தனியார் கல்லூரிகள் நிர்ணயம் செய்த எம்பிபிஎஸ், பிடிஎஸ் மாணவர்களுக்கு உணவு, விடுதி கட்டணம் அறிவிப்பு

சென்னை: தனியார் கல்லூரிகளின் உணவு, விடுதி உள்ளிட்ட புதிய கட்டகளை மருத்துவ கல்வி இயக்ககம் வெளியிட்டுள்ளது. தமிழகத்தில் 22 தனியார் மருத்துவக் கல்லூரிகள், நான்கு தனியார் மருத்துவப் பல்கலைக்கழகங்கள் மற்றும் 20 தனியார் பல் மருத்துவக் கல்லூரிகள் இயங்கி வருகின்றன. தற்போது மருத்துவ கல்வி இயக்ககம் வெளியிட்டுள்ள தகவல்படி, விடுதி கட்டணமாக ஆண்டுக்கு குறைந்தபட்சம் 60 ஆயிரம் ரூபாய் முதல், 2 லட்சத்து 50 ஆயிரம் வரை நிர்ணயிக்கப்பட்டு இருக்கின்றன.

உணவு கட்டணமாக, குறைந்தபட்சம் ஆண்டுக்கு 70 ஆயிரம் முதல் அதிகபட்சமாக ஒரு லட்சத்து 35 ஆயிரம் வரை நிர்ணயம் செய்யப்பட்டு இருக்கின்றன. இதேபோன்று, போக்குவரத்து கட்டணமாக குறைந்தபட்சம் 50,000 ரூபாய் முதல் அதிகபட்சமாக 1,75,000 வரை நிர்ணயம் செய்யப்பட்டுள்ளன. இதர கட்டணம் என்ற வகையில், குறைந்தபட்சம் ஆண்டுக்கு 36,000 ரூபாய் முதல் அதிகபட்சமாக 3 லட்சம் ரூபாய் வரை கட்டணம் நிர்ணயம் செய்யப்பட்டு இருக்கிறது. பல் மருத்துவக் கல்லூரிகளுக்கான கட்டணம் மட்டும் சற்று குறைவாக நிர்ணயம் செய்யப்பட்டு இருக்கின்றன.

தற்போது கலந்தாய்வு நடந்து வரும் நிலையில், தமிழகத்தில் உள்ள தனியார் கல்லூரிகள் உணவு, விடுதி உள்ளிட்ட கட்டணத்தை மருத்துவ கல்வி இயக்ககம் சேகரித்து புதிய கட்டண விவரங்களை இணையத்தில் வெளியிட்டுள்ளது. இந்த கட்டணம் இல்லாமல் கூடுதலாக வசூல் செய்தால் புகார் தெரிவிக்கலாம் என மருத்துவ கல்வி இயக்ககம் தெரிவித்துள்ளது. இருப்பினும் கூடுதலாக கட்டணம் வசூலித்தால் எங்கு புகார் அளிக்க வேண்டும் என்ற விவரம் இடம்பெறவில்லை என்பது குறிப்பிடத்தக்கது.