விக்கெட் வேட்டையில் கும்ப்ளேவை முந்தினார்!

இந்தியாவில் நடந்த டெஸ்ட் போட்டிகளில் அதிக விக்கெட் வீழ்த்திய பந்துவீச்சாளர் என்ற சாதனை ஆர்.அஷ்வின் வசமாகி உள்ளது. ராஞ்சி டெஸ்டில் நேற்று 5 விக்கெட் கைப்பற்றி அசத்திய அஷ்வின், இந்திய மண்ணில் மொத்தம் 354 விக்கெட் கைப்பற்றி அனில் கும்ப்ளேவின் சாதனையை (350 விக்கெட்) முறியடித்தார்.

அஷ்வின் 35வது முறையாக டெஸ்ட் போட்டிகளில் 5 விக்கெட் கைப்பற்றி கும்ப்ளேவின் சாதனையை சமன் செய்து இந்திய பவுலர்களில் முதலிடத்தையும், உலக அளவில் 4வது இடத்தையும் பகிர்ந்து கொண்டுள்ளார். முரளிதரன் (67 முறை), ஷேன் வார்ன் (37), ரிச்சர்ட் ஹாட்லீ (36) முதல் 3 இடங்களில் உள்ளனர்.

முதல் ஓவரிலேயே சுழற்பந்துவீச்சுடன் தொடங்கிய இன்னிங்சில் அஷ்வின் 5 விக்கெட் கைப்பற்றுவது இது 16வது முறையாகும்.

இந்திய மண்ணில் இங்கிலாந்துடன் நடந்த டெஸ்ட் போட்டிகளில் அஷ்வின் 91 விக்கெட் வீழ்த்தி முதலிடம் பிடித்திருக்கிறார். முன்னதாக, ஹர்பஜன் சிங் ஆஸ்திரேலியாவுக்கு எதிராக (14 டெஸ்ட்) 86 விக்கெட் வீழ்த்தியதே அதிகபட்சமாக இருந்தது.