முரசொலி மாறன் பணிகளை நன்றியுடன் போற்றுகிறேன்: முதல்வர் டிவிட்

சென்னை: முன்னாள் ஒன்றிய அமைச்சர் முரசொலி மாறனின் பணிகளை நன்றியுடன் போற்றுகிறேன் என்று முதல்வர் மு.க.ஸ்டாலின் தெரிவித்துள்ளார். முன்னாள் ஒன்றிய அமைச்சர் முரசொலி மாறனின் நினைவுநாளையொட்டி, முதலமைச்சர் வெளியிட்டுள்ள சமூக வலைதளப் பதிவு: டெல்லியில் கழகத்துக்கும் உலக அரங்கில் இந்தியாவுக்கும் பெருமை தேடித் தந்த பண்பின் திருவுருவம் முரசொலி மாறனின் நினைவுநாள். கலைஞர் மீது கொண்ட தூய அன்பு - ஒப்பிலா அறிவுக்கூர்மை - மாறாக் கொள்கை என எடுத்துக்காட்டாக வாழ்ந்து நிறைந்த அவரது பணிகளை நன்றியுடன் இந்நாளில் போற்றுகிறேன். இவ்வாறு தெரிவித்துள்ளார்.

* ‘தமிழ்நாட்டின் உயர்வுக்கு உழைத்தவர் முரசொலி மாறன்’

துணை முதல்வர் உதயநிதி ஸ்டாலின் வெளியிட்டுள்ள சமூக வலைத்தளப்பதிவு: கலைஞரின் மனசாட்சி, மாநில சுயாட்சியை வலியுறுத்திய ஜனநாயகப் போர்க்குரல், டெல்லி அரசியல் அரங்கில் நம் கழகத்துக்கான கம்பீர இடத்தை உறுதி செய்தவர் - நம் எல்லோரின் அன்புக்கும் மதிப்பிற்கும் உரிய முரசொலி மாறன் நினைவுநாள் இன்று. கலைஞருக்கும் - கழகத்துக்கும் உற்ற துணையாக இருந்து அதன்மூலம் தமிழ்நாட்டின் உயர்வுக்கு உழைத்த முரசொலி மாறன் புகழ் என்றென்றும் போற்றுதலுக்குரியது. இவ்வாறு குறிப்பிட்டுள்ளார்.