காவல்துறை டிஜிபி சங்கர் ஜிவால் தகவல் போதைப்பொருள் கடத்தல் தடுப்பில் தமிழ்நாடு முன்னணி மாநிலம்: 3,307 மாநிலம் முழுவதும் 4 ஆண்டுகளில் கைது செய்யப்பட்டவர்களின் எண்ணிக்கை

சென்னை: தமிழ்நாடு காவல்துறை டிஜிபி சங்கர் ஜிவால் நேற்று வெளியிட்ட அறிக்கை: போதைப்பொருள் வர்த்தகத்தில் கடும் நடவடிக்கை எடுக்கும் இந்திய மாநிலங்களில் தமிழ்நாடு ஒன்றாகும். தமிழ்நாட்டிற்குள் கடத்தப்படுகின்ற போதைப் பொருள்கள் இடைமறிக்கப்பட்டு, பறிமுதல் செய்யப்பட்டு, அழிக்கப்படுகின்றன. 2022 முதல் போதைப் பொருள் தொடர்பான வழக்குகளில் ஈடுபட்டவர்களின் சொத்துக்கள் மற்றும் வங்கிக் கணக்குகள் முடக்கப்பட்டுள்ளன.

திட்டமிட்டு புள்ளி விவரங்களுக்கு எதிரான குற்றச்சாட்டுகள்: தமிழ்நாட்டைக் களங்கப்படுத்த வேண்டும் என்ற நோக்கத்தில் ஒரு சிலரால் போலியான குற்றச்சாட்டுகள் முன்வைக்கப்படுகின்றன. ஆனால், புள்ளிவிவரங்கள் இந்தக் குற்றச்சாட்டுகளை வலுவாக முறியடிக்கின்றன. ஒன்றிய அரசின் ஆய்வின்படி, தமிழ்நாட்டில் கஞ்சா பயன்பாடு வெறும் 0.1 சதவீதம், ஓபியாய்ட்ஸ் 0.26 சதவீதம், மயக்க மருந்துகள் 0.3 சதவீதம், இன்ஹேலன்ட்ஸ் 0.2 சதவீதம் மட்டுமே.

இவை அனைத்தும் தேசிய சராசரியை விட மிகக் குறைவு. இதனால், போதைப் பொருள்களைக் குறைவாக நுகரும் மாநிலங்களில் தமிழ்நாடு இடம் பெற்றுள்ளது. உதாரணமாக, தமிழ்நாட்டை விடச் சிறிய மாநிலமான அசாமில், சில பிரிவுகளில் போதைப் பொருள் நுகர்வு விகிதம் 2 சதவீதத்திற்கும் அதிகமாக உள்ளது. தமிழ்நாட்டின் குறைந்த நுகர்வு நிலைகள், மக்களின் விழிப்புணர்வையும், கடந்த நான்கு ஆண்டுகளாக அரசின் கண்காணிப்பையும் பிரதிபலிக்கின்றன.

மே 2021 முதல், பறிமுதல் செய்யப்பட்ட போதைப் பொருள்களின் அளவு பல உண்மைகளை வெளிப்படுத்துகிறது. ஒரு லட்சத்திற்கும் அதிகமான கிலோகிராம் கஞ்சா பறிமுதல் செய்யப்பட்டுள்ளது. அதனுடன் ஹெராயின், மெத்தாம்பெட்டமின், ஆம்பெட்டமைன், மெத்தா குவாலோன் போன்ற போதை மருந்துகளும், கஞ்சா சாக்லேட் போன்ற மாறுவேடத்தில் இருந்த பொருள்களும் பறிமுதல் செய்யப்பட்டுள்ளன. தமிழ்நாட்டிற்குள் கஞ்சா பயிரிடுவது முற்றிலும் இல்லை என்ற நிலையில் இது சாத்தியமாகியுள்ளது.

2022ல் நடத்தப்பட்ட சோதனைகளில், 28,383 கிலோ கிராம் கஞ்சா பறிமுதல் செய்யப்பட்டது. இது 2020ஐ விட 61% அதிகம், 2021ஐ விட 33% அதிகம். இந்தப் போதைப் பொருள்கள் அண்டை மாநிலங்களில் இருந்து கடத்தி வரப்படுகின்றன. இதை உணர்ந்து, தமிழ்நாடு ஆந்திராவுடன் இணைந்து, அங்கு 6,416 ஏக்கரில் பயிரிடப்பட்டிருந்த ரூ.4,000 கோடி மதிப்புள்ள கஞ்சா செடிகளை அழிக்கக் கோரி நடவடிக்கை எடுத்தது.

போதைப்பொருள் ஒழிப்புப் போரில் ஒரு முன்னணி மாநிலம்: 2021 முதல் மார்ச் 2025 வரை, தமிழ்நாட்டில் போதைப் பொருள் தடுப்புச் சட்டத்தின் கீழ் இந்தியா முழுவதிலும் இருந்து 3,307 குற்றவாளிகள் கைது செய்யப்பட்டுள்ளனர். இதில், ஒடிசாவைச் சேர்ந்த 892 பேர், கேரளாவைச் சேர்ந்த 662 பேர், ஆந்திராவைச் சேர்ந்த 447 பேர், பீகாரைச் சேர்ந்த 386 பேர், மேற்கு வங்கத்தைச் சேர்ந்த 322 பேர் ஆகியோர் அடங்குவர். இது போதைப் பொருள் ஒழிப்புப் போரில் தமிழ்நாடு ஒரு முன்னணி மாநிலமாக இருப்பதைக் காட்டுகிறது.

போதைப் பொருட்கள் தடுப்பு நடவடிக்கைகள்: 74 லட்சம் மாணவர்கள் எடுத்த போதைப் பொருள் எதிர்ப்பு உறுதிமொழி, மாரத்தான், குறும்படங்கள், மாணவச் சங்கங்கள் ஆகியவற்றின் மூலம் பொதுமக்களிடையே போதைப் பொருள்களுக்கு எதிரான விழிப்புணர்வு உருவாக்கப்பட்டுள்ளது. தற்போது, என்சிசி, என்எஸ்எஸ், செஞ்சிலுவைச் சங்கம் மற்றும் இளைஞர் செஞ்சிலுவைச் சங்கம் தன்னார்வலர்களுடன் ஒருங்கிணைந்து போதைப்பொருள் எதிர்ப்பு மன்றங்கள் மாநிலம் முழுவதும் செயல்படுகின்றன.

மாநிலங்களுக்கு இடையிலான ஒத்துழைப்பு: போதைப்பொருள் இல்லாத தமிழ்நாடு என்ற மொபைல் செயலி, போதைப்பொருள் தொடர்பான தகவல்களை மக்கள் தெரிவிக்க உதவுகிறது. சென்னையிலுள்ள போதைப்பொருள் தடுப்புப் பிரிவு (என்சிபி), கடலோரப் பகுதி வழியாக நடைபெறும் கடத்தலைச் சமாளிக்க இலங்கை அதிகாரிகளுடன் 4வது தலைமை இயக்குநர் மட்டப் பேச்சுவார்த்தையை நடத்தியது.

ஜூன் 2025-ல் ஆந்திரா, கேரளா, கர்நாடகா மற்றும் மகாராஷ்டிரா ஆகிய மாநிலங்களுடன் நடந்த கூட்டங்களில், தேசிய அளவிலான போதைப்பொருள் தடுப்புப் பிரிவு (என்சிபி) மற்றும் அமலாக்க இயக்குநரகம் போன்ற தேசிய அமைப்புகளுடன் தமிழ்நாடும் பங்கேற்றது. இவ்வாறு டிஜிபி தெரிவித்துள்ளார்.