முதல் நிதி அரையாண்டு இந்தியன் வங்கி நிகர லாபம் ரூ.3018 கோடி: இயக்குநர் பினோத் குமார் தகவல்

சென்னை: இந்தியன் வங்கி 2025ம் ஆண்டின் அரையாண்டு நிகர லாபம் 3018 கோடியாக உள்ளது என இயக்குநர் பினோத் குமார் தெரிவித்துள்ளார். சென்னை ராயப்பேட்டையில் உள்ள இந்தியன் வங்கி அலுவலகத்தில் 2025ம் ஆண்டு முதல் நிதி அரையாண்டு செயல்பாடுகள் செய்தியாளர்கள் சந்திப்பு நடந்தது. அப்போது இந்தியன் வங்கி மேலாண்மை இயக்குநர் பினோத் குமார் நிருபர்களிடம் கூறியதாவது: உலக அளவில் வணிகத்தில் ஈடுபட்டு வரும் இந்தியன் வங்கியின் மதிப்பு 13.97 லட்சம் கோடியாக உள்ளது. மேலும் 2025ம் ஆண்டு முதல் நிதி அரையாண்டு நிகர லாபம் 3018 கோடி அது 2024ம் ஆண்டு விட 11.49 சதவீதம் அதிகரித்துள்ளது. அதேபோல செயல்பாட்டு லாபம் 4728 கோடியில் இருந்து 2025ம் ஆண்டு 4,837 கோடியாக உயர்ந்துள்ளது. முந்தைய ஆண்டை விட 2.31 சதவீதம் உயர்ந்திருக்கிறது.

நிகர வட்டி வருவாய் கடந்த ஆண்டு பதிவான 6194 கோடியில் இருந்து இந்த ஆண்டு 6,551 கோடியாக அதாவது 5.76 சதவீதம் உயர்ந்திருக்கிறது. சொத்துகள் மீதான லாபமீட்டல் நிலை இந்தாண்டு உயர்ந்து 1.32 சதவீதமாக உயர்ந்து வளர்ச்சி கண்டிருக்கிறது. மொத்த கடன்கள், செப்டம்பர்’24-ல் பதிவான ரூ.5,50,644 கோடி என்பதிலிருந்து செப்டம்பர் 25ம் தேதியில் 12.65 சதவீதம் வளர்ச்சி பெற்று ரூ.620324 கோடியாக அதிகரித்திருக்கிறது. டிஜிட்டல் சேனல்கள் வழியாக ரூ.1,23,585 கோடி பிசினஸ் மேற்கொள்ளப்பட்டிருக்கிறது.

இதுவரை மொத்தத்தில் 132 டிஜிட்டல் பயணங்கள், பயன்பாடுகள் மற்றும் செயல்முறைகள் அறிமுகம் செய்யப்பட்டு செயல்படுத்தப்பட்டிருக்கின்றன. யுபிஐ பயனாளிகள் மற்றும் நெட் பேங்கிங் பயனாளிகளின் எண்ணிக்கை ஆகிய இரண்டும் முந்தைய ஆண்டைவிட 24 சதவீதம் மற்றும் 6 சதவீதம் அதிகரித்து முறையே 2.41 கோடி மற்றும் 1.17 கோடி என பதிவாகியிருக்கிறது. பொதுமக்களுக்கு புகார் தெரிவிக்க வேண்டும் என்றால் எங்களுடைய இணையதளம் மூலமாக தெரிவிக்கலாம். அதற்கு கண்டிப்பாக நடவடிக்கை எடுக்கப்படும். இவ்வாறு அவர் கூறினார்.