சென்னை: மார்க்சிஸ்ட் கட்சியின் மாநில செயலாளர் சண்முகம் வெளியிட்ட அறிக்கை: திருப்பூர் மாவட்டம், உடுமலைப்பேட்டை அருகே சின்னாறு கிராமம் பழங்குடியினத்தைச் சேர்ந்த மாரிமுத்து என்பவரை விசாரணை என்ற பெயரில் வனத்துறையினர் அழைத்துச் சென்று அடித்து வனச்சரக அலுவலகத்திலேயே அவர் உயிரிழந்துள்ள சம்பவம் பெரும் அதிர்ச்சியளிக்கிறது. வனத்துறையினரால் நிகழ்த்தப்பட்ட இந்த படுகொலையை மார்க்சிஸ்ட் கட்சியின் தமிழ்நாடு மாநில செயற்குழு வன்மையாக கண்டிக்கிறது. மாரிமுத்துவின் மரணத்திற்கு காரணமான வனச்சரகர் உள்ளிட்ட வனத்துறையினர் அனைவர் மீதும் வன்கொடுமை தடுப்புச் சட்டத்தின் கீழ் வழக்கு பதிவு செய்து, உடனடியாக பணி நீக்கம் செய்ய வேண்டும், இந்த வழக்கை நேர்மையாகவும், சுதந்திரமாகவும் விசாரிக்க சிபிசிஐடி விசாரணைக்கு உத்தரவிட வேண்டும்.
