேறு இடங்களில் சாலைகள் பெயர்ந்து குண்டும், குழியுமாக காட்சியளித்து வருகின்றன.இதனால் வாகன ஓட்டிகள், பொதுமக்கள், பள்ளி, கல்லூரி மாணவர்கள் பெரும் சிரமத்தை சந்தித்து வந்தனர்.

இந்த நிலையில் நேற்று மேட்டுப்பாளையம் - ஊட்டி சாலையில் பேருந்து நிலையம் அருகே சாலைகள் குண்டும்,குழியுமாக இருப்பதை கண்ட போக்குவரத்து காவலர் ராதாகிருஷ்ணன் சமூக பொறுப்புணர்வோடு செயல்பட்டு சிமெண்ட் கலவை மற்றும் ஜல்லிக்கற்களை கொண்டு வந்து பள்ளங்களை நிரப்பி மண் வெட்டியால் சாலையை சீரமைத்தார். பொது மக்களின் பாதுகாப்பை கருத்தில் கொண்டு செயல்பட்ட போக்குவரத்து காவலரின் இந்த மனிதநேயமிக்க செயல் பொதுமக்களிடையே வெகுவாக பாராட்டை பெற்று வருகிறது.

போக்குவரத்து காவலரின் இச்செயலை கண்ட வாகன ஓட்டி ஒருவர் தனது செல்போனில் வீடியோவாக பதிவிட்டு அதனை சமூக வலைதளங்களில் வெளியிட்டுள்ளார். இந்த வீடியோ தற்போது சமூக வலைத்தளங்களில் வைரலாகி வருவதோடு பொதுமக்களிடையே பாராட்டுகளை பெற்று வருகிறது.