அதிபர் ஆசிப் அலி சர்தாரியுடன் வலுக்கும் மோதல் பாக். ஆட்சியை கவிழ்க்க ராணுவ தளபதி சதியா? டிரம்ப் விருந்து அளித்ததால் வந்தது பிரச்னை மீண்டும் ராணுவ ஆட்சி அமைகிறதா?
Advertisement
மேலும் போரில் அமெரிக்கா உத்தரவுக்கு இணங்க நடந்ததால், பாக். ராணுவ தளபதி ஆசிம் முனீரை அமெரிக்காவுக்கு அதிபர் டிரம்ப் வரவழைத்தார். பெரும்பாலும் பிறநாட்டு அதிபர்கள், பிரதமர்களை மட்டுமே சந்திக்கும் டிரம்ப், விதிவிலக்காக ஆசிம் முனீரை வெள்ளை மாளிகைக்கு வரவழைத்து விருந்து கொடுத்தார். இது பெரும் பரபரப்பை ஏற்படுத்தியது. அதை தொடர்ந்து பாக். சென்ற ஆசிம் முனீருக்கும், அதிபர் ஆசிப் அலி சர்தாரிக்கும் இடையே கருத்து வேறுபாடுகள் ஏற்பட்டுள்ளதாக தகவல் வெளியாகி உள்ளது.
நிர்வாக நியமனம் தொடர்பாக ராணுவ தளபதி ஆசிம்முனீரின் பரிந்துரைகளை அதிபர் சர்தாரி நிராகரித்ததால் இருதரப்பிற்கும் இடையே மோதல் வெடித்து உள்ளதாக தகவல் வெளியாகி உள்ளது. அதை விட முக்கியமாக பாக். மக்கள் கட்சி தலைவர் பிலாவல் பூட்டோ சர்தாரி சமீபத்தில் தீவிரவாதிகள் ஹபீஸ் சயீத், மசூத் அசார் ஆகியோரை இந்தியாவிடம் ஒப்படைக்கலாம் என்று கருத்து தெரிவித்தார். இதற்கு எதிர்ப்புகிளம்பி உள்ளது. இதனால் பாக். அதிபர் மற்றும் ராணுவ தளபதி இடையே மேலும் மோதல் அதிகரித்து உள்ளது. இதனால் அங்கு அதிபர் சர்தாரியை பதவி நீக்கம் செய்து விட்டு வேறு ஒரு புதிய அதிபரை தேர்வு செய்வது அல்லது ராணுவ ஆட்சியை அமல்படுத்துவது என்ற நோக்கில் ராணுவ தளபதி ஆசிம் முனீர் செயல்பட்டு வருவதாகவும் தகவல் வெளியாகி உள்ளது.
* ஜெனரல் அசிம் முனீர் யார்?
பாக்.கில் 2022 நவம்பர் மாதம் ராணுவ தளபதியாக நியமிக்கப்பட்ட ஜெனரல் அசிம் முனீர், ராணுவ உளவுத்துறை மற்றும் பாகிஸ்தானின் உயர்மட்ட உளவு நிறுவனமான ஐஎஸ்ஐ இரண்டிலும் அனுபவமுள்ள அதிகாரி ஆவார். முன்னாள் பிரதமர் இம்ரான் கான் பதவி பறிப்பிலும் அவர் முக்கிய நபராக காணப்பட்டார்.
* பாகிஸ்தானில் 1958, 1977 மற்றும் 1999 ஆம் ஆண்டுகளில் ராணுவம் ஆட்சியை கைப்பற்றியது.
* கடைசி ராணுவப் புரட்சி 1999ஆம் ஆண்டு ஜெனரல் பர்வேஸ் முஷாரப் தலைமையில் நடந்தது.
Advertisement