நாடாளுமன்ற குளிர்கால கூட்டத்தொடரில் என்னென்ன மசோதாக்கள் தாக்கல் செய்யப்படுகிறது? ஒன்றிய அரசு வட்டாரம் தகவல்

புதுடெல்லி: நாடாளுமன்ற குளிர்கால கூட்டத்தொடர் நாளை தொடங்கவுள்ள நிலையில், சுகாதாரம் மற்றும் தேசிய பாதுகாப்பு உள்ளிட்ட பல்வேறு முக்கிய மசோதாக்களை நிறைவேற்ற ஒன்றிய அரசு திட்டமிட்டுள்ளது. நாடாளுமன்ற குளிர்கால கூட்டத்தொடரானது நாளை தொடங்கவுள்ள நிலையில், மொத்தம் 19 நாட்களில் 15 அமர்வுகள் நடக்கிறது.

தனிநபர் மசோதாக்கள் டிசம்பர் 5 மற்றும் 19 ஆகிய தேதிகளிலும், தனிநபர் தீர்மானங்கள் டிசம்பர் 12ம் தேதியும் விவாதத்திற்கு எடுத்துக்கொள்ளப்பட உள்ளன. இந்தக் கூட்டத்தொடரில் சுகாதாரம் மற்றும் தேசிய பாதுகாப்பு செஸ் மசோதா 2025, மணிப்பூர் சரக்கு மற்றும் சேவை வரி (இரண்டாவது திருத்த) மசோதா 2025 மற்றும் மத்திய கலால் (திருத்த) மசோதா 2025 உள்ளிட்ட முக்கிய மசோதாக்களை அறிமுகப்படுத்த ஜனாதிபதி பரிந்துரை செய்துள்ளார்.

அரசியலமைப்பு விதிகளின்படி ஜனாதிபதியின் ஒப்புதல் பெறப்பட்டுள்ள நிலையில், ஜன் விஸ்வாஸ் மசோதா, திவால் நிலை மற்றும் திவால் குறியீட்டு திருத்த மசோதா, தேசிய நெடுஞ்சாலைகள் திருத்த மசோதா, அணுசக்தி மசோதா, காப்பீட்டு சட்டங்கள் திருத்த மசோதா மற்றும் இந்திய உயர்கல்வி ஆணைய மசோதா உள்ளிட்ட பல முக்கிய சட்ட முன்வடிவுகள் பரிசீலனைக்கு எடுத்துக்கொள்ளப்பட உள்ளன.

நிதி சார்ந்த அலுவல்களைப் பொறுத்தவரை, 2025-26ம் ஆண்டிற்கான துணை மானியக் கோரிக்கைகள் மீதான விவாதம் மற்றும் வாக்கெடுப்பு நடைபெறவுள்ளது. நாடாளுமன்ற கூட்டத்தொடரை சுமூகமாக நடத்துவது தொடர்பாக விவாதிப்பதற்காக, நாடாளுமன்ற விவகாரங்கள் துறை அமைச்சர் கிரண் ரிஜிஜு தலைமையில் அனைத்துக் கட்சி கூட்டம் இன்று பாராளுமன்ற வளாகத்தில் நடைபெற்றது.

இந்த கூட்டத்தில் பல்வேறு கட்சிகளைச் சேர்ந்த தலைவர்கள் கலந்துகொண்டு தங்கள் கருத்துக்களைத் தெரிவித்தனர். மக்கள் பிரச்னைகளை அவையில் எழுப்ப எதிர்க்கட்சிகள் தீவிரமாக இருப்பதால், இந்த கூட்டத்தொடரில் அனல் பறக்கும் விவாதங்கள் நடைபெறும் என்று எதிர்பார்க்கப்படுகிறது.