சிங்கவால் குரங்கு, முள்ளம்பன்றி, வரி கழுதைப்புலி உள்ளிட்ட அழிந்து வரும் உயிரினங்களை பாதுகாக்க முன்னோடி திட்டம்: ரூ.1 கோடியில் தமிழக அரசு தொடங்குகிறது

சென்னை: தமிழ்நாடு அரசு ரூ.1 கோடி செலவில் சிங்கவால் குரங்கு, முள்ளெலி, வரிக் கழுதைப்புலி உள்ளிட்ட அழிந்து வரும் உயிரினங்களை பாதுகாக்க முன்னோடி திட்டம் ஒன்றை அறிவித்துள்ளது. இதுகுறித்து சுற்றுச்சூழல், காலநிலை மாற்றம் மற்றும் வனத்துறை செயலாளர் சுப்ரியா சாஹு நேற்று வெளியிட்டுள்ள அறிக்கை: தமிழ்நாடு அரசு அழிவின் விளிம்பில் உள்ள சிங்கவால் குரங்கு, சென்னை முள்ளெலி, வரிக் கழுதைப்புலி மற்றும் கூம்பு-தலை மஹ்சீர் மீன் ஆகிய உயிரினங்களை பாதுகாப்பதற்காக ரூ.1 கோடி செலவில் ஒரு முன்னோடி திட்டத்தை தொடங்குகிறது.

இது தொடர்பாக சுற்றுச்சூழல், காலநிலை மாற்றம் மற்றும் வனத்துறை அரசாணை வெளியிட்டுள்ளது. இந்த திட்டம் சுற்றுச்சூழல் முக்கியத்துவம் வாய்ந்த நான்கு இனங்களை இலக்காக கொண்டுள்ளது. மேற்கு தொடர்ச்சி மலைகளில் காணப்படும் அழிந்து வரும் விலங்கினமான சிங்கவால் குரங்குகள் வரையறுக்கப்பட்ட வனப்பகுதிகளில் வாழ்கிறது. இரவு நேர மற்றும் மறைவு வாழ்க்கை முறை கொண்ட சென்னை முள்ளெலி, தமிழ்நாடு, ஆந்திர பிரதேசம் மற்றும் கேரளாவின் வறண்ட நிலப்பரப்புகளில் காணப்படுகிறது.

இருப்பினும் இது போதுமான அளவு ஆய்வு செய்யப்படாமலும் பாதுகாப்பின்றியும் உள்ளது. கிட்டத்தட்ட அச்சுறுத்தலுக்கு உள்ளான இனமாகவும் இயற்கை தோட்டியாகவும் இருக்கும் வரிக் கழுதைப்புலி, நோய்களை கட்டுப்படுத்துவதில் முக்கிய பங்கு வகிக்கிறது. ஆனால் முதுமலை புலிகள் காப்பக நிலப்பரப்பில் விரைவான சரிவை எதிர்கொள்கிறது. மோயார் ஆற்றில் ஒரு காலத்தில் ஏராளமாக இருந்த கூம்பு-தலை மக்காக், இப்போது அணை கட்டுமானம், அழிவுகரமான மீன்பிடி நடைமுறைகள், மாசுபாடு மற்றும் ஆக்கிரமிப்பு காரணமாக மிகவும் அழியும் நிலையில் உள்ளது.

சிங்கவால் குரங்கு பாதுகாப்புக்காக மொத்தம் ரூ.48.50 லட்சம், மெட்ராஸ் முள்ளெலிக்கு ரூ.20.50 லட்சம், வரி கழுதைப்புலிக்கு ரூ.14 லட்சம் மற்றும் கூம்புத் தலை மஹ்சீருக்கு ரூ.17 லட்சம் என மொத்தம் ரூ.1 கோடி நிதி ஒதுக்கப்பட்டுள்ளது. இந்த நிதி வாழ்விட கண்காணிப்பு, நீண்டகால மக்கள் தொகை ஆய்வுகள், பாதுகாப்பு இனப்பெருக்க மையங்களை அமைத்தல் மற்றும் சிங்கவால் குரங்குகளை பாதுகாக்க சுற்றுச்சூழல் ஆய்வுகள்,

வன இணைப்பை உறுதி செய்வதற்கான பாலங்கள், பள்ளிகள் மற்றும் பொதுமக்களுக்கு விழிப்புணர்வு மற்றும் கல்வி திட்டங்கள், பாதிக்கப்படக்கூடிய பகுதிகளில் அறிவிப்பு பலகைகள் மற்றும் முன்னணி வன ஊழியர்களுக்கான பயிற்சி ஆகியவை அடங்கும். கூம்புத் தலை மஹ்சீருக்கு, ஆற்றங்கரை மீன்களின் எண்ணிக்கையை அதிகரிக்க அவற்றின் வசிப்பிடத்திலேயே வளர்ப்பு, இனப்பெருக்கம் மற்றும் விடுவிப்பு திட்டங்கள் மேற்கொள்ளப்படும். இவ்வாறு அவர் கூறியுள்ளார்.