சொந்த பயன்பாட்டிற்காக வாங்கப்படும் வாகனங்களுக்கான பதிவுக்கு புதிய விதிமுறை இன்று முதல் அமல்

• ஆர்.டி.ஓ அலுவலகத்திற்கு செல்ல வேண்டியதில்லை
• வாகன உரிமையாளர்களின் சிரமத்தை குறைக்கும்

சென்னை: சொந்த பயன்பாட்டிற்காக வாங்கப்படும் கார் மற்றும் பைக் போன்ற வாகனங்களுக்கான பதிவுக்கு புதிய விதிமுறை இன்று முதல் அமல்படுத்தப்பட்டுள்ளன. தமிழகத்தில் 91 வட்டார போக்குவரத்து (ஆர்டிஓ) அலுவலகங்கள், 54 பகுதி அலுவலகங்கள் செயல்படுகின்றன. இங்கு புதிய வாகனங்களை பதிவு செய்யும்போது, வட்டார போக்குவரத்து அலுவலர்கள், மோட்டார் வாகன ஆய்வாளர்கள் உள்ளிட்டோர் வாகனங்களை ஆய்வு செய்வது வழக்கம். இதனால், வாகனங்களை ஆர்டிஓ அலுவலகத்துக்கு எடுத்துச் செல்வதற்காக, இதர செலவுஎன்று குறிப்பிட்ட தொகையை வாகனம் வாங்குவோரிடம் விற்பனையாளர்கள் வசூலிக்கின்றனர். ஆனால், மத்திய மோட்டார் வாகன சட்டத்தில் தற்போது கொண்டுவரப்பட்ட புதிய திருத்தத்தின்படி, “சொந்தப் பயன்பாட்டிற்கான வாகனங்களைப் பதிவு செய்யும்போது, அவற்றை உரிமையாளர்கள் வட்டாரப் போக்குவரத்து அலுவலர்களுக்குக் கொண்டு வர தேவையில்லை” என்று திருத்தப்பட்டது. இருப்பினும், இந்தத் திருத்தம் தமிழகத்தில் அமல்படுத்தப்படாமல் இருந்தது.

இதையடுத்து, ஆட்டோமொபைல் டீலர்கள் சங்கம் சார்பில் உயர் நீதிமன்றத்தில் இது தொடர்பாக வழக்கு தொடரப்பட்டது. வழக்கை விசாரித்த உயர் நீதிமன்றம், சொந்தப் பயன்பாட்டிற்காக வாங்கப்படும் வாகனங்களை வட்டாரப் போக்குவரத்து அலுவலகங்களுக்கு நேரில் கொண்டு வருவதில் இருந்து விலக்கு அளிக்க வேண்டும் என உத்தரவிட்டது. இது தொடர்பாக அரசு தரப்பில் உச்சநீதிமன்றத்தில் மேல்முறையீடு செய்யப்பட்டது.ஆனால் அந்த மனுவும் தள்ளுபடி செய்யப்பட்டன. இதனை தொடர்ந்து நீதிமன்ற உத்தரவின்படி, இன்று முதல் புதிய விதிமுறைகள் தமிழகத்தில் அமல்படுத்த போக்குவரத்து ஆணையர் கஜலட்சுமி உத்தரவு பிறப்பித்துள்ளார். அதன்படி, சொந்தப் பயன்பாட்டிற்கான வாகனங்களை இனி ஆன்லைன் மூலமாக விண்ணப்பித்து, பதிவு செய்து கொள்ளலாம். இந்த மாற்றம் லட்சக்கணக்கான வாகன உரிமையாளர்களுக்குப் பெரும் சிரமத்தைக் குறைக்கும் என்று எதிர்பார்க்கப்படுகிறது.

புதிய இரு சக்கர மற்றும் நான்கு சக்கர வாகனங்களை வாங்கிய பிறகு, அவற்றை வட்டாரப் போக்குவரத்து அலுவலகங்களில் பதிவு செய்ய நேரில் கொண்டு செல்ல வேண்டிய நடைமுறை நீண்ட காலமாகவே இருந்து வந்தது. இந்த நடைமுறையால், பொதுமக்களுக்கு கால விரயம் ஏற்படுவதுடன், குறிப்பாக இரு சக்கர வாகனங்களை நேரில் கொண்டு செல்லும்போது சில இடங்களில் லஞ்சம் வாங்கப்படுவதாக குற்றச்சாட்டுகளும் எழுந்தன. இந்தப் பழைய நடைமுறையை எளிதாக்க வேண்டும் என்ற கோரிக்கை நீண்ட காலமாக இருந்து வந்த நிலையில், இந்த அறிவிப்பு முக்கியத்துவம் பெறும் என்பதில் மாற்றுக்கருத்தில்லை.

இதுகுறித்து போக்குவரத்து ஆர்வலர்கள் கூறுகையில் ‘‘ அங்கீகரிக்கப்பட்ட வாகன உற்பத்தியாளர்களால் தயாரிக்கப்பட்ட புதிய வாகனங்களை ஆர்டிஓ அலுவலகத்துக்கு கொண்டு சென்று ஆய்வுக்கு உட்படுத்த அவசியம் இல்லை. வாகனம் தொடர்பான கோப்புகள் மட்டும் அலுவலர்களின் பார்வைக்கு சென்றால் போதும். கேரளா, கர்நாடகா உள்ளிட்ட பல்வேறு மாநிலங்களில் இந்த நடைமுறை பின்பற்றப்பட்டு வருகின்றன. தமிழகத்தில் இந்த விதிமுறைகள் பின்பற்றப்படவுள்ளதை வரவேற்கின்றோம். அதேபோல், ஒருசில மாநிலங்களில் வாகனவிற்பனையாளர்களே பதிவெண் கோரி விண்ணப்பிக்கும் நடைமுறையும் அதற்கான நடவடிக்கை மேற்கொள்ளப்படவேண்டும். என்றனர்.

தினசரி 8,000 வாகனம் பதிவு

தமிழகம் முழுவதும் உள்ள வட்டார போக்குவரத்து அலுவலகங்களில் (ஆர்.டி.ஓ) தினமும் 8 ஆயிரம் வாகனங்கள் புதிதாக வாகன பதிவு செய்யப்படுவதாக தகவல்கள் உள்ளன. இதில் 3 ஆயிரம் முதல் 4 ஆயிரம் வரை சொந்த பயன்பாட்டிற்காக வாங்கப்படும் வாகனங்களில் 70 சதவீதம் இருசக்கர வாகனங்களாகும்.

வணிக பயன்பாடு வாகனத்திற்கு விலக்கு இல்லை

தற்போது அமல்படுத்தப்பட்டுள்ள புதிய விதிமுறைகள் வணிக பயன்பாட்டிற்கான வாகனங்களுக்கு பொருந்தாது. கமர்ஷியல் வகை சேர்ந்த எந்த வாகனமாக இருந்தாலும் கட்டாயம் வட்டாரப் போக்குவரத்து அலுவலகங்களுக்கு நேரில் கொண்டு வந்து பதிய வேண்டும் என்று தெரிவிக்கப்பட்டுள்ளது.