யுபிஐ மூலம் ரூ.40 லட்சத்துக்கு மேல் பரிவர்த்தனை; ஜிஎஸ்டி நோட்டீசால் பால், தயிர் விற்பனை நிறுத்தம்: பெங்களூருவில் வணிகர்கள் போராட்டம்

பெங்களூரு: மாநில வணிக வரித்துறை யுபிஐ மூலம் அதிக வருவாய் ஈட்டிய வணிகர்களுக்கு ஜிஎஸ்டி நோட்டீஸ் அனுப்பிய நிலையில், அந்த நோட்டீசை திரும்பப்பெற வலியுறுத்தியும், ஜிஎஸ்டி நிலுவைத் தொகையை தள்ளுபடி செய்ய வலியுறுத்தியும் கருப்பு பட்டை அணிந்து பால், டீ, காபி விற்பனையை நிறுத்தி போராட்டம் நடத்தினர்.

கர்நாடக மாநில வணிக வரித்துறை சமீபத்தில், யுபிஐ பரிவர்த்தனை மூலம் ஆண்டுக்கு ரூ.40 லட்சம் வருவாய் ஈட்டிய 14,000 வணிகர்களுக்கு ஜிஎஸ்டி நோட்டீஸ் அனுப்பியது. அதனால் பதற்றமடைந்த சிறு வணிகர்கள், தங்கள் கடைகளில் வைத்திருந்த கியூஆர் கோடை அகற்றிவிட்டு, பணம் மட்டுமே பெறப்படும் என்று எழுதி ஒட்டினர். குறிப்பாக பெங்களூருவில் பெரும்பாலான கடைகளில் பணம் மட்டுமே பெறப்படுகிறது. 14,000 பேருக்கு ஜிஎஸ்டி நோட்டீஸ் அனுப்பப்பட்ட விவகாரமே பெரும் பரபரப்பை ஏற்படுத்த, வணிக வரித்துறை மேலும் 6000 பேருக்கு ஜிஎஸ்டி நோட்டீஸ் அனுப்பியது வணிகர்களிடையே கடும் அதிருப்தியை ஏற்படுத்தியிருக்கிறது.

வணிக வரித்துறையின் ஜிஎஸ்டி நோட்டீஸ் நடவடிக்கைக்கு எதிர்ப்பு தெரிவித்து பெங்களூருவில் நேற்று நூற்றுக்கணக்கான பேக்கரிகள், டீக்கடை உரிமையாளர்கள் பால், தயிர், டீ, காபி விற்பனையை நிறுத்தினர். அதனால் பொதுமக்கள் பால், தயிர் ஆகிய அத்தியாவசியப் பொருட்களை வாங்க முடியாமல் அலைந்தனர்.

பால் மற்றும் தயிர் ஆகியவற்றிற்கு ஜிஎஸ்டியிலிருந்து விலக்கு அளிக்கப்பட்டுள்ள நிலையில், பல பால் கடைகளுக்கும் லட்சக்கணக்கான ரூபாய் ஜிஎஸ்டி வரி செலுத்துமாறு நோட்டீஸ் அனுப்பப்பட்டிருந்தது. அதனால் தான், பால், தயிர் விற்பனையை நேற்று ஒரு நாள் மட்டும் அடையாள வேலைநிறுத்தமாக நிறுத்தியதாக வணிகர்கள் தெரிவித்தனர். இதையடுத்து முதல்வர் சித்தராமையாவை சிறுவணிகர்கள் குழுவாக சென்று தங்கள் கோரிக்கைகளை வலியுறுத்தினர்.