நிதாரி கொலை வழக்கு.. மரண தண்டனை கைதி சுரேந்திர கோலியை விடுவித்தது உச்ச நீதிமன்றம்!!
டெல்லி: நிதாரி கொலை வழக்கில் முக்கிய குற்றவாளி சுரேந்தர் கோலியை உச்ச நீதிமன்றம் விடுவித்தது. கடந்த 2006ல் உ.பி.யின் நொய்டாவில் 31வது செக்டார் குடிசைப் பகுதியில் ஏழைக் குடும்பங்களின் குழந்தைகள் தொடர்ந்து காணாமல் போயினர். அக்டோபர் 2006ல் பாயல் எனும் இளம்பெண் காணாமல் போய் வழக்கு பதிவானது. பாயலின் கைப்பேசி ஒரு ரிக் ஷா ஓட்டுநரிடம் இருந்து போலீசாரிடம் சிக்கியது. பிறகு இதனை அவருக்கு வழங்கிய 31வது செக்டார் டி-5 பங்களாவின் பணியாளர் சுரேந்தர் கோலி போலீசாரிடம் சிக்கினார். விசாரணைக்கு பிறகு டி-5 பங்களா வளாகத்திலும் அதன் முன்புள்ள கால்வாயிலும் டிசம்பர் 2006ல் தோண்டப்பட்டது. இதனுள் ஒன்றன்பின் ஒன்றாக சடலங்கள், எலும்புக்கூடுகள், 26 மண்டை ஓடுகளும் வெளியாகி நாட்டையே உலுக்கின.
Advertisement
இதன் காரணமாக பங்களா உரிமையாளர் தொழிலதிபர் மொஹீந்தர் சிங் புந்தேர் மீதும் புகார் எழுந்தது. குழந்தைகள், பெண்களை கொலை செய்ததுடன், சில உறுப்புகளை கோலி உட்கொண்டதாகவும் விசாரணையில் தகவல் வெளியானது. இருவரும் கைது செய்யப்பட்டு 10 பெண்கள் மற்றும் 19 குழந்தைகள் கொலையானதாக வழக்குகள் பதிவாகின. வழக்குகளின் விசாரணையில் பங்களாவின் பெரும்பாலானப் பகுதிகளை சிபிஐ உடைத்துப் பார்த்தது. குற்றவாளிகளுக்கு பிரைன் மேப்பிங், நார்கோட்டிக் உள்ளிட்டப் பலவகை விசாரணைகளை நடத்தியது.
இதன் முடிவில், பணியாளர் சுரேந்தர் கோலி, ஒரு மனநோயாளி எனவும், அவர் குழந்தைகளை கொன்று அந்த உடல்களுடன் தவறான உறவு கொண்டதாகவும் தெரியவந்தது. இதற்கு கோலியின் உரிமையாளர் உடந்தையாக இருந்ததாகவும் சிபிஐ தெரிவித்தது. 6 வழக்குகள் மொஹீந்தர் சிங் மீதும், 13 வழக்குகள் கோலி மீதும் பதிவாகின. இருவர் மீதான வழக்குகள் காஜியாபாத் சிபிஐ நீதிமன்றத்தில் நடைபெற்றன. ஜுலை 2007ல் வெளியான தீர்ப்பில் இருவருக்கும் மரண தண்டனை விதிக்கப்பட்டது. எனினும் மேல்முறையீட்டு வழக்கில் உ.பி.யின் அலகாபாத் உயர்நீதிமன்றம் அக்டோபர் 2023ல் இருவரையும் விடுதலை செய்தது. இவர்கள் மீதான குற்றச்சாட்டுகளை நிரூபிக்க, போதுமான ஆதாரங்கள் இல்லை என நீதிபதிகள் கூறியிருந்தனர்.
இது தொடர்பான சிபிஐ மற்றும் உ.பி. அரசின் மேல்முறையீட்டு மனுக்களை தலைமை நீதிபதி பி.ஆர்.கவாய் தலைமையிலான அமர்வு தள்ளுபடி செய்துள்ளது. இதனால் மொஹீந்தர் சிங் புந்தேர் அனைத்து வழக்குகளில் இருந்தும் முழுமையாக விடுவிக்கப்பட்டார். மேலும், சுரேந்திர கோலி மற்றொரு வழக்கில் சிறையில் இருந்தார். இந்நிலையில், நிதாரியில் சிறுமிகள் பாலியல் வன்கொடுமை செய்து கொல்லப்பட்ட வழக்கில் மரண தண்டனை விதிக்கப்பட்ட குற்றவாளி சுரேந்திர கோலியை விடுதலை செய்ய உச்ச நீதிமன்றம் உத்தரவிட்டுள்ளது. அவரை குற்றவாளியாக நிரூபிக்க சேகரிக்கப்பட்ட ஆதாரங்கள், பிற வழக்குகளில் நம்பகத்தன்மையற்றவை என நிரூபிக்கப்பட்டதால் மனுவை உச்ச நீதிமன்றம் தள்ளுபடி செய்தது. கடைசி வழக்கிலும் விடுவிக்கப்பட்டதால் சுரேந்தர் கோலி உடனடியாக சிறையில் இருந்து வெளியே வர வாய்ப்புள்ளதாக தகவல் வெளியாகியுள்ளது.
Advertisement