போலி பாஸ்போர்ட் வழக்கில் ஐபிஎஸ் அதிகாரியை விசாரிக்க உத்தரவு பிறப்பிக்க தேவையில்லை: ஐகோர்ட் உத்தரவு

சென்னை: மதுரை மாநகர காவல் ஆணையராக டேவிட்சன் தேவாசீர்வாதம் பதவி வகித்த காலத்தில், 200க்கும் மேற்பட்டோருக்கு போலி ஆவணங்களின் அடிப்படையில் பாஸ்போர்ட் வழங்கப்பட்டதாகவும், இது சம்பந்தமாக ஐ.பி.எஸ். அதிகாரி டேவிட்சன் தேவாசீர்வாதத்துக்கு எதிரான புகார் குறித்து ஆரம்பகட்ட விசாரணை நடத்த உத்தரவிட வேண்டும் எனவும் கோரி சென்னையைச் சேர்ந்த வாராகி என்பவர் 2023ம் ஆண்டு உயர் நீதிமன்றத்தில் பொதுநல வழக்கு தாக்கல் செய்திருந்தார். இந்த வழக்கு, தலைமை நீதிபதி எம்.எம்.வஸ்தவா மற்றும் நீதிபதி ஜி.அருள்முருகன் அமர்வில் விசாரணைக்கு வந்தது.

அப்போது, அரசு தரப்பில் அட்வகேட் ஜெனரல் பி.எஸ்.ராமன், காவல்துறை தரப்பில் மாநில தலைமை குற்றவியல் வழக்கறிஞர் அசன் முகமது ஜின்னா ஆஜராகி, இந்த விவகாரத்தில் ஐ.பி.எஸ். அதிகாரி டேவிட்சனுக்கு தொடர்பில்லை என்று நற்சான்று அளித்து உயர் நீதிமன்ற மதுரை அமர்வு உத்தரவிட்டுள்ளது. மனுதாரரின் கோரிக்கை மனு மீது ஆரம்பகட்ட விசாரணை நடத்தப்பட்டு, புகாரில் முகாந்திரம் இல்லை என்று தெரியவந்தது. அந்த விவரம் மனுதாரருக்கு தெரிவிக்கப்பட்டு விட்டது.

உயர் நீதிமன்ற மதுரை அமர்வின் உத்தரவின் அடிப்படையில், ஐந்து காவல் துறையினர் உள்பட 59 பேருக்கு எதிராக வழக்குப்பதிவு செய்து, விசாரித்து இறுதி அறிக்கை தாக்கல் செய்யப்பட்டுள்ளது. இந்த வழக்கு குற்றச்சாட்டுகள் பதிவுக்காக தள்ளிவைக்கப்பட்டுள்ளது என்று தெரிவித்தனர். இதை பதிவு செய்து கொண்ட நீதிபதிகள், உயர் நீதிமன்ற மதுரை அமர்வில் தனி நீதிபதி பிறப்பித்த உத்தரவை, இரு நீதிபதிகள் அமர்வும் உறுதி செய்துள்ளது. போலி பாஸ்போர்ட் மோசடி தொடராக குற்றப்பத்திரிகை தாக்கல் செய்யப்பட்டுள்ளதால் இந்த மனு மீது எந்த உத்தரவும் பிறப்பிக்க தேவையில்லை எனக் கூறி பொதுநல வழக்கை முடித்து வைத்து உத்தரவிட்டனர்.