இரண்டரை ஆண்டுகளுக்கு முன் தொடங்கிய பணிகள் ரூ.16 கோடியில் ரயில் நிலையம் நவீனமயமாவது எப்போது?

ஜோலார்பேட்டை : ஜோலார்பேட்டை ரயில் நிலையம் ரூ.16 கோடியில் நவீனமயமாகும் பணிகள் முடிவடைவது எப்போது? என பயணிகள் எதிர்பார்க்கின்றனர். திருப்பத்தூர் மாவட்டம் ஜோலார்பேட்டை ரயில் நிலையம் பிரிட்டிஷ் ஆட்சிக்காலத்தில் கட்டப்பட்டது. சென்னை, கோவை, சேலம் உள்ளிட்ட மாநகரங்கள் மற்றும் ஆந்திரா, கர்நாடகா மற்றும் கேரளாவை இணைக்கும் முக்கிய ரயில் நிலையமாக விளங்கி வருகிறது.

இவ்வழியாக தினசரி நூற்றுக்கணக்கான சரக்கு மற்றும் பயணிகள் ரயில்கள் கடந்து செல்கிறது. தினசரி வியாபார ரீதியாகவும், பல்வேறு பணிகள் காரணமாகவும் ஏராளமான மக்கள் ஜோலார்பேட்டை ரயில் நிலையம் வழியாக சென்று வருகின்றனர்.

இதன்மூலம் கோடிக்கணக்கில் ரயில்வே நிர்வாகத்திற்கு வருவாய் கிடைத்து வருகிறது. இத்தகைய சிறப்பு வாய்ந்த ரயில் நிலையத்தில் அடிப்படை வசதிகள் இல்லை. இதனால் ரயில் நிலையத்திற்கு வரும் பயணிகள் கடும் சிரமத்திற்கு ஆளாகி வந்தனர். எனவே இந்த ரயில் நிலையத்தை நவீனமயமாக்கவேண்டும் என பயணிகள் தொடர்ந்து கோரிக்கை விடுத்து வந்தனர்.

அதன்பேரில் ஒன்றிய அரசின் அம்ரித் பாரத் ஸ்டேஷன் திட்டத்தின்கீழ் ரூ.16 கோடியில் ஜோலார்பேட்டை ரயில் நிலையத்தை நவீனமயமாக்க கடந்த 2023ம் ஆண்டு முடிவு செய்யப்பட்டு பணிகள் தொடங்கப்பட்டது. இதையொட்டி மாஸ்டர் பிளான்கள் உருவாக்கப்பட்டது.

மாற்றுத்திறனாளிகள், வயது முதிர்ந்தோர், பார்வை குறைபாடு உள்ளவர்கள் உள்ளிட்டோரின் தேவைகளையும் உள்ளடக்கியும், இருசக்கர, நான்கு சக்கர வாகனங்கள் நிறுத்தும் வசதி, காத்திருப்பு பகுதிகள், கழிப்பறை, லிப்ட் மற்றும் எஸ்கலேட்டர், இலவச வைபை ஆகியவற்றை உள்ளடக்கி திட்டம் வகுக்கப்பட்டது.

ஆனால் இவை அனைத்தும் கடந்த இரண்டரை ஆண்டுகளாகியும் மந்தகதியில் நடந்து வருவதாக கூறப்படுகிறது. இதுகுறித்து பயணிகள் கூறுகையில், `சுமார் இரண்டரை ஆண்டுகளை கடந்தும் ரயில்வே கட்டிட பணிகள் எதுவும் முழுவீச்சில் நடக்கவில்லை. புதிய கட்டிடம் மற்றும் பிளாட்பாரங்கள் அமைப்பதற்காக பழைய கட்டிடங்களும் பிளாட்பாரங்களும் உடைக்கப்பட்டது.

ஆனால் பணிகள் சரிவர நடக்காததால் வெயில், மழையில் காத்திருந்து ரயில் பிடித்து செல்லும் தொடர்கிறது. இதனை ரயில்வே துறை அதிகாரிகள் ஆய்வு செய்யவேண்டும், டெண்டர் எடுத்தவர்களை உரிய காலத்திற்குள் பணிகளை முடிக்க அறிவுறுத்தவேண்டும். விரைவில் முழு அளவில் நவீனமயமாக்க நடவடிக்கை எடுக்கவேண்டும். இவ்வாறு கோரிக்கை விடுத்தனர்.